დაძაბულობა უკრაინის საზღვრებთან

NATO: მტკიცედ მოვუწოდებთ რუსეთს, აირჩიოს დიპლომატიის და დეესკალაციის გზა

NATO-ს წევრი ქვეყნების თავდაცვის მინისტრები რუსეთ-უკრაინას შორის არსებული დაძაბულობის შესახებ საერთო განცხადებას ავრცელებენ.

NATO-ს განცხადება:

ჩვენ ღრმად შეშფოთებულები ვართ რუსეთის ფართომასშტაბიანი, არაპროვოცირებული და გაუმართლებელი სამხედრო ძალის მობილიზებით უკრაინისა და ბელარუსის გარშემო. უმკაცრესად მოვუწოდებთ რუსეთს, აირჩიოს დიპლომატიის გზა და საერთაშორისო ვალდებულებების შესაბამისად, დაუყოვნებლივ გაიყვანოს სამხედრო ძალები უკრაინიდან. 

ვრჩებით ერთგულნი რუსეთის მიმართ ჩვენი ორმაგი მდგომის: ძლიერი შეკავება და თავდაცვა, შერწყმული დიალოგისადმი მზაობასთან. რუსეთის ქმედებები სერიოზულ საფრთხეს უქმნის ევრო-ატლანტიკურ უსაფრთხოებას. მოკავშირეთა უსაფრთხოების უზრუნველსაყოფად, ჩვენ გავგზავნით დამატებით სახმელეთო ძალებს ალიანსის აღმოსავლეთ ნაწილში, ასევე, დამატებით გავზრდით საზღვაო და საჰაერო აქტივების რაოდენობას და მათ მზაობას.

ჩვენი ზომები რჩება პრევენციულად, პროპორციულად და არაესკალაციურად. ჩვენ მზად ვართ, გავაძლიეროთ ჩვენი თავდაცვითი და შემაკავებელი შესაძლებლობები, რათა ვუპასუხოთ ნებისმიერი სახის გაუთვალისწინებელ შემთხვევას. ჩვენი ერთგულება NATO-ს მე-5 მუხლის მიმართ რკინასავით მტკიცეა. ჩვენ გაერთიანებულები ვართ ერთმანეთის დასაცავად.

NATO რჩება ევროპული უსაფრთხოების ფუნდამენტური პრინციპების ერთგულად, მათ შორის იმის, რომ თითოეულ ქვეყანას აქვს უფლება თავად აირჩიოს თავისი უსაფრთხოების ზომები. 
ჩვენ ვადასტურებთ მხარდაჭერას უკრაინის ტერიტორიული მთლიანობისა და სუვერენიტეტის მიმართ, მის საერთაშორისოდ აღიარებულ საზღვრებში. 

როგორც უკვე იყო აღნიშნული, რუსეთს ნებისმიერი აგრესია უკრაინის მიმართ ძვირად დაუჯდება.

NATO და მოკავშირეები განაგრძობენ ევროატლანტიკური უსაფრთხოების საკითხებზე დიპლომატიურ მოლაპარაკებებს და დიალოგს რუსეთთან. ჩვენ მტკიცედ მოვუწოდებთ რუსეთს, რომ აირჩიოს დიპლომატიის და დეესკალაციის გზა.


15 თებერვალს, რუსეთის თავდაცვის სამინისტრომ გაავრცელა ინფორმაცია, რომ სამხედრო წვრთნების დასრულებასთან მიახლოების პარალელურად რუსეთის სამხედრო ნაწილები მუდმივ დისლოკაციებზე დასაბრუნებლად ემზადებიან. 16 თებერვლის განცხადებით კი, სამხრეთ სამხედრო ოლქის ქვედანაყოფებმა ყირიმში სამხედრო წვრთნები დაასრულეს და მუდმივი დისლოკაციის პუნქტებში ბრუნდებიან.

აშშ-ს სახელმწიფო მდივნის, ენტონი ბლინკენის თქმით, მიუხედავად მოსკოვის მიერ გავრცელებული ინფორმაციისა, რუსული სამხედრო ძალები უკან არ დახეულან და ისინი კვლავ რჩებიან უკრაინის საზღვართან ახლოს. 

აღასანიშნავია, რომ ანალოგიურ ინფორმაციას ავრცელებს NATO-ს გენერალური მდივანიც. იენს სტოლტენბერგის თქმით, ალიანსში რუსეთის ძალების უკრაინის საზღვრებიდან გასვლას ვერ ხედავენ და პირიქით, რუსეთს ამ მიმართულებით დამატებით სამხედროები გადმოჰყავს.

"რუსეთის ძალების არანაირი გასვლა არ გვინახავს. და რა თქმა უნდა, ეს წინააღმდეგობაში მოდის დიპლომატიური მცდელობის მესიჯებთან. რასაც ვხედავთ არის, რომ მათ გაზარდეს სამხედროების რიცხვი და მეტი ჯარისკაცი გზაშია. ჯერჯერობით, დეესკალაცია არაა", – ამბობს სტოლტენბერგი. 


11 თებერვალს აშშ-მ გამოაცხადა, რომ რუსეთი უკრაინაში შესაძლოა ნებისმიერ წამს შეიჭრას, აქამდე კი პრეზიდენტმა, ჯო ბაიდენმა აშშ-ს მოქალაქეებს უკრაინის დატოვებისკენ მოუწოდა და აღნიშნა, რომ მოქალაქეების ევაკუაციისთვის ამერიკა იქ სამხედროებს არცერთ შემთხვევაში გაგზავნის.

ზოგიერთ მედიაში ანონიმური წყაროები საუბრობენ, რომ რუსეთი უკრაინაში შესაძლოა ზამთრის ოლიმპიური თამაშების დასრულებამდე, კონკრეტულად 16 თებერვალს შეიჭრას.

აშშ, დიდი ბრიტანეთი და ევროპის ზოგიერთი ქვეყანა საკუთარ მოქალაქეებს უკრაინის დატოვებისკენ მოუწოდებენ. რუსული მედიის ინფორმაციით, უკრაინის დატოვება დაიწყეს რუსმა დიპლომატებმაც. ქვეყანას ტოვებენ ისრაელის დიპლომატიური კორპუსის წარმომადგენლების ოჯახის წევრებიც.

დაძაბულობის ფონზე, ბელარუსში რუსეთი-ბელარუსის ერთობლივი სამხედრო წვრთნები ტარდება. ამ მანევრების პასუხად, უკრაინა საკუთარი შეიარაღებული ძალების ვარჯიშებს ატარებს.

დაძაბული ვითარების ფონზე NATO-ს აღმოსავლეთ ფლანგის გამტკიცებისთვის ევროპაში აშშ-ს დამატებმა სამხედრო ძალებმა უკვე დაიწყეს ჩასვლა. აშშ-ს პრეზიდენტ ჯო ბაიდენის თქმით, პოლონეთსა და რუმინეთში 3 000-მდე ჯარისკაცი განთავსდება. დასავლურ მედიის მიხედვით, რუსეთი უკრაინაში შეჭრისთვის 70%-იც მზად არის. გავრცელებული ინფორმაციით, რუსეთი შეჭრის წინაპირობის შესაქმნელად აღმოსავლეთ უკრაინაში ოპერაციას ამზადებს.

2021 წლის 11 დეკემბერს რუსეთის საგარეო საქმეთა სამინისტრომ NATO-ს სთხოვა, რომ გააუქმოს 2008 წლის ბუქარესტის სამიტზე დადებული პირობა, საქართველოსა და უკრაინის ჩრდილოატლანტიკურ ალიანსში გაწევრიანებასთან დაკავშირებით.

რუსეთის მოთხოვნის საპასუხოდ NATO-ს გენერალური მდივანმა, იენს სტოლტენბერგმა თქვა, რომ ყველა ქვეყანას აქვს უფლება, აირჩიოს საკუთარი გზა, მათ შორის, თუ რა სახის უსაფრთხოების შეთანხმების მონაწილე სურს, რომ იყოს. მისივე შეფასებით, მიუღებელია, რომ რუსეთი ცდილობს, გავლენის სფეროების სისტემა აღადგინოს. 

მოგვიანებით 17 დეკემბერს რუსეთის საგარეო საქმეთა სამინისტრომ გამოაქვეყნა აშშ-სთან და NATO-სთან უსაფრთხოების გარანტიებზე მოლაპარაკების პროექტი. რუსეთი ჩრდილოატლანტიკურ ალიანსსა და აშშ-ს, ფაქტობრივად, ჯარებისა და შეიარაღების 1997 წლის მაისის განლაგებაზე დაბრუნებას სთხოვს, ანუ იმ დროინდელ პოზიციებზე დაბრუნებას სანამ აღმოსავლეთ ევროპის ქვეყნებს NATO-ში მიიღებდნენ. ასევე, მოსკოვი კიდევ ერთხელ ითხოვს ალიანსის გაფართოების შეჩერებასა და მასში უკრაინის გაწევრიანების დაუშვებლობას უსვამს ხაზს. პროექტის მიხედვით, NATO-მ უნდა შეაჩეროს სამხედრო საქმიანობა უკრაინაში, აღმოსავლეთ ევროპაში, კავკასიასა და ცენტრალურ აზიაში.

იანვრის პირველ ნახევარში დასავლეთსა და რუსეთს შორის გამართული დიპლომატიური შეხვედრები უშედეგოდ დასრულდა.

აშშ-სგან და NATO-სგან რუსეთის ფედერაციამ საპასუხო მოთხოვნები წერილობითად მიიღო. დოკუმენტმა მოსკოვში უკმაყოფილება გამოიწვია. დასავლეთის პასუხში საუბარი იყო რუსული საოკუპაციო ძალების გაყვანაზეც საქართველოდან, უკრაინიდან და მოლდოვიდან. რუსეთის მხარე ამჟამად საპასუხო დოკუმენტზე მუშაობს.

15 თებერვალს რუსეთის თავდაცვის სამინისტრომ გამოაცხადა, რომ მათ გაჰყავთ სამხედროების ნაწილები, რომლებმაც სამხედრო წვრთნები დაასრულეს. თუმცა დეესაკალაციის შესაძლებლობას დასავლეთში ჯერჯერობით სკეპტიკურად უყურებენ. აშშ-ს პრეზიდენტის, ჯო ბაიდენის თქმით, რუსეთის უკრაინაში შეჭრის შესაძლებლობა ჯერ კიდევ არსებობს.

პარალელურად, რუსეთის დუმამ მხარი დაუჭირა ოკუპირებული დონეცკისა და ლუგანსკის ე.წ. სახალხო რესპუბლიკების დამოუკიდებლობის აღიარებას და დასამტკიცებლად ვლადიმირ პუტინს მიმართეს. ჯერჯერობით პუტინი ამბობს, რომ დონეცკისა და ლუგანსკის რეგიონებთან დაკავშირებით, პირველ რიგში, მინსკის შეთანხმების მიხედვით იმოქმედებენ.

ვრცლად უკრაინის საზღვრებთან არსებული დაძაბულობისა და ომის შესაძლებლობის შესახებ წაიკითხეთ აქ – უკრაინა ახალი ომის მოლოდინში – დასავლეთს ძილის დრო არ აქვს.

კომენტარები