რუსეთის ფედერაციის თავდაცვის სამინისტროს ცნობით, დღეს, 10 თებერვალს ბელარუსის ბაზებზე დაიწყო ბელარუსისა და რუსეთის მოკავშირე სახელმწიფოს ერთობლივი სამხედრო წვრთნები Союзная решимость - 2022. ეს ვარჯიშების მეორე ეტაპია.
წვრთნები 10 დღის განმავლობაში გაგრძელდება.
"სწავლება ტარდება თავდაცვითი ოპერაციის ქვეშ გარე აგრესიის ჩახშობისა და მოგერიების დავალებების შემუშავების, ასევე ტერორიზმის წინააღმდეგ მოქმედებისა და მოკავშირე სახელმწიფოს ინტერესების დაცვის მიზნით", – წერია რუსეთის თავდაცვის სამინისტროს განცხადებაში.
ვარაუდობენ, რომ ვარჯიშებში მონაწილეობას მიიღებს 30 000-მდე რუსი სამხედრო. ოფიციალური ცნობებით, ბელარუსში გადატანილია რუსული საჰაერო თავდაცვის სისტემები, С-400 ტრიუმფები, ასევე მოკლე რადიუსის სარაკეტო სისტემების, Панцирь-С-ის დივიზიონები, ასევე ავიაგამანადგურებელი Су-35-ები და Су-25СМ-ის ტიპის მოიერიშე თვითმფრინავები.
გასულ დღეს, 9 თებერვალს რუსეთის გენერალური შტაბის მეთაური, ვალერი გერასიმოვი ბელარუსში ჩავიდა.
უკრაინასა საზღვრებთან რუსეთის სამხედრო ნაწილების თავმოყრის ფონზე რუსეთი სხვადასხვა სამხედრო წვრთნას ატარებს. ერთობლივი სამხედრო წვრთნები ბელარუსში უკრაინაში ბელარუსიდან შეჭრის შიშსაც აჩენს. რუსეთი ასევე გეგმავს ბირთვული წვრთნები, რომლებიც ჩვეულებრივ შემოდგომაზე ტარდება, თებერვალში ჩაატაროს. სამხედრო წვრთნები ჩატარდება სამხრეთ სამხედრო ოლქშიც, რომელიც ძირითადად ჩრდილოეთ კავკასიას მოიცავს. ამ სამხედრო მომზადების ფარგლებში წვრთნები გაიმართება საქართველოს ოკუპირებულ ტერიტორიებზე, აფხაზეთსა და ცხინვალის რეგიონში განთავსებულ რუსულ სამხედრო ბაზებზეც.
დაძაბული ვითარების ფონზე NATO-ს აღმოსავლეთ ფლანგის გამტკიცებისთვის ევროპაში აშშ-ს დამატებმა სამხედრო ძალებმა უკვე დაიწყეს ჩასვლა. აშშ-ს პრეზიდენტ ჯო ბაიდენის თქმით, პოლონეთსა და რუმინეთში 3 000-მდე ჯარისკაცი განთავსდება. დასავლურ მედიაში გავრცელებული ინფორმაციით, რუსეთი უკრაინაში შეჭრისთვის 70%-იც მზად არის.
უკრაინასა და რუსეთს შორის დაძაბული მდგომარეობის ფონზე გავრცელდა ინფორმაცია, რომ რუსეთი შეჭრის წინაპირობის შესაქმნელად აღმოსავლეთ უკრაინაში ოპერაციას ამზადებს. CNN-ის ცნობით, მათი წყაროს თქმით, ბაიდენის ადმინისტრაციაში სჯერათ, რომ რუსეთი, შესაძლოა, უკრაინაში შეჭრისთვის ემზადებოდეს, "რაც გამოიწვევს ადამიანების უფლებების ფართოდ დარღვევასა და ომის დანაშაულს, თუ დიპლომატია საკუთარ მიზანს ვერ შეასრულებს".
2021 წლის 11 დეკემბერს რუსეთის საგარეო საქმეთა სამინისტრომ NATO-ს სთხოვა, რომ გააუქმოს 2008 წლის ბუქარესტის სამიტზე დადებული პირობა, საქართველოსა და უკრაინის ჩრდილოატლანტიკურ ალიანსში გაწევრიანებასთან დაკავშირებით.
რუსეთის მოთხოვნის საპასუხოდ NATO-ს გენერალური მდივანმა, იენს სტოლტენბერგმა თქვა, რომ ყველა ქვეყანას აქვს უფლება, აირჩიოს საკუთარი გზა, მათ შორის, თუ რა სახის უსაფრთხოების შეთანხმების მონაწილე სურს, რომ იყოს. მისივე შეფასებით, მიუღებელია, რომ რუსეთი ცდილობს, გავლენის სფეროების სისტემა აღადგინოს.
მოგვიანებით 17 დეკემბერს რუსეთის საგარეო საქმეთა სამინისტრომ გამოაქვეყნა აშშ-სთან და NATO-სთან უსაფრთხოების გარანტიებზე მოლაპარაკების პროექტი. რუსეთი ჩრდილოატლანტიკურ ალიანსსა და აშშ-ს, ფაქტობრივად, ჯარებისა და შეიარაღების 1997 წლის მაისის განლაგებაზე დაბრუნებას სთხოვს, ანუ იმ დროინდელ პოზიციებზე დაბრუნებას სანამ აღმოსავლეთ ევროპის ქვეყნებს NATO-ში მიიღებდნენ. ასევე, მოსკოვი კიდევ ერთხელ ითხოვს ალიანსის გაფართოების შეჩერებასა და მასში უკრაინის გაწევრიანების დაუშვებლობას უსვამს ხაზს. პროექტის მიხედვით, NATO-მ უნდა შეაჩეროს სამხედრო საქმიანობა უკრაინაში, აღმოსავლეთ ევროპაში, კავკასიასა და ცენტრალურ აზიაში.
იანვრის პირველ ნახევარში დასავლეთსა და რუსეთს შორის გამართული დიპლომატიური შეხვედრები უშედეგოდ დასრულდა.
პარალელურად უკრაინის საზღვრებთან რუსეთის სამხედრო ძალების თავმოყრის გამო ორ ქვეყანას შორის მდგომარეობა კვლავ დაძაბულია. კიევისა და ვაშინგტონის ცნობებით, უკრაინის საზღვრებთან ასიათასამდე რუსი სამხედროა თავმოყრილი. გრძელდება შეიარაღებული ძალების ამ ტერიტორიაზე უჩვეულო თავმოყრა და გადაადგილება. არსებობს შიში, რომ რუსეთი უკრაინაში შეჭრისთვის ემზადება.
ვრცლად უკრაინის საზღვრებთან არსებული დაძაბულობისა და ომის შესაძლებლობის შესახებ წაიკითხეთ აქ – უკრაინა ახალი ომის მოლოდინში – დასავლეთს ძილის დრო არ აქვს.
