რუსეთ-უკრაინის 2022-24 წლის ომი

ლამბრეხტი: გერმანული ჰაუბიცები უკრაინაში გამოყენებისთვის მალე მზად იქნება

გერმანიის თავდაცვის მინისტრი, ქრისტინ ლამბრეხტი

გერმანიის თავდაცვის მინისტრის, ქრისტინ ლამბრეხტის თქმით, გერმანულ ჰაუბიცებზე უკრაინის ჯარების წვრთნები მალე დასრულდება, რაც, თავისთავად, იარაღის უკრაინაში გაგზავნას დააჩქარებს. 

"Panzerhaubitze 2000-ის გამოყენების წვრთნები მალე დასრულდება, რათა უკრაინელმა სამხედროებმა იარაღის ომში გამოყენება შეძლონ". - თქვა ლამბრეხტმა რაინბახში, სამხედრო ბაზაზე ვიზიტის დროს. 

გერმანიის თავდაცვის მინისტრი იარაღის უკრაინაში გაგზავნის თარიღებთან დაკავშირებით დეტალებს არ ასახელებს. 

გასულ კვირას უკრაინის პრეზიდენტის მრჩეველმა, მიხაილო პოდოლიაკმა თქვა, რომ უკრაინას, სხვა მძიმე იარაღთან ერთად, 1 000 ჰაუბიცა, 500 ტანკი და 1 000 დრონი სჭირდება. 

14 ივნისს გავრცელებული ინფორმაციით, ბერლინი უკრაინას ჰაერსაწინააღმდეგო სისტემებს გადასცემს. უკრაინა გერმანიისგან ასევე არტილერიის აღმოსაჩენ რადარსაც მიიღებს

თუმცა, ომის დაწყებიდან, გერმანია მოკავშირეების მხრიდან უკრაინისთვის მძიმე იარაღის, მათ შორის ტანკების, საარტილერიო და საჰაერო თავდაცვის სისტემების მიწოდებისგან თავის შეკავების გამო ზეწოლას განიცდის.

კრიტიკისგან თავის დაცვის მიზნით, გერმანიის კანცლერმა, ოლაფ შოლცმა თქვა, რომ ბერლინი უკრაინას იარაღს "სხვა ქვეყნებზე ინტენსიურად აწვდის".

19 აპრილის დადგომასთან ერთად, რუსეთის სამხედრო ძალებმა დონბასში, აღმოსავლეთ უკრაინაში ინტენსიური თავდასხმები წამოიწყეს და ომის ახალ ეტაპზე გადავიდნენ. 

როგორც უკრაინის პრეზიდენტი, ვოლოდიმირ ზელენსკი ამბობს, დაწყებულია ომი დონბასისთვის.

როგორც რუსეთის შეიარაღებულ ძალებში ამბობენ, მათი მიზანია სრული კონტროლი მოიპოვონ დონბასსა და სამხრეთ უკრაინაზე, რათა ყირიმსა და მოლდოვის ოკუპირებულ ტერიტორიას, დნესტრისპირეთს სახმელეთო დერეფნით დაუკავშირდნენ.

რუსეთმა უკრაინაზე სრულმასშტაბიანი თავდასხმა 24 თებერვალს გამთენიისას, ერთდროულად რამდენიმე დიდი ქალაქის, მათ შორის, კიევის დაბომბვით დაიწყო.

პუტინის მიერ უკრაინისთვის ომის გამოცხადებას წინ უძღოდა დონეცკისა და ლუგანსკის თვითგამოცხადებული რესპუბლიკების მარიონეტული რეჟიმების ფორმალური თხოვნა კრემლისადმი, დახმარებოდნენ "უკრაინული აგრესიის" მოგერიებაში.

უკრაინაში შეჭრის პარალელურად, მსოფლიოს წამყვანი ქვეყნები რუსეთს სხვადასხვა სახის სანქციას უწესებენ.

კომენტარები