შარლ მიშელის შეთანხმების ანულირება

ხოშტარია: მთელ ოპოზიციას რომ დაეტოვებინა პარლამენტი, მიშელის განცხადება სხვანაირი იქნებოდა

"როდესაც მიშელის ხელშეკრულება დაირღვა, რომ გამოსულიყო მთელი ოპოზიცია და დაეტოვებინათ პარლამენტი, მიშელის განცხადება იქნებოდა სხვანაირი". – თქვა მოძრაობა დროას ლიდერმა და თბილისის საკრებულოს თავმჯდომარეობის კანდიდატმა, ელენე ხოშტარიამ ფორმულას ეთერში.

"ევროკავშირს აქვს თავისი მოძრაობის ტემპი, ტრაექტორია. ყველაზე მთავარია ის, რომ ოპოზიციას აქ არ უნდა გვქონდეს ფსონი დადებული იმაზე, რომ ევროპა ან ამერიკა მოახდენს აქ რაიმეს დემონტაჟს, ან იმოქმედებს ჩვენს ნაცვლად. 

პირდაპირ გეტყვით, იმ დღეს, როდესაც მიშელის ხელშეკრულება დაირღვა, რომ გამოსულიყო მთელი ოპოზიცია და დაეტოვებინათ პარლამენტი, მიშელის განცხადება იქნებოდა სხვანაირი. იმიტომ, რომ ეს უკვე იქნებოდა არსებითი, ოპოზიციის მიერ შეფასებული კრიზისი, რომ პარლამენტი არის ერთპარტიული და თან არსებობს ოპოზიციის ერთიანობა. შეიძლება ჰქონდეთ სხვა ტაქტიკა და მე ამის განხილვაში არ შევდივარ.  საერთაშორისო რეაგირებაც მოქმედებს იმის მიხედვით, ჩვენ შიგნით როგორ ვიქცევით". – თქვა ხოშტარიამ. 

ქართულმა ოცნებამ 28 ივლისს შარლ მიშელის შეთანხმება ანულირებულად გამოაცხადა და შეეცადა, რომ ამაში ოპოზიცია დაედანაშაულებინა. როგორც ხელისუფლების წარმომადგენლებმა თქვეს, ვალდებულებების შესრულება მათ "კეთილ ნებაზე" იქნება დამოკიდებული. ეს იმას ნიშნავს, რომ ქართული ოცნება უარს ამბობს, 43%-ის ვერაღების შემთხვევაში დათანხმდეს ვადამდელი არჩევნების ჩატარებას, რაც შეთანხმებაზე ხელმომწერი ოპოზიციური პარტიებისთვის მთავარი მოტივაცია იყო.   

შეთანხმების ანულირების შემდეგ გირჩი – მეტი თავისუფლების ლიდერმა, ზურაბ ჯაფარიძემ თქვა, რომ ის პარლამენტს დატოვებს, ვინაიდან "არ არსებობს შეთანხმება, არ არსებობს ვალდებულებები", ბოიკოტის დასრულებასა და ოპოზიციის პარლამენტში შესვლას კი სწორედ ეს შეთანხმება ითვალისწინებდა. 

ერთიანი ნაციონალური მოძრაობის თავმჯდომარის, ნიკა მელიას ცნობით, ის საპარლამენტო მანდატს დატოვებს, ვინაიდან სრულად იქნება გადართული თვითმმართველობის არჩევნებში, სადაც ის ოპოზიციის ნაწილის მერობის საერთო კანდიდატია, თუმცა, მისი "პრინციპული თხოვნით", ენმ-ს წევრები პარლამენტში "ფორმალურად" დარჩებიან. 

რაც შეეხება ლელოს, ბადრი ჯაფარიძის თქმით, პარტია პარლამენტში ყოფნას გააგრძელებს. პარლამენტში დარჩება სტრატეგია აღმაშენებელიც

ოცნების მიერ შეთანხმების ანულირებას დასავლელი პარტნიორების კრიტიკა მოჰყვა. სენატის ოპერატიული ჯგუფის შეფასებით, საქართველოში განვითარებული მოვლენები რეფორმების ძალისხმევას ძირს უთხრის, ქვეყნის დემოკრატიის მარცხით კი მხოლოდ კრემლი ისარგებლებს. სენატორი რიშის შეფასებით, შეთანხმების დატოვება ხელისუფლების პასუხისმგებლობაზე უარის თქმაა. მისივე სიტყვებით, ოცნებას მხოლოდ საკუთარი მომავალი აღელვებს, არა – ქვეყნის. დევიდ კრამერი წერს, რომ ევროკავშირი თავს შეურაცხყოფილად უნდა გრძნობდეს, "რომ მოლაპარაკებებზე დრო დაკარგა". სახელმწიფო დეპარტამენტის პრესსპიკერის, ნედ პრაისის შეფასებით კი შეთანხმებიდან ოცნების გასვლა რეფორმებით წინსვლას ძირს უთხრის.  

ევროპული საბჭოს პრეზიდენტმა, შარლ მიშელმა ქართული ოცნების მიერ 19 აპრილის შეთანხმების ანულირებასთან დაკავშირებით განცხადება 29 ივლისს გაავრცელა, სადაც აღნიშნულია, რომ ქართველ პოლიტიკოსებთან კონსულტაციებს იწყებს.  ევროპული საბჭოს პრეზიდენტი წერს, რომ 19 აპრილის შეთანხმება საუკეთესო გზაა რეფორმების გატარებისთვის და პარტიებს მოუწოდებს, წინ დააყენონ მოქალაქეთა ინტერესები.

კომენტარები