ბრიტანეთის თავდაცვის სამინისტროს შეფასებით, ვაგნერელები "მოძრაობენ ჩრდილოეთით, ვორენეჟის ოლქის გავლით, თითქმის დარწმუნებით შეგვიძლია ვთქვათ, რომ აპირებენ მოსკოვში შესვლას".
ვორენეჟი მდებარეობს დედაქალაქ მოსკოვსა და დონის როსტოვს შორის. დიდი ბრიტანეთის თავდაცვის სამინისტროს ინფორმაციით, ვაგნერმა დონის როსტოვში ძირითადი ადგილების აღება შეძლო. Reuters კი რუსული სპეცსამსახურების წყაროზე დაყრდნობით წერს, რომ ვორონეჟში ვაგნერის დაქირავებულმა სამხედროებმა კონტროლი ყველა სამხედრო ობიექტზე მოიპოვეს.
უწყება მიმდინარე მოვლენებს რუსეთისთვის უკანასკნელ წლებში "ყველაზე მნიშვნელოვან გამოწვევად აფასებს".
სამინისტროს ცნობით, ვაგერელები "დროებით ოკუპირებული უკრაინიდან რუსეთში სულ მცირე ორ ადგილას გადავიდნენ".
"უახლოეს საათებში, რუსეთის უშიშროების ძალების, განსაკუთრებით კი რუსეთის ეროვნული გვარდიის ერთგულება იქნება მთავარი ფაქტორი, თუ როგორ განვითარდება კრიზისი. ეს უკანასკნელი ბოლო დროის ყველაზე მნიშვნელოვანი გამოწვევაა რუსეთის სახელმწიფოსთვის". - ვკითხულობთ ანგარიშში.
23 ივნისს პრიგოჟინმა თქვა, რომ ვაგნერის ბანაკებზე რუსეთის თავდაცვის სამინისტრომ სარაკეტო იერიში მიიტანა და საპასუხო მოქმედებებისთვის ემზადებოდნენ. ამის შემდეგ, მან განაცხადა, რომ საზღვარი გადაკვეთეს და როსტოვში შედიოდნენ. ის ასევე ირწმუნებოდა, რომ თავდაცვის სამინისტრომ თვითმფრინავებით ვაგნერის კოლონებზე დარტყმის ბრძანება გასცეს, რაზეც პილოტებმა უარი თქვეს.
"ხელს ვუშლით საკუთარი ტრა*ი გადაარჩინონ დამნაშავეებმა, რომლებმაც 100 000-მდე რუსი ჯარისკაცი გაანადგურეს, [ვალერი] გერასიმოვსა და [სერგეი] შოიგუს". – თქვა ევგენი პრიგოჟინმა.
პრიგოჟინის თქმით, თავდაცვის მინისტრი სერგეი შოიგუ სპეციალურად ჩავიდა როსტოვში, რათა კსკ ვაგნერის განადგურების ოპერაცია ჩაეტარებინა. მისივე მტკიცებით, მინისტრი ქალაქიდან გაიქცა. პრიგოჟინის თქმით, მისი მოქმედებები არა სამხედრო გადატრიალება, არამედ "სამართლიანობის მარშია".
პრიგოჟინი ყველაფრის განადგურებით იმუქრება. ამ დრომდე, მისი მტკიცებით, 3 ვერტმფრენი ჩამოაგდეს, მათ შორის ერთ-ერთი მოსკოვის ტრასაზე.
ამჟამად არსებული ინფორმაციით, ვაგნერის ძალები აკონტროლებენ დონის როსტოვისა და ვორონეჟის ადმინისტრაციულ შენობებს.
მაისში ბახმუტის აღების შემდეგ, ევგენი პრიგოჟინმა საკუთარი ძალები ზურგში, ბანაკებში გადაიყვანა და თქვა, რომ მაშინ დაბრუნდებოდნენ, როცა "სამშობლოს დასჭირდებოდნენ". უკვე რამდენიმე თვეა, რაც ვაგნერსა და რუსეთის თავდაცვის სამინისტროს შორის დაძაბული ვითარებაა. პრიგოჟინი ხშირად ლანძღავდა თავდაცვის მინისტრ სერგეი შოიგუსა და გენშტაბის მეთაურს, ვალერი გერასიმოვს. ის ირწმუნებოდა, რომ თავდაცვის უწყებას ვაგნერის განადგურება სურდა და ეს ჯერ კიდევ 2018 წელს, სირიაშიც კი სცადეს, როცა კერძო სამხედრო კომპანია ამერიკულ ძალებს დაუპირისპირდა და ბევრი მებრძოლი დაკარგა.
