საქართველოს პენცენტრი ლიტერატურულ კონკურს ლიტერას გარშემო განვითარებულ მოვლენებს ეხმაურება და საგანგებო განცხადებას ავრცელებს.
მათი განცხადებით, კულტურის მინისტრმა, თეა წულუკიანმა ლიტერას საქმიანობაში კულტურული ჟანდარმერიის შემოყვანა გადაწყვიტა და ბნელი ტოტალიტარული ტრადიციების აღდგენა მოინდომა. ისინი მოუწოდებენ მინისტრს, გაიწვიოს მის მიერ დანიშნული ჟიურის წევრი.
"ლიტერატურული პრემია „ლიტერა“ წელს პირველად დადგა დიდი გამოწვევის წინაშე. კულტურის მინისტრმა, თეა წულუკიანმა კონკურსის ჟიურიში თავისი წარმომადგენელი, მინისტრის მრჩეველი მიავლინა.
აქამდე „ლიტერას“ ჟიური ყოველწლიურად იცვლებოდა. ჟიურის წევრები იყვნენ მწერლები, ლიტერატურათმცოდნეები, კრიტიკოსები, მთარგმნელები. მიუხედავად იმისა, რომ პრემიას სახელმწიფო აფინანსებდა, დღემდე არავინ ერეოდა „ლიტერას“ საქმიანობაში. პრემია თავისუფალი იყო პოლიტიკური კონიუნქტურისაგან.
ახლა ეს სიტუაცია რადიკალურად შეიცვალა. წულუკიანმა კულტურული ჟანდარმერიის შემოყვანა გადაწყვიტა და მოინდომა კულტურაზე კონტროლის ყველაზე ბნელი ტოტალიტარული ტრადიციების აღდგენა.
მიგვაჩნია, რომ მინისტრის მსგავსი თავხედური ჩარევა ლიტერატურულ პროცესში მწერლებისთვის და ჟიურის წევრებისთვის შეურაცხმყოფელია. მწერლებიც და ჟიურიც თავისუფალნი უნდა იყვნენ ყოველგვარი პოლიტიკური კონტროლის მცდელობისაგანაც კი. ამ პრემიის რეპუტაციას განსაზღვრავენ მასში მონაწილე მწერლები და გადაწყვეტილების მიღების თავისუფალი, დემოკრატიული პროცესი: გადაწყვეტილებას იღებენ აღიარებული პროფესიონალები და არა პარტიული ერთგულების ნიშნით შერჩეული დილეტანტი ჩინოსნები. მადლობას ვუხდით იმ მწერლებს და ჟიურის წევრებს, რომლებმაც პროტესტის ნიშნად უკვე დატოვეს „ლიტერა“. დარწმუნებულები ვართ, რომ ეს სია გაიზრდება.
მოვუწოდებთ თეა წულუკიანს, დაუყოვნებლივ გაიწვიოს მის მიერ დანიშნული „ლიტერას“ ჟიურის წევრი, შეწყვიტოს მისთვის სრულიად უცხო სფეროში ცენზურის დაწესების მცდელობა და მწერლების პარტმუშაკებად ქცევაზე ოცნება. ჩვენ, ქართველი მწერლები, მთარგმნელები, ლიტერატურათმცოდნეები, კრიტიკოსები, გამომცემლები, ერთმანეთისგან განსხვავებული პოლიტიკური შეხედულებების მიუხედავად, ამ საკითხში ერთიანნი ვართ და ვიქნებით. ჩვენ არ დავუშვებთ ქართულ მწერლობაზე პარტიული კონტროლის დაწესებას". - წერია განცხადებაში, რომელსაც ხელს 65 მწერალი აწერს.
კულტურის სამინისტროსა და მწერალთა სახლის ერთობლივი ლიტერატურული პრემია თავდაპირველად ჟიურის ორმა წევრმა, რეზო თაბუკაშვილმა და ლელა კოდალაშვილმა დატოვეს და ისინი ამით შეუერთდნენ იმ 15 მწერალსა და ორ დიზაინერს, რომლებმაც კონკურსში მონაწილეობაზე უარი თქვეს.
ლიტერატურული პრემიის ბოიკოტის მიზეზი კულტურის მინისტრი, თეა წულუკიანი და მისი გადაწყვეტილებაა. წელს, არსებობის ისტორიაში პირველად, ლიტერას ჟიურის ერთი წევრი კულტურის, სპორტისა და ახალგაზრდობის სამინისტრომ დაუნიშნა.
