კერძო სამხედრო კომპანია ვაგნერის ჯგუფის დამფუძნებლის, ევგენი პრიგოჟინის თქმით, მისი ძალები აღმოსავლეთ უკრაინაში ფრონტის ხაზს 25 მაისს დატოვებენ. პრიგოჟინის თქმით, ეს მას შემდეგ მოხდება, რაც "უკანასკნელ სანტიმეტრამდე დაიკავებენ იმ ტერიტორიას, რომლის აღების პირობაც დადეს".
პრიგოჟინის განმარტებით, ვაგნერის ძალების ბრძოლის ველიდან გასვლის შემდეგ, იგი თავის პოზიციებს რუსეთის თავდაცვის სამინისტროს გადასცემს.
"ჩვენ, როგორც გუშინ ვთქვი, პოზიციებს რუსეთის თავდაცვის სამინისტროს გადავცემთ და ბრძოლის ველს 25 მაისს დავტოვებთ.
1 ივნისიდან არც ერთი ვაგნერელი არ იქნება ფრონტის ხაზზე მანამ, სანამ არ გავივლით რეორგანიზაციას, აღჭურვასა და წვრთნებს". - წერს პრიგოჟინი.
პრიგოჟინმა 20 მაისს განაცხადა, რომ მისმა ძალებმა ქალაქი ბახმუტი სრულად დაიკავეს ვაგნერის დამფუძნებლის თქმით, მისი ძალები ქალაქს 25 მაისამდე გაამაგრებენ, შემდეგ კი პოზიციებს რუსეთის თავდაცვის სამინისტროს ძალებს გადასცემენ და წავლენ დასასვენებლად და გადასამზადებლად, მანამ, სანამ ქვეყანას ხელახლა არ "დასჭირდებიან".
გირკინი: ვაგნერი, როგორც დამრტყმელი ძალა, აღარ არსებობს
უკრაინის გენერალურ შტაბში აცხადებენ, რომ ბახმუტის მიმართულებით მტერი თავდასხმით მოქმედებებს აგრძელებს და ქალაქისთვის ბრძოლა გრძელდება. უკრაინის სახმელეთო ჯარების მეთაურის, ალექსანდრ სირსკის თქმით, ქალაქის ტაქტიკურ ალყაში მოქცევასთან ახლოს არიან.
5 მაისს კერძო სამხედრო კომპანია ვაგნერის ჯგუფის დამფუძნებელმა, რუსმა ოლიგარქმა ევგენი პრიგოჟინმა თავდაცვის სამინისტროს კვლავ მოსთხოვა ჭურვები, დანაკარგების რიცხვების სიდიდეში შოიგუ და მისი მოადგილე დაადანაშაულა და აღნიშნა, რომ საბრძოლო მასალის დეფიციტის გამო, ვაგნერი ქალაქ ბახმუტს 10 მაისს დატოვებდა. ამის შემდეგ რამზან კადიროვმა პრიგოჟინს პოზიციებზე საკუთარი ძალებით ჩანაცვლება შესთავაზა. მომდევნო დღეს რუსმა ოლიგარქმა საკუთარი ძალების კადიროველებით ჩანაცვლებაზე მზაობა გამოთქვა.
კადიროვი პუტინს სწერს, რომ ბახმუტში ვაგნერის ახმატის ძალებით ჩანაცვლების მითითება გასცეს
ბახმუტის დატოვებასთან დაკავშირებულ განცხადებამდე პრიგოჟინმა გაავრცელა კადრები, რომლებშიც დახოცილი ვაგნერელები ჩანდნენ და მან შოიგუ და მისი მოადგილე, ვალერი გერასიმოვი გალანძღა.
პრიგოჟინის მტკიცებით, მის ძალებს ბახმუტში ასაღები მხოლოდ რამდენიმე კილომეტრი დარჩათ, თუმცა რუსეთის თავდაცვის სამინისტროს "შურიანობაში" ადანაშაულებს. ოლიგარქის მტკიცებით, მის ჯგუფს საბრძოლო მასალის ხელოვნური დეფიციტი მოუწყვეს.
7 მაისს პრიგოჟინმა გაავრცელა ინფორმაცია, რომ ვაგნერის ჯგუფს დაჰპირდნენ ყველაფერს, რაც საჭირო იქნებოდა და თავდაცვის სამინისტროსთან შუამავლად გენერალი სერგეი სუროვიკინი დაუნიშნეს. თუმცა, 9 მაისს პრიგოჟინმა თქვა, რომ ის მოატყუეს და მოთხოვნილი ჭურვების მხოლოდ 10% მიაწოდეს. მან აღნიშნა, რომ ბახმუტში კიდევ რამდენიმე დღით გაჩერდებოდნენ.
12 მაისს პრიგოჟინმა რუსეთის თავდაცვის სამინისტროს განცხადებას, რომ მათი შეიარაღებული ძალების ქვედანაყოფებმა ბახმუტის მიმდებარე ტერიტორიაზე გადაჯგუფების მოქმედებები შეასრულეს, ტყუილი უწოდა. მისი თქმით, რუსეთის შეიარაღებული ძალების სამხედროები პოზიციებიდან გაიქცნენ.
პრიგოჟინი: თუ არ იქნება ჭურვები, პოზიციებს დავტოვებთ და კითხვებს დავსვამთ, ვინაა მოღალატე
