პრემიერმინისტრობის კანდიდატმა ირაკლი კობახიძემ პარლამენტის პლენარულ სხდომაზე სამთავრობო პროგრამის წარდგენისას თქვა, რომ მთავრობა მომავალში განსაკუთრებულ ზომებს მიიღებს საქართველოს მართლმადიდებელი ეკლესიის დასაცავად.
"სახელმწიფო სეკულარული პრინციპის დაცვით, იღებს ყველა ზომას, რათა კიდევ უფრო გავაძლიეროთ ჩვენი ეროვნული იდენტობის ერთ-ერთი უმთავრესი ქვაკუთხედი - საქართველოს მართლმადიდებელი ეკლესია და დავიცვათ დედა-ეკლესია ნეობოლშევიკური იდეოლოგიით ნაკარნახევი თავდასხმებისგან".
9 იანვარს, Facebook-ზე სამოქალაქო აქტივისტმა ნატა ფერაძემ გაავრცელა ვიდეო, სადაც ჩანს, რომ რუსი წმინდანის, მატრონა მოსკოველის სტალინის გამოსახულებიან ხატს ლურჯი საღებავი აქვს შესხმული. ფაქტთან დაკავშირებით შსს-მ ადმინისტრაციული სამართალწარმოება დაიწყო, ქართულმა ოცნებამ კი, კანონის გამკაცრება დააანონსა.
-
მეუფე შიო: უფალს ვევედროთ, ისეთი კანონი მოქმედებდეს, ასეთი რამის გაკეთება ვერ გაბედონ
-
კალაძე რელიგიური ნაგებობების კანონზე: დროული, სწორი და მნიშვნელოვანია
10 იანვარს ნატა ფერაძის საცხოვრებელ სახლთან პუტინისტური ძალადობრივი ალტ-ინფოს წევრების მიერ ორგანიზებული აქცია გაიმართა.
11 იანვარს საპატრიარქომ გაავრცელა განცხადება, რომლის მიხედვითაც წმინდა მატრონა მოსკოველის ხატზე სტალინის ეპიზოდის შეცვლა აუცილებელია, რადგან "სტალინის შეხვედრა წმ. მატრონასთან, არასაკმარისი მტკიცებულებების გამო, არ არის შეტანილი მისი ცხოვრების კანონიკურ ტექსტში, არ არის აღიარებული რუსეთის ეკლესიის მიერ". საპატრიარქომ მიმართა შემომწირველებს, რომ ცვლილება ხატში ან თავად შეეტანათ, ან ამას ეკლესია გააკეთებდა.
17 იანვარს სამების საკათედრო ტაძრის მღვდელმსახურმა, არქიმანდრიტმა იოვანე მჭედლიშვილმა დაადასტურა, რომ ხატი ცვლილებების შესატანად სამების დაცულ სივრცეში გადაიტანეს.
19 იანვარს კი გავრცელდა ინფორმაცია, რომ მატრონა მოსკოველის ხატზე სტალინთან ერთად თავად ხატის შემწირველებიც, პატრიოტთა ალიანსის ლიდერები, დავით თარხან-მოურავი და ირმა ინაშვილიც არიან გამოსახული. ისინი გავრცელებულ ცნობას უარყოფენ.
ინფორმაცია იმის შესახებ, რომ სამების საკათედრო ტაძარში წმინდა მატრონა მოსკოველის ხატია, 6 იანვარს, სოციალურ ქსელში გავრცელდა. საკითხთან დაკავშირებით ტაბულასთან კომენტარი გააკეთა საპატრიარქოს საზოგადოებასთან ურთიერთობის სამსახურის ხელმძღვანელმა, მამა ანდრია ჯაღმაიძემ და თქვა, რომ ხატზე იოსებ სტალინის გამოსახულების თემა შობის დღესასწაულის გადასაფარად წამოწიეს.
სამების საკათედრო ტაძრის მღვდელმსახურის, არქიმანდრიტი იოვანე მჭედლიშვილის ინფორმაციით, მატრონა მოსკოველის ხატი უკვე რამდენიმე თვეა სამებაშია. საქართველოს პატრიოტთა ალიანსის ლიდერების თქმით, ის სამებისთვის მათი შეწირულია.
