უკრაინის პრეზიდენტმა, ვოლოდიმირ ზელენსკიმ ტექნოლოგიურ კომპანიებს Microsoft-ს, Oracle-ს და SAP-ს მოუწოდა რუსეთში საკუთარი პროდუქტების მხარდაჭერა შეეწყვიტათ.
"ახლა არ არის "ნახევარი" გადაწყვეტილებების და "ნახევარი ტონის" დრო. არსებობს მხოლოდ შავი და თეთრი, სიკეთე და ბოროტება. ან მშვიდობას უჭერთ მხარს ან სისხლიან რუს აგრესორის მიერ უკრაინელი ბავშვების და ქალების მოკვლას. შეწყვიტეთ თქვენი პროდუქტების მხარდაჭერა რუსეთში. შეაჩერეთ ომი." - წერს ზელენსკი და კომპანიებს მიმართავს.
მანამდე ვოლოდიმირ ზელენსკიმ მადლობა გადაუხადა Facebook-ის მფლობელ კომპანია Meta-ს უკრაინაში რუსეთის შეჭრის პარალელურად საინფორმაციო სივრცეში "ბრძოლისთვის" და უკრაინის მხარდაჭერისთვის.
- რუსეთის პროკურატურა სასამართლოს სთხოვს, META ექსტრემისტული ორგანიზაციების სიაში შეიყვანოს
- Meta რუსეთის ხელისუფლების და შეიარაღებული ძალების მიმართ ძალადობრივ მოწოდებების ნებას რთავს
რუსეთმა უკრაინაზე სრულმასშტაბიანი თავდასხმა 24 თებერვალს გამთენიისას, ერთდროულად რამდენიმე დიდი ქალაქის, მათ შორის, კიევის დაბომბვით დაიწყო.
პუტინის მიერ უკრაინისთვის ომის გამოცხადებას წინ უძღოდა დონეცკისა და ლუგანსკის თვითგამოცხადებული რესპუბლიკების მარიონეტული რეჟიმების ფორმალური თხოვნა კრემლისადმი, დახმარებოდნენ "უკრაინული აგრესიის" მოგერიებაში.
რუსეთის სამხედრო ძალები უკრაინას სხვადასხვა მიმართულებით უტევენ. პარალელურად, მსოფლიოს ქვეყნები რუსეთს სხვადასხვა სახის სანქციას უწესებენ.