Macklemore-ის კლიპში საქართველოს საპროტესტო აქციების კადრები გამოჩნდა - [Video]

ამერიკელი რეპერის, Macklemore-ის კლიპში საქართველოში მიმდინარე პრო-ევროპული საპროტესტო აქციების კადრები გამოჩნდა.

---

საქართველოში, ქვეყნის მასშტაბით საპროტესტო აქციები 2024 წლის 28 ნოემბრიდან მოყოლებული დღემდე მიმდინარეობს.

28 ნოემბერს ივანიშვილის რეჟიმმა ევროინტეგრაციის პროცესი ოფიციალურად შეაჩერა.

ევროკავშირს რუსული კანონის მიღების შემდეგ თავად ჰქონდა საქართველოს გაწევრიანების პროცესი შეჩერებული და გაწევრიანების გზაზე დასაბრუნებლად რუსული კანონების გაუქმებას მოითხოვდა. 

ივანიშვილის პრემიერმინისტრმა 2024 წლის 28 ნოემბერს თქვა, რომ აჩერებს გაწევრიანების პროცესს 2028 წლამდე. 

ამ განცხადების შემდეგ, საქართველოს მე-5 პრეზიდენტმა, სალომე ზურაბიშვილმა დიპლომატიურ კორპუსთან საგანგებო შეხვედრა დანიშნა. 

ამასთან, საქართველოს მთელ ტერიტორიაზე თვითორგანიზებული მოქალაქეების პროტესტის კერები გაჩნდა, დედაქალაქში მოქალაქეთა ნაწილი ქართული ოცნების ოფისთან შეიკრიბა. 

ოპოზიცია რეჟიმის გადაწყვეტილებას ღალატად აფასებს. 

პოლიციამ საპროტესტო აქციის მონაწილეების, მათ შორის, ჟურნალისტების წინააღმდეგ არაპროპორციული ძალა გამოიყენა. სპეცრაზმმა ძალადობრივად დაშალა დემონსტრანტები. დაშავდა არაერთი ადამიანი, მათ შორის, ჟურნალისტები. დააკავეს 43 მომიტინგე.

29 და 30 ნოემბერს, რუსთაველზე გამართული მრავალრიცხოვანი აქციებისას ივანიშვილის სპეცრაზმმა მომიტინგეები ისევ დაარბია.

ევროკავშირში გაწევრიანების შეჩერების და აქციების დარბევის ფონზე, აშშ-მ საქართველოსთან სტრატეგიული პარტნიორობა შეაჩერა და მიზეზად ქართული ოცნების არადემოკრატიული ნაბიჯები დაასახელა.