ავღანეთი

ამრულაჰ სალეჰი: მივესალმებით, თუკი თალიბანი აზრიანი საუბრისთვის იქნება მზად

ამრულაჰ სალეჰი

"მივესალმებით, თუკი თალიბანი აზრიანი საუბრისთვის იქნება მზად" – ამბობს ამრულაჰ სალეჰი, ყოფილი ვიცეპრეზიდენტი, რომელმაც რამდენიმე დღის წინ თავი ავღანეთის პრეზიდენტის მოვალეობის შემსრულებლად გამოაცხადა. ის ახლა პანჯშირის რეგიონში იმყოფება და თალიბანის წინააღმდეგ ამ დროისთვის მცირე წინააღმდეგობის ჯგუფ აჰმედ მასუდთან ერთად ხელმძღვანელობს. 

მისი თქმით, მისი ჯგუფი მზადაა მონაწილეობა მიიღოს სამშვიდობო პროცესში, რომელიც ახლა არ არსებობს. The New York Times-ის მიხედვით, ამჟამად ამ ჯგუფის ამჟამინდელი მიზანი სწორედ თალიბანთან შეთანხმების მიღწევაა. 

"ჩვენ დავკარგეთ ტერიტორია და არა ლეგიტიმურობა. მე, როგორც პრეზიდენტის მოვალეობის შემსრულებელი, ვინარჩუნებ კონსტიტუციას, თალიბანის საამირო არც ლეგიტიმური მგონია და არც ეროვნული" – ამბობს სალეჰი.

ტაჯიკეთში, ავღანეთის საელჩოში, გაქცეული პრეზიდენტის, აშრაფ ღანის ფოტო ჩამოხსნეს და მის ნაცვლად ამრულაჰ სალეჰის ფოტო დაკიდეს.


აშშ-ს ავღანეთში შეჭრიდან თითქმის 20 წლის შემდეგ, ქვეყნის ხელისუფლება კვლავ თალიბანის ხელში ჩავარდა. დაჯგუფებამ ქვეყანა ავღანეთის ისლამურ საამიროდ გამოაცხადა. მათი თქმით, ავღანეთში ომი დასრულდა.

16 აგვისტოს ქაბულის აეროპორტში არასტაბილური ვითარება იყო, როდესაც ქალაქის მცხოვრებლები ქვეყნის დატოვებას თვითმფრინავებში შეღწევით ცდილობდნენ.

დაჯგუფებამ ბოლო რამდენიმე დღის განმავლობაში ელვის სისწრაფით დაიკავა ქვეყნის მნიშვნელოვანი ქალაქები და საბოლოოდ ქაბულის შემოგარენსაც მიადგა. ქაბული დაჯგუფებას უბრძოლველად ჩაბარდა. ავღანეთის პრეზიდენტმა, აშრაფ ღანიმ ქვეყანა დატოვა, მის სასახლეში კი თალიბები შევიდნენ.

დაჯგუფებასთან ახალი მთავრობის ფორმირებისთვის მოლაპარაკებებს მართავენ ავღანეთის 2001-2014 წლებში მოქმედი პრეზიდენტი, ჰამიდ კარზაი და წინა მთავრობის წარმომადგენელი, აბდულა აბდულა.

როგორც ვარაუდობენ, თალიბანის მთავრობის მეთაური მოლა აბდულ ღანი ბარადარი იქნება.

პარალელურად, ქვეყნის ყოფილმა ვიცეპრეზიდენტმა, ამრულაჰ სალეჰმა თალიბანის წინააღმდეგობის მოძრაობის დაწყება გადაწყვიტა და პანჯშირის რეგიონში ჩავიდა. მის წინააღმდეგობას უერთდება აჰმად მასუდი, თალიბანის დაუძინებელი მტრის, აჰმად შაჰ მასუდის შვილი.

თალიბანმა და აშშ-მ შეთანხმება 2020 წლის თებერვალში, ტრამპის ადმინისტრაციის დროს გააფორმეს. შეთანხმების მიხედვით, იწყებოდა შიდაავღანური მოლაპარაკებები, აშშ-ს კი გაჰყავდა ჯარები. ჯარების გაყვანის ბოლო ვადა 2021 წლის 1-ელი მაისი იყო. მას შემდეგ, რაც აშშ-ს პრეზიდენტი ჯო ბაიდენი გახდა, მან განაგრძო ჯარების გაყვანის პროცესი. ბოლო ვადა ჯერ 11 სექტემბრამდე გადაიდო, შემდეგ კი ითქვა, რომ ავღანეთს აშშ-ს ძალები 31 აგვისტოსთვის დატოვებდნენ.

კომენტარები