ნიდერლანდების წარმომადგენელთა პალატამ ჰოლოდომორი უკრაინელი ხალხის გენოციდად აღიარა

ნიდერლანდების წარმომადგენელთა პალატამ 1932-33 წლებში მომხდარი ჰოლოდომორი უკრაინელი ხალხის გენოციდად აღიარა.

უკრაინის პრეზიდენტმა, ვოლოდიმირ ზელენსკიმ და საგარეო საქმეთა მინისტრმა, დმიტრო კულებამ ნიდერლანდებს მხარდაჭერისთვის მადლობა გადაუხადეს.

"ყველაფერს თავისი სახელი აქვს, ეს სამართლიანობის საწინდარია და ამგვარი საზარელი დანაშაულების თავიდან არიდებაში გვეხმარება". - აღნიშნა ზელენსკიმ.

კულებამ ნიდერლანდების გადაწყვეტილება შეაფასა, როგორც მნიშვნელოვანი ნაბიჯი ისტორიული ჭეშმარიტების დამტკიცებაში.

ჰოლოდომორი უკვე 20-ზე მეტ ქვეყანას აქვს აღიარებული უკრაინელი ხალხის გენოციდად.

რა იყო ჰოლოდომორი?

ჰოლოდომორი უხეშად ითარგმნება როგორც შიმშილით სიკვდილი, რომელმაც 1932-33 წლებში უკრაინაში დაახლოებით ოთხი მილიონი ადამიანი იმსხვერპლა.

1932 წლის ნოემბერში საბჭოთა ლიდერმა სტალინმა გაგზავნა პოლიცია, რათა ამოეღო მარცვლეული და პირუტყვი ახლად კოლექტივირებული უკრაინული ფერმებიდან, მათ შორის თესლი, რომელიც საჭირო იყო შემდეგი მოსავლისთვის. შედეგად, მილიონობით ადამიანი დაიღუპა.

2006 წელს უკრაინის პარლამენტმა ჰოლოდომორი უკრაინელი ხალხის წინააღმდეგ გენოციდად შეაფასა.

რუსეთი კატეგორიულად უარყოფს გენოციდს და ამბობს, რომ 1930-იანი წლების დასაწყისში საბჭოთა კავშირში დიდი შიმშილის მსხვერპლნი იყვნენ არა მხოლოდ უკრაინელები, არამედ რუსები, ყაზახები, გერმანელები და სხვები.