უკრაინული მედიის ცნობით, საქართველოს ექსპრეზიდენტის, მიხეილ სააკაშვილის მიერ უკრაინის საზღვრის გადაკვეთის ფაქტის სამსახურებრივი გამოძიების ფარგლებში, უკრაინის სამხრეთის რეგიონული მმართველობის რამდენიმე ხელმძღვანელს სამსახურეობრივი უფლებამოსილება დროებით შეუჩერეს, მანამ, სანამ გამოძიება გაგრძელდება.
ინფორმაციას ადასტურებს უკრაინის სახელმწიფო საზღვრის სამსახურის სპიკერი, ანდრეი დემჩენკო.
გამოცემა Украинская правда-მ დემჩენკოს ჰკითხა, ფიქსირდება თუ არა მონაცემთა ბაზაში მიხეილ სააკაშვილის მიერ სახელმწიფო საზღვრის კვეთა, რასაც სპიკერმა პასუხი არ გასცა და თქვა, რომ ეს ინფორმაცია კონფიდენციალურია და მისი გავრცელების უფლება არ აქვს.
დემჩენკოს თქმით, მიმდინარეობს სამსახურეობრივი გამოძიება, თუ როგორ დატოვა სააკაშვილმა უკრაინა.
აქამდე, უკრაინულმა მედიამ, Цензор.НЕТ-მა, საკუთარ მთავარ რედაქტორზე დაყრდნობით, გაავრცელა ინფორმაცია, რომ უკრაინის სახელმწიფო საზღვრის სამსახურმა სააკაშვილის ქვეყნიდან გასვლასთან დაკავშირებით სამსახურეობრივი გამოძიება დაიწყო.
4 ოქტომბერს Цензор.НЕТ-ის მთავარი რედაქტორი, იური ბუტუსოვი ამბობდა, რომ, სავარაუდოთ სააკაშვილის უკრაინიდან გასვლის ფაქტის გამო, მოვალეობიდან დროებით გაათავისუფლეს ოდესის სახელმწიფო საზღვრის დაცვის ხელმძღვანელი, მანამ სანამ გამოძიება მიმდინარეობს.
1 ოქტომბერს დილით საქართველოს მესამე პრეზიდენტმა დაწერა, რომ ის საქართველოში იმყოფება. მოგვიანებით მან ზედიზედ ორი სელფი ვიდეო გამოაქვეყნა, სადაც ამბობდა, რომ ბათუმშია. მალევე, შსს-მ გაავრცელა განცხადება, სადაც წერდა, რომ მიხეილ სააკაშვილს საქართველოს საზღვარი არ გადმოუკვეთავს. მმართველი გუნდის წევრებიც, მთელი დღის განმავლობაში აცხადებდნენ, რომ ექსპრეზიდენტს უკრაინაც კი არ დაუტოვებია.
მიხეილ სააკაშვილი თბილისში იმავე დღეს დააკავეს. ის დაკავების დღიდან შიმშილობს. პრემიერმინისტრმა ირაკლი ღარიბაშვილმა მის დაკავებას "გასაიდუმლოებული ოპერაცია", ხოლო ხელისუფლების მხრიდან ექსპრეზიდენტის საქართველოში ყოფნის უარმყოფელ განცხადებებს "ოპერატიული ტაქტიკა უწოდა".
აშშ-ის სახელმწიფო დეპარტამენტი ხელისუფლებას მოუწოდებს, უზრუნველყოს მიხეილ სააკაშვილის მიმართ სამართლიანი მოპყრობა "კანონმდებლობის, ადამიანის საერთაშორისო უფლებების და საერთაშორისო ვალდებულებების შესაბამისად". საქართველოში აშშ-ის ელჩის, კელი დეგნანის განცხადებით კი "სააკაშვილის საქმე იქნება გამოცდა ქართული სასამართლო სისტემისთვის" და პროცესს დააკვირდებიან. შვედეთის ყოფილი პრემიერმინისტრი და ევროპული ანალიტიკური ინსტიტუტის საგარეო ურთიერთობათა ევროპული საბჭოს თანათავმჯდომარე, კარლ ბილდტი წერს, რომ პოლიტიკური სასამართლო ევროპაში მიუღებელია და სააკაშვილის მიმართ ნებისმიერი ბრალდება სამართლიან სასამართლოზე უნდა იყოს განხილული.
ლიტველი ევროპარლამენტარი, რასა იუკნევიჩიენეს შეფასებით, საქართველოს პრემიერმინისტრმა, ირაკლი ღარიბაშვილმა აღიარა, რომ სააკაშვილსი წინააღმდეგ საქმე პოლიტიკურია. ევროპარლამენტარი პრემიერის განცხადებას გამოეხმაურა, რომ სააკაშვილს სხვა მუხლებსაც დაუმატებენ, თუ "წესიერად არ მოიქცევა". ქართულ ოცნებას ყოფილი პრეზიდენტის შემდგომი დევნისგან თავის შეკავებისკენ მოუწოდებს ევროპარლამენტარი პეტრას აუსტრევიჩიც - მისი შეფასებით, სააკაშვილის დაკავება ქვეყანაში პოლიტიკურ პოლარიზებას კიდევ უფრო ზრდის.
სააკაშვილის დაკავების შემდეგ უკრაინის პრეზიდენტმა, ვოლოდიმირ ზელენსკიმ თქვა, რომ უკრაინული უწყებები მიხეილ სააკაშვილის ქვეყანაში დაბრუნებისთვის იმუშავებენ - "როგორც პრეზიდენტი, ვმუშაობ მოქალაქეების დაბრუნებაზე, ეს სააკაშვილსაც ეხება".
