ივანიშვილის პარლამენტმა მიიღო კანონპროექტი, რომლის მიხედვითაც, ეკონომიკური და ფინანსური დანაშაულების ჩამდენი პირებისგან, დაზარალებულისათვის ზიანის ანაზღაურების მიზნით, მსჯავრდებულის, მისი ოჯახის წევრების და ასევე დაკავშირებული პირებისაგან მატერიალური რესურსების ამოღება მარტივდება.
3 სექტემებრს გამართულ პლენარულ სხდომაზე, სადაც კანონპროექტს მესამე მოსმენით მხარი დაუჭირეს ივანიშვილის წარმომადგებელმა, არჩილ გორდულაძემ თქვა, რომ კანონში განისაძღვრება კონკრეტული ვადა და დადგინდება, რომ რიგი ფინანსური და ეკონომიკური დანაშაულების საფუძველზე ნასამართლევ პირებს საქართველოდან გასვლა 16 წლის ვადით აეკრძალებათ.
"სისხლის სამართლის საპროცესო კოდექსში ცვლილებები მეორე მოსმენის შემდეგ განხორციელდა, რა დათქმის შესაბამისადაც პარლამენტმა საკითხს კენჭი უყარა.
კერძოდ, გაუმჯობესდა და კიდევ უფრო მეტად დაიხვეწა უფლებრივი სტანდარტი იმ პირების მიმართ, რომელთაც დაზარალებულებისთვის კომპენსაციის გადახდის ვალდებულება ეკისრებათ და რომელთა ქონების ჩამორთმევა და რეალიზაცია დაზარალებულთა კომპენსაციის სახით მოხდება.
ამ პირებს შეეძლებათ სასამართლოს მიერ მიღებული გადაწყვეტილება ქონების ჩამორთმევის თაობაზე ზუსტად ისევე გაასაჩივრონ, როგორც დღეს მოქმედი კანონმდებლობა ყადაღის დადების შემთხვევაში ითვალისწინებს.
არის კორექტირება მუხლში, რომელთაც გათვალისწინებულია ე.წ. თეთრის საყელოს დანაშაულები, რომელ დანაშაულში მხილებულ და მსჯავრდებულ პირებს ვალდებულება ექნებათ, რომ მიყენებული ზიანი ახალი წესით აანაზღაურონ - არის კორექტირება და ორ კონკრეტულ შემთხვევაში როგორც განზრახი, ასევე გაუფრთხილებელი დანაშაულისთვის მუხლების დამატება მოხდა.
გარდა ამისა, შემოთავაზებული გვქონდა პრინციპი, რომ თუ დაზარალებულების დაკმაყოფილების მიზნით ახალი რეგულაციების გამოყენება მოხდა, პირს საქართველოდან გასვლა აეკრძალებოდა, ხოლო აკრძალვის ვადა დამოკიდებული იყო ნასამართლეობის ვადაზე.
შემოთავაზებული ახალი რედაქციით, პირდაპირ მიეთითება კონკრეტული 16 წელი ანუ მაქსიმალური ვადა, რა დროითაც შესაძლებელი იქნება, რომ ქვეყნის დატოვების აკრძალვა მოხდეს". - თქვა გორდულაძემ.
კანონისპროექტში განსაზღვრულია ქვეყნიდან გასვლის აკრძალვის ვადის გზებიც:
ა) სასჯელის სახით შინაპატიმრობის ან თავისუფლების აღკვეთის შეფარდების შემთხვევაში − მისი მოხდის მომენტიდან;
ბ) პირობითი მსჯავრის გამოყენების ან არასაპატიმრო სასჯელის შეფარდების შემთხვევაში − განაჩენის გამოტანის მომენტიდან;
გ) საქართველოს სისხლის სამართლის კოდექსის 50-ე მუხლის მე-5 ნაწილით გათვალისწინებულ შემთხვევაში - მოსახდელი სასჯელის მოხდის მომენტიდან;
დ) საქართველოს სისხლის სამართლის კოდექსის 72-ე ან 73-ე მუხლით გათვალისწინებულ შემთხვევაში - შესაბამისად, პირობით ვადამდე გათავისუფლების ან სასჯელის მოუხდელი ნაწილის უფრო მსუბუქი სახის სასჯელით შეცვლის მომენტიდან.
ცნობისთვის, აღნიშნული კანონპროექტი შეეხება ისეთ დანაშაულებს, როგორიცაა ქურდობა ჩადენილი დიდი ოდენობით, ძარცვა, ყაჩაღობა, თაღლითობა, გამოძალვა, მითვისება ან გაფლანგვა, განსაკუთრებული ისტორიული, კულტურული, მეცნიერული ან ეროვნული ღირებულების მქონე ნივთის/დოკუმენტის დაუფლება მართლსაწინააღმდეგო მისაკუთრების მიზნით, ნივთის დაზიანება ან განადგურება, მომხმარებლის მოტუყება ჩადენილი დიდი ოდენობით, სამხედრო ქონების განზრახ დაზიანება ან განადგურება.
გორდულაძის განცხადებით, ქართული ოცნების ახალი კანონპროექტი თანაინვესტირების ფონდის ყოფილ ხელმძღვანელზე, გიორგი ბაჩიაშვილზეც გავრცელდება.
4 მარტს, გიორგი ბაჩიაშვილმა სოციალურ ქსელში პოსტი გამოაქვეყნა, სადაც წერდა, რომ საქართველო დატოვა. ბაჩიაშვილის თქმით, ამისთვის "სისტემაში არსებული ხვრელები და ადამიანები" გამოიყენა. მისი დახმარებისთვის შსს-მ ერთი პირი დააკავა.
ამის შემდეგ გიორგი ბაჩიაშვილს აღკვეთის ღონისძიებად შეფარდებული გირაო პატიმრობით შეუფარდეს და მასზე ძებნა გამოაცხადეს. 10 მარტს კი, თბილისის საქალაქო სასამართლოში ე.წ. ბიტკოინების საქმეზე მოსამართლე გიორგი გელაშვილმა გადაწყვეტილება გამოაცხადა და თანაინვესტირების ფონდის ყოფილ დირექტორს გიორგი ბაჩიაშვილს 11-წლიანი პატიმრობა მიუსაჯა.
გარდა ამისა, პირველ მაისს, სასამართლომ გიორგი ბაჩიაშვილს ბიძინა ივანიშვილისთვის 9000-მდე ბიტკოინის გადახდა დააკისრა.
27 მაისს გავრცელებული განცხადებით ცნობილი გახდა, რომ სახელმწიფო უსაფრთხოების სამსახურმა გიორგი ბაჩიაშვილი დააკავა.
"2025 წლის 26 მაისს განხორციელებული ანონიმური შეტყობინებით ცნობილი გახდა, რომ წითელი ხიდისა და სადახლოს შორის არსებული ე.წ. მწვანე საზღვრის მონაკვეთის მიმდებარედ გადაადგილდებოდა წითელი ცირკულარით ძებნილი და მსჯავრდებული საქართველოსა და რუსეთის ფედერაციის ორმაგი მოქალაქე გიორგი ბაჩიაშვილი." - წერდა სუს.
ბაჩიაშვილის განცხადებით, ის 24 მაისს, საზღვარგარეთიდან გაიტაცეს, 2 დღე თვალებახვეული ატარეს, შემდეგ კი, მისივე განცხადებით, ჯორჯიან ეარვეისის თვითმფრინავში ჩასვეს და საქართველოში ჩამოიყვანეს.
-
გამიტაცეს და 2 დღე თვალებახვეული მატარეს - ბაჩიაშვილის სიტყვა პროცესზე
- ანრი ოხანაშვილი იმყოფებოდა იმ ბორტზე, რომლითაც მე მომიტაცეს – ბაჩიაშვილი
ბაჩიაშვილმა 14 ივლისს განცხადება გაავრცელა, სადაც წერდა, რომ 11 ივლისს პენიტენციურ დაწესებულებაში სცემეს, რის შემდეგაც კლინიკა ვივამედში გადაიყვნეს.
ბაჩიაშვილის თქმით, ფიზიკურ ანგარიშსწორებას ქონების უკანონოდ იძულებით წართმევას და დაშინებას უკავშირებს.
ბაჩიაშვილის ცემასთან დაკავშირებით სპეციალური პენიტენციური სამსახურის განცხადებას ავრცელებს და წერს, რომ 11 ივლისს "საკანში დაფიქსირდა მსჯავრდებულთა შორის ინციდენტი, რის შედეგადაც ორმა მსჯავრდებულმა მიიღო სხვადასხვა სახის დაზიანება".
ბიძინა ივანიშვილის თანაინვესტირების ფორნდის ყოფილი ხელმძღვანელის, გიორგი ბაჩიაშვილის ციხეში ცემის შესაც ინფორმაცია თავდაპირველად 14 ივლისს, TV პირველმა გაავრცელა.
ვივამედის კლინიკური დირექტორის, ზურაბ ჩხაიძის თქმით, ბაჩიაშვილი კლინიკაში მრავლობითი დაზიანებებით შეიყვანეს.
14 ივლისს განცხადება გაავრცელა გიორგი ბაჩიაშვილმაც, რომელშიც დეტალურად აღწერს მასზე თავდასხმას, ბაჩიაშვილის თქმით, ფიზიკურ ანგარიშსწორებას ქონების უკანონოდ იძულებით წართმევას და დაშინებას უკავშირებს.
