ავღანეთი

ქაბულის აეროპორტში სროლის შედეგად ერთი ადამიანი დაიღუპა

ავღანეთში, ქაბულის აეროპორტში უშიშროების ძალებსა და უცნობ შეიარაღებულ პირებს შორის სროლის შედეგად ერთი ადამიანი დაიღუპა. ინფორმაციას გერმანიის არმია ავრცელებს.

ინციდენტში გერმანელი და ამერიკელი სამხედროები იყვნენ ჩართული. სროლის შედეგად დაცვის ავღანელი თანამშრომელი დაიღუპა, დაჭრილია კიდევ სამი ადამიანი.

ბოლო კვირის განმავლობაში ქაბულის აეროპორტში ქაოსური მდგომარეობაა. ათასობით ადამიანი ქვეყნის დატოვებას ცდილობს. Reuters-თან საუბრისას NATO-ს წარმომადგენელი ამბობს, რომ ერთი კვირის განმავლობაში აეროპორტში სულ 20 ადამიანი გარდაიცვალა.

აშშ-ს პრეზიდენტი ჯო ბაიდენი ავღანეთიდან ევაკუაციის პროცესის გახანგრძლივებას განიხილავს. ბაიდენის თქმით, აშშ-ს პრიორიტეტია, ქაბულიდან რაც შეიძლება სწრაფად გაიყვანოს პირველ რიგში აშშ-ს მოქალაქეები და განიხილება ავღანეთში აშშ-ს ძალების 31 აგვისტოს შემდეგ დატოვებაც. 31 აგვისტო ბაიდენის მიერ დაწესებული ავღანეთიდან ჯარების გაყვანის საბოლოო ვადაა.


აშშ-ს ავღანეთში შეჭრიდან თითქმის 20 წლის შემდეგ ქვეყნის ხელისუფლება კვლავ თალიბანის ხელში ჩავარდა. დაჯგუფებამ ქვეყანა ავღანეთის ისლამურ საამიროდ გამოაცხადა. მათი თქმით, ავღანეთში ომი დასრულდა.

16 აგვისტოს ქაბულის აეროპორტში არასტაბილური ვითარება იყო, როდესაც ქალაქის მცხოვრებლები ქვეყნის დატოვებას თვითმფრინავებში შეღწევით ცდილობდნენ.

დაჯგუფებამ ბოლო რამდენიმე დღის განმავლობაში ელვის სისწრაფით დაიკავა ქვეყნის მნიშვნელოვანი ქალაქები და საბოლოოდ ქაბულის შემოგარენსაც მიადგა. ქაბული დაჯგუფებას უბრძოლველად ჩაბარდა. ავღანეთის პრეზიდენტმა, აშრაფ ღანიმ ქვეყანა დატოვა, მის სასახლეში კი თალიბები შევიდნენ.

დაჯგუფებასთან ახალი მთავრობის ფორმირებისთვის მოლაპარაკებებს მართავენ ავღანეთის 2001-2014 წლებში მოქმედი პრეზიდენტი, ჰამიდ კარზაი და წინა მთავრობის წარმომადგენელი, აბდულა აბდულა.

როგორც ვარაუდობენ, თალიბანის მთავრობის მეთაური მოლა აბდულ ღანი ბარადარი იქნება.

პარალელურად, ქვეყნის ყოფილმა ვიცეპრეზიდენტმა, ამრულაჰ სალეჰმა თალიბანის წინააღმდეგობის მოძრაობის დაწყება გადაწყვიტა და პანჯშირის რეგიონში ჩავიდა. მის წინააღმდეგობას უერთდება აჰმად მასუდი, თალიბანის დაუძინებელი მტრის, აჰმად შაჰ მასუდის შვილი.

თალიბანმა და აშშ-მ შეთანხმება 2020 წლის თებერვალში, ტრამპის ადმინისტრაციის დროს გააფორმეს. შეთანხმების მიხედვით, იწყებოდა შიდაავღანური მოლაპარაკებები, აშშ-ს კი გაჰყავდა ჯარები. ჯარების გაყვანის ბოლო ვადა 2021 წლის 1-ელი მაისი იყო. მას შემდეგ, რაც აშშ-ს პრეზიდენტი ჯო ბაიდენი გახდა, მან განაგრძო ჯარების გაყვანის პროცესი. ბოლო ვადა ჯერ 11 სექტემბრამდე გადაიდო, შემდეგ კი ითქვა, რომ ავღანეთს აშშ-ს ძალები 31 აგვისტოსთვის დატოვებდნენ.

კომენტარები