ავღანეთი

NATO ავღანეთზე: უნდა შეიქმნას ინკლუზიური მთავრობა, ქალებისა და უმცირესობების ჩართულობით

NATO-ს წევრი ქვეყნების საგარეო საქმეთა მინისტრები ავღანეთში განვითარებული რთული ვითარების შესახებ ერთობლივ განცხადებას ავრცელებენ: 

ავღანეთში მომხდარი მძიმე მოვლენების გამო ღრმა შეშფოთებას გამოვთქვამთ და მოვუწოდებთ ძალადობის დაუყოვნებლივ შეწყვეტისკენ. ასევე, შეშფოთებას გამოვხატავთ ავღანეთის მასშტაბით ადამიანის უფლებების სერიოზული დარღვევების შესახებ. ჩვენ მოვუწოდებთ, რომ ნებისმიერ გარემოებაში დაცული იქნეს ადამიანის უფლებები, ჰუმანიტარული სამართალი, საერთაშორისო სამართალი, საერთაშორისო ნორმები და სტანდარტები.  

ჩვენი უშუალო ამოცანაა, შევასრულოთ ჩვენი ვალდებულებები, გავაგრძელოთ ჩვენი მოქალაქეების, პარტნიორი ქვეყნების მოქალაქეების და იმ ავღანელების უსაფრთხო ევაკუაცია, რომლებიც ჩვენ გვეხმარებოდნენ. 

ავღანეთში უფლებამოსილ პირებს მოვუწოდებთ, პატივი სცენ და ხელი შეუწყონ მათ უსაფრთხო გამგზავრებას, მათ შორის ქაბულში, ჰამიდ კარზაის საერთაშორისო აეროპორტში. 

ავღანელი ხალხი უსაფრთხო და ღირსეულ გარემოში ცხოვრებას იმსახურებს, მათ უნდა განაგრძონ იმ მნიშვნელოვანი პოლიტიკური, ეკონომიკური და სოციალური მიღწევების მშენებლობა, რომელსაც ბოლო ოცი წლის განმავლობაში მიაღწიეს.

ჩვენ ვდგავართ სამოქალაქო საზოგადოების გვერდით, რომელმაც უნდა შეძლოს თავისი მნიშვნელოვანი როლის უსაფრთხოდ შესრულება. 

ჩვენ მოვუწოდებთ ავღანეთის ყველა მხარეს, კეთილსინდისიერად იმუშაონ ინკლუზიური და წარმომადგენლობითი მთავრობის შესაქმნელად, მათ შორის ქალებისა და უმცირესობების ჯგუფების მნიშვნელოვანი მონაწილეობით. 

დღევანდელ ვითარებაში NATO-მ შეწყვიტა ავღანეთის ხელისუფლებისადმი ყოველგვარი დახმარება. ნებისმიერმა მომავალმა ავღანეთის მთავრობამ უნდა შეასრულოს საერთაშორისო ვალდებულებები: ყველა ავღანელის, განსაკუთრებით ქალების, ბავშვების და უმცირესობების უფლებების დაცვა; კანონის უზენაესობის დაცვა; დაუშვას შეუფერხებელი ჰუმანიტარული დახმარება და უზრუნველყოს, რომ ავღანეთი აღარასოდეს იქცეს ტერორისტების თავშესაფრად. 

ბოლო ოცი წლის განმავლობაში ჩვენ წარმატებით ვებრძოდით ტერორიზმს ავღანეთში. ჩვენ არ დავუშვებთ, რომ რომელიმე ტერორისტი დაგვემუქროს.

ჩვენ კვლავაც ერთგულები ვართ ტერორიზმის წინააღმდეგ შეუპოვრობითა და სოლიდარობით ბრძოლის.

პატივს მივაგებთ ყველას მიერ გაწეულ სამსახურს და გაღებულ მსხვერპლს, ვინც ბოლო ოცი წლის განმავლობაში დაუღალავად იბრძოდა ავღანეთის უკეთესი მომავლისათვის. 

ჩვენ ერთად ვიმსჯელებთ ავღანეთში NATO-ს ჩართულობის შესახებ და გამოვიტანთ საჭირო დასკვნებს.


აშშ-ს ავღანეთში შეჭრიდან თითქმის 20 წლის შემდეგ, ქვეყნის ხელისუფლება კვლავ თალიბანის ხელში ჩავარდა. დაჯგუფებამ ქვეყანა ავღანეთის ისლამურ საამიროდ გამოაცხადა. მათი თქმით, ავღანეთში ომი დასრულდა.

16 აგვისტოს ქაბულის აეროპორტში არასტაბილური ვითარება იყო, როდესაც ქალაქის მცხოვრებლები ქვეყნის დატოვებას თვითმფრინავებში შეღწევით ცდილობდნენ.

დაჯგუფებამ ბოლო რამდენიმე დღის განმავლობაში ელვის სისწრაფით დაიკავა ქვეყნის მნიშვნელოვანი ქალაქები და საბოლოოდ ქაბულის შემოგარენსაც მიადგა. ქაბული დაჯგუფებას უბრძოლველად ჩაბარდა. ავღანეთის პრეზიდენტმა, აშრაფ ღანიმ ქვეყანა დატოვა, მის სასახლეში კი თალიბები შევიდნენ.

დაჯგუფებასთან ახალი მთავრობის ფორმირებისთვის მოლაპარაკებებს მართავენ ავღანეთის 2001-2014 წლებში მოქმედი პრეზიდენტი, ჰამიდ კარზაი და წინა მთავრობის წარმომადგენელი, აბდულა აბდულა.

როგორც ვარაუდობენ, თალიბანის მთავრობის მეთაური მოლა აბდულ ღანი ბარადარი იქნება.

პარალელურად, ქვეყნის ყოფილმა ვიცეპრეზიდენტმა, ამრულაჰ სალეჰმა თალიბანის წინააღმდეგობის მოძრაობის დაწყება გადაწყვიტა და პანჯშირის რეგიონში ჩავიდა. მის წინააღმდეგობას უერთდება აჰმად მასუდი, თალიბანის დაუძინებელი მტრის, აჰმად შაჰ მასუდის შვილი.

თალიბანმა და აშშ-მ შეთანხმება 2020 წლის თებერვალში, ტრამპის ადმინისტრაციის დროს გააფორმეს. შეთანხმების მიხედვით, იწყებოდა შიდაავღანური მოლაპარაკებები, აშშ-ს კი გაჰყავდა ჯარები. ჯარების გაყვანის ბოლო ვადა 2021 წლის 1-ელი მაისი იყო. მას შემდეგ, რაც აშშ-ს პრეზიდენტი ჯო ბაიდენი გახდა, მან განაგრძო ჯარების გაყვანის პროცესი. ბოლო ვადა ჯერ 11 სექტემბრამდე გადაიდო, შემდეგ კი ითქვა, რომ ავღანეთს აშშ-ს ძალები 31 აგვისტოსთვის დატოვებდნენ.

კომენტარები