რუსეთ-უკრაინის 2022-24 წლის ომი

მანქანა, რომელშიც რუსი პროპაგანდისტი პრილეპინი იჯდა, ნიჟნი-ნოვგოროდის ოლქში ააფეთქეს

RIA NEWS

რუსული მედიის ინფორმაციით, მანქანა, რომლითაც რუსი პროპაგანდისტი, ზახარ პრილეპინი გადაადგილდებოდა, ნიჟნი-ნოვგოროდის ოლქში ააფეთქეს.

წინასწარი ინფორმაციით, ზახარ პრილეპინი მძიმედ დაშავდა, მისი მძღოლი კი ადგილზე გარდაიცვალა. 

მისი წარმომადგენლების ინფორმაციით კი პროპაგანდისტის მდგომარეობა სტაბილურია. პრილეპინი ოკუპირებული დონბასიდან მოსკოვში ბრუნდებოდა. 

პრილეპინი ცნობილი რუსი მწერალი, პროპაგანდისტია, რომელიც 2014 წლიდან მხარს უკრაინის ოკუპაციას და აქტიურად ეწევა ომის მხარდაჭერას. 

იანვარში გავრცელდა ინფორმაცია, რომ სავარაუდოდ პრილეპინმა "ეროვნულ გვარდიასთან შეთანხმება დადო" და "უკრაინაში საბრძოლველად" წავიდა. 

მანამდე, 2 აპრილს რუსი სამხედრო ბლოგერი სანქტ-პეტერბურგის ბარში მომხდარ აფეთქებას ემსხვერპლა. არსებული ინფორმაციით, მას ახალგაზრდა ქალმა გადასცა ბიუსტი, რომელიც 5 წუთის შემდეგ აფეთქდა. კაფეში რუსი ულტრანაციონალისტების შეხვედრა მიმდინარეობდა. რუსეთის მედიის ცნობით, დაშავებულია 40-მდე ადამიანი.

რუსი მაღალჩინოსნები და პროპაგანდისტები აფეთქებას უკრაინას აბრალებდნენ. უკრაინის პრეზიდენტის ადმინისტრაციის მრჩეველი, მიხაილო პოდოლიაკი კი ამბობს, რომ ეს შემთხვევა რუსეთის შიდაპოლიტიკურ დაპირისპირებასთანაა კავშირში. ამას გარდა, რუსული კერძო სამხედრო კომპანია ვაგნერის ჯგუფის დამფუძნებელმა და ოლიგარქმა, ევგენი პრიგოჟინმა თქვა, რომ, მისი აზრით, აფეთქებაში კიევი ჩართული არაა და ეს ჩაიდინა "რადიკალების" ჯგუფმა, რომელსაც არ აქვს კავშირი უკრაინის ხელისუფლებასთან. 

რუსეთის შინაგან საქმეთა სამინისტრომ დააკავა დარია ტრეპოვა, რომელიც ეჭვმიტანილია აფეთქებაში მონაწილეობაში. რუსეთის ეროვნული ანტიტერორისტული კომიტეტი თავდასხმას უკრაინის სპეცსამსახურებსა და რუსი ოპოზიციონერი ალექსეი ნავალნის მხარდამჭერებს, კერძოდ კორუფციასთან ბრძოლის ფონდის თანამშრომლებს აბრალებს. ამას გარდა რუსული სპეცსამსახურის მტკიცებით, ვლადლენ ტატარსკის აფეთქებაში უშუალოდ მონაწილე მეორე პირი უკრაინის მოქალაქე იური დენისოვია. მათივე მტკიცებით, ის უკრაინული "დივერსიულ-ტერორისტული ჯგუფის" წევრია, თუმცა არ ასახელებენ რა ჯგუფზეა საუბარი.

ამას გარდა, ტატარსკის აფეთქებაზე პასუხისმგებლობა აიღო ეროვნულმა რესპუბლიკურმა არმიამ, რომელიც აცხადებს რომ უკრაინაში მოქმედი ანტიპუტინისტური ჯგუფია. წარსულში ამ ჯგუფმა პასუხისმგებლობა პროპაგანდისტი და ე.წ. "რუსული სამყაროს" იდეოლოგის, დარია დუგინას აფეთქებაზეც აიღო, თუმცა მათი არსებობა დამოუკიდებელი წყაროებით არ დასტურდება. 

ვრცლად თუ ვინ იყო ტატარსკი და რა არის ცნობილი მისი აფეთქების შესახებ, წაიკითხეთ აქ – ვინ იყო ვლადლენ ტატარსკი, რომელიც სანქტ-პეტერბურგის კაფეში ააფეთქეს.

კომენტარები