გამოცემა Politico უკრაინის თავდაცვის მაღალჩინოსანზე დაყრდნობით იუწყება, რომ უკრაინას მოკავშირეებისგან დამატებით 20 მილიარდი დოლარის გამოყოფა სურს, რათა რუსეთზე საბრძოლო ველზე დროებითი უპირატესობა განამტკიცოს.
"ყველა ხედავს, რომ რუსეთი იწვის და ჩვენ გვინდა, რომ ის კიდევ უფრო დაიწვას, მაგრამ ამისათვის დაფინანსება გვჭირდება," - განუცხადა მაღალჩნოსანმა Politico-ს
გამოცემის ინფორმაციით, უკრაინა 20 მილიარდ დოლარს 18 ივნისს, უკრაინის თავდაცვის საკონტაქტო ჯგუფის, ასევე რამშტაინის ფორმატის, შემდეგ შეხვედრაზე მოითხოვს.
საკითხთან დაახლოებული პირების ცნობით, საკითხი უკრაინის თავდაცვის მინისტრმა მიხაილო ფედოროვმა და მთავრობის სხვა წარმომადგენლებმა ნორვეგიის, შვედეთის, გერმანიისა და კანადის წარმომადგენლებთან შეხვედრების დროს წამოჭრეს.
20 მილიარდი დოლარის მიზნის მისაღწევად მოკავშირეებს თითოეულს 2-დან 6 მილიარდ დოლარამდე სთხოვენ, განუცხადა Politico-ს მაღალჩინოსანმა და თქვა, რომ "ეს შეიძლება იყოს დახმარება ან სესხი.
უკრაინისთვის დახმარება ანკარაში ივლისში დაგეგმილ NATO-ს ლიდერების სამიტზე, რომელსაც უკრაინის პრეზიდენტი ვოლოდიმირ ზელენსკი დაესწრება, მთავარი საკითხი იქნება.
უკრაინის თავდაცვის ბიუჯეტი წლევანდელი წლისთვის 4.4 ტრილიონი გრივნაა (85 მილიარდი ევრო) და ამას დაემატება 20 მილიარდი დოლარი.
უკრაინა მშპ-ს დაახლოებით 40 პროცენტს თავდაცვაზე ხარჯავს, რაც მსოფლიოში ყველაზე მაღალი მაჩვენებელია.
უკრაინის თავდაცვის სამინისტროს ცნობით, პარტნიორმა ქვეყნებმა უკვე გამოყვეს 38 მილიარდი დოლარის სამხედრო დახმარება წელს. დამატებითი 20 მილიარდი დოლარი უკრაინას მიუახლოვდება NATO-ს გენერალური მდივნის, მარკ რუტეს მიერ დასახულ ორმხრივი დახმარების 60 მილიარდ დოლარს.
გამოცემის ინფორმაციით, თუ დამატებითი 20 მილიარდი დოლარი შემოვა, უკრაინა ამ თანხას საჰაერო თავდაცვისთვის, უკრაინის პრიორიტეტული მოთხოვნების სიის გაფართოებისთვის გამოიყენებს, რომელიც NATO-ს ეგიდით მოქმედი პროგრამაა, რომლის ფარგლებშიც მოკავშირეები უკრაინისთვის აშშ-სგან იარაღს ყიდულობენ, ასევე მეტ დრონს, საბრძოლო მასალას, ელექტრონული საბრძოლო მასალას, შორი მოქმედების შესაძლებლობებს და უკრაინული თავდაცვის კომპანიებისგან პირდაპირ შესყიდვებს შეიძენს.
კიევმა გააძლიერა დრონებისა და სარაკეტო ტექნოლოგიები და ბოლო თვეებში მრავალშრიანი კამპანია დაიწყო — დაწყებული მოკლე რადიუსის დრონებით, რომლებმაც ფრონტის ხაზი აკრძალულ ზონად აქციეს, საშუალო რადიუსის დრონებით, რომლებიც რუსეთის ლოჯისტიკურ და სატრანსპორტო ქსელებს ურტყამენ, რაც საწვავისა და მარაგების დეფიციტს ზრდის, ასევე რუსეთის სიღრმეში დრონული და სარაკეტო თავდასხმებით, რომლებიც ქარხნებს, პორტებსა და სხვა სტრატეგიულ ობიექტებს აზიანებს.
უკრაინელმა მაღალჩინოსანმა ომში დინამიკის შეცვლაში მთავარი მოკავშირეების, როგორიცაა გერმანია, ნორვეგია და ნიდერლანდები, დახმარებას მიაწერა.
უკრაინას სურს რუსეთის წინააღმდეგ იმპულსის მოპოვება განაგრძოს მანამ, სანამ მოსკოვი შანსების თავის სასარგებლოდ გადაწონვას შეძლებს.
"შესაძლებლობების ფანჯარა იხურება. რუსეთი სწრაფი და ინოვაციურია. და თუ მათ ადაპტაციის დროს მივცემთ, შესაძლოა დავკარგოთ ერთადერთი რეალური შანსი, რომ ეს ომი რეალური მოლაპარაკებებით დავასრულოთ. და თუ რუსეთი საკუთარ საშუალო რადიუსის დრონებს გამოიგონებს, ეს ჩვენთვის კატასტროფა იქნება," - განაცხადა მაღალჩინოსანმა.
