ბელარუსში უარყოფენ, რომ გასულ დღეებში მაჩულიშჩის აეროდრომზე აფეთქებები მოხდა და რუსული სადაზვერვო თვითმფრინავი А-50 დაზიანდა.
სამთავრობო არხმა ბელარუს-1-მა და ბელარუსის თავდაცვის სამინისტრომ გაავრცელეს კადრები, რომლებშიც, მათი თქმით, მაჩულიშჩის აეროდრომზე მყოფი შორ მანძილზე რადიოლოკაციური აღმოჩენის უნარის მქონე თვითმფრინავი А-50 გამართული და დაუზიანებელი ჩანს.
26 თებერვალს ტელეგრამ-არხებზე გავრცელდა ცნობა, რომ მაჩულიშჩის აეროდრომზე აფეთქებები ისმოდა და მძიმედ იყო დაზიანებული რუსული სადაზვერვო თვითმფრინავი. დადასტურების შემთხვევაში, ეს რუსეთ-უკრაინის ომის განმავლობაში ბელარუსის სამხედრო ბაზაზე მიტანილი პირველი იერიში იქნებოდა.
