ავღანეთი

თალიბანმა ადამიანის ცხედარი ქალაქ ჰერათის ცენტრალურ მოედანზე ჩამოკიდა

ადამიანები ჰერათის ცენტრალურ მოედანზე უყურებენ ამწეზე ჩამოკიდებულ ცხედარს
AP

მასალა შეიცავს მძიმე კადრების ამსახველ ფოტოებს

თალიბანმა ქალაქ ჰერათის ცენტრალურ მოედანზე ამწეზე ადამიანის ცხედარი ჩამოკიდა. ამის შესახებ თვითმხილველი The Associated Press-ს ესაუბრა. ვაზირ აჰმად სედიქის თქმით, რომელიც ცენტრალურ მოედანზე აფთიაქში მუშაობს, მოედანზე თავდაპირველად 4 ცხედარი მიიტანს და შემდეგ სამი ქალაქის სხვადასხვა ნაწილში წაიღეს 

სედექის თქმით, თალიბანმა გამოაცხადა, რომ ოთხი ადამიანი გატაცებაში იღებდა მონაწილეობას და ისინი პოლიციამ მოკლა.

თალიბანის მიერ ჰერათის პოლიციის უფროად დანიშნული ზიაულჰაქ ჯალალის ინფორმაციით, თალიბანის წევრებმა გამტაცებლებისგან მამა-შვილი გაათავისუფლებს. ჯალალის თქმით, დაპირისპირების დროს სროლისას დაიჭრა თალიბანის მებრძოლი და 1 სამოქალაქო პირი, ხოლო გამტაცებლები მოკლეს.

თალიბანის ერთ-ერთმა თანადამაარსებელმა და 1996-2001 წლებში, თალიბანის მმართველობისას ავღანეთში მკაცრი ისლამური კანონის გამტარებელმა მოლა ნურუდდინ ტურაბიმ The Associated Press-ისთვის მიცემულ ინტერვიუში თქვა, დაჯგუფება აპირებს, სიკვდილით დასჯისა და კიდურების ამპუტაციის ფორმის სასჯელები დააბრუნოს.


აშშ-ს ავღანეთში შეჭრიდან თითქმის 20 წლის შემდეგ ქვეყნის ხელისუფლება კვლავ თალიბანის ხელში ჩავარდა. დაჯგუფებამ ქვეყანა ავღანეთის ისლამურ საამიროდ გამოაცხადა. მათი თქმით, ავღანეთში ომი დასრულდა.

დაჯგუფებამ ელვის სისწრაფით დაიკავა ქვეყნის მნიშვნელოვანი ქალაქები და საბოლოოდ ქაბულის შემოგარენსაც მიადგა. ქაბული დაჯგუფებას უბრძოლველად ჩაბარდა. ავღანეთის პრეზიდენტმა, აშრაფ ღანიმ ქვეყანა დატოვა, მის სასახლეში კი თალიბები შევიდნენ.

ქვეყნის ყოფილმა ვიცეპრეზიდენტმა, ამრულაჰ სალეჰმა თალიბანის წინააღმდეგობის მოძრაობის დაწყება გადაწყვიტა და პანჯშირის რეგიონში ჩავიდა. მის წინააღმდეგობას უერთდება აჰმად მასუდი, თალიბანის დაუძინებელი მტრის, აჰმად შაჰ მასუდის შვილი. თალიბანი აცხადებს, რომ პანჯშირის ხეობა დაიკავა, თუმცა ამას უარყოფენ წინააღმდეგობის წევრები. აჰმად მასუდმა მთელ ავღანეთს ეროვნული წინააღმდეგობის დაწყებისკენ მოუწოდა.

აშშ-მ ავღანეთი შეთანხმებულ ბოლო ვადამდე, 31 აგვისტომდე დატოვა. შესაძლებელი გახდა 122 000-ზე მეტი ადამიანის ევაკუაცია.

თალიბანმა ახალი მთავრობა 7 სექტემბერს დაამტკიცა. თალიბანის მმართველობის ქვეშ, ავღანეთს მოლა ჰასან ახუნდი გაუძღვება. მისი მაოდგილე იქნება დაჯგუფების თანადამაარსებელი, მოლა აბდულ ღანი ბარადარი.

თალიბანმა და აშშ-მ შეთანხმება 2020 წლის თებერვალში, ტრამპის ადმინისტრაციის დროს გააფორმეს. შეთანხმების მიხედვით, იწყებოდა შიდაავღანური მოლაპარაკებები, აშშ-ს კი გაჰყავდა ჯარები. ჯარების გაყვანის ბოლო ვადა 2021 წლის 1-ელი მაისი იყო. მას შემდეგ, რაც აშშ-ს პრეზიდენტი ჯო ბაიდენი გახდა, მან განაგრძო ჯარების გაყვანის პროცესი. ბოლო ვადა ჯერ 11 სექტემბრამდე გადაიდო, შემდეგ კი ითქვა, რომ ავღანეთს აშშ-ს ძალები 31 აგვისტოსთვის დატოვებდნენ.

კომენტარები