NDI-ის გამოკითხვის მიხედვით, საქართველოს მოსახლეობის 93%-ს პატრიარქი ილია მეორე მოსწონს. ის ყველაზე პოპულარულ საჯარო ფიგურად რჩება. პატრიარქს რეიტინგში პრემიერმინისტრი ივანიშვილი მოჰყვება 80%-იანი მაჩვენებლით. ივანიშვილი აგვისტოში მოსახლეობის 33 %-ს მოსწონდა. კვლევის შედეგები NDI-იმ 17 დეკემბერს წარმოადგინა.
ივანიშვილის შემდეგ რეიტინგში პარლამენტის თავმჯდომარე დავით უსუფაშვილია 63%-იანი მოწონებით. აგვისტოში ის მოსახლეობის მხოლოდ 18%-ს მოსწონდა.
შემცირებულია ყოფილი პრემიერის ვანო მერაბიშვილის რეიტინგი - თუ აგვისტოში ის მოსახლეობის 62%-ს მოსწონდა, ნოემბერში ეს ციფრი ორჯერაა შემცირებული და 28%-ს შეადგენს. ერთიანი ნაციონალური მოძრაობიდან მოსახლეობას ყველაზე მეტად დავით ბაქრაძე მოსწონს. ყოფილ პარლამენტის თავმჯდომარეს 42%-იანი რეიტინგი აქვს.
ორჯერაა შემცირებული პრეზიდენტის რეიტინგიც - თუ აგვისტოში ის 63%-ს მოსწონდა, ნოემბრისთვის ეს ციფრი 29%-ამდეა შემცირებული.
NDI-ის უახლესი საზოგადოებრივი აზრის კვლევა ნოემბერში ჩატარდა. კვლევის საველე სამუშაოები, საქართველოს მასშტაბით, 14-25 ნოემბრის პერიოდში წარიმართა და წარმომადგენლობითი შერჩევის საფუძველზე 1,947 პირისპირ ინტერვიუს ეფუძნება.
NDI-ის კვლევებს აფინანსებს შვედეთის საერთაშორისო განვითარების და თანამშრომლობის სააგენტო (Sida) და ატარებს კავკასიის კვლევითი რესურსების ცენტრი (CRRC).
