ინდოეთი

ინდოეთში წყალდიდობის შედეგად, სულ მცირე, 14 ადამიანი დაიღუპა, დაკარგულია 23 ჯარისკაცი

Government of Sikkim

ინდოეთის ჩრდილო-აღმოსავლეთში მდებარე შტატ სიკიმში წყალდიდობას, სულ მცირე, 14 ადამიანი ემსხვერპლა, 26 ადამიანი დაშავდა, ხოლო 102 ამჟამად დაკარგულად ითვლება.

3-4 ოქტომბერს მოსულმა უხვმა ნალექმა ჯერ ლონაკის მყინვარული ტბის წყლის დონის ზრდა და კაშხლის დაზიანება გამოიწვია. ადიდდა მდინარე ტეესტაც, რამაც საბოლოოდ, მიმდებარე დასახლებული რაიონების დატბორვა გამოიწვია.

ოფიციალური პირების თქმით, წყალდიდობის გამო გადაადგილებისა და სხვა სახის პრობლემები მიმდებარე ტერიტორიაზე მცხოვრებ დაახლოებით 22 000 ადამიანს შეექმნა. დაზიანებულია გზები და მდინარე ტეესტაზე გადებული ხიდები, მოძრაობა შეწყვეტილია სიკიმისა და დასავლეთ ბენგალის შტატის დამაკავშირებელი ავტომაგისტრალზეც. 

დაზიანებულია ასევე მდინარის ხეობის მიმდებარე სამხედრო ბაზები და ობიექტები. Reuters-ის ინფორმაციით, დაკარგულ პირებს შორის 23 ჯარისკაცია.

უამინდობის გამო სამაშველო-სამძებრო ღონისძიებები შეფერხებებით მიმდინარეობს.

ძლიერი წვიმა რეგიონში მომავალი რამდენიმე დღის განმავლობაში შენარჩუნდება.

კომენტარები