ნიკა მელიას საქმე

მელიას საქმის პროკურორი: გონივრული მოლოდინია, რომ სასამართლო ჩვენს პოზიციას გაიზიარებს

"გვაქვს გონივრული მოლოდინი, რომ სასამართლო ჩვენს პოზიციას გაიზიარებს". - ამბობს მიხეილ სადრაძე, ენმ-ის თავმჯდომარის, ნიკა მელიას საქმის პროკურორი.   

საქართველოს პროკურატურა ნიკა მელიასთვის აღკვეთის ღონისძების შეცვლასა და მისთვის პატიმრობის შეფარდებას ითხოვს.

"ჩვენი სამართლებრივი მოთხოვნა არის დასაბუთებული, არგუმენტირებული, კანონისმიერი. შესაბამისად, გვაქვს იმის გონივრული მოლოდინი რომ სასამართლო გაიზიარებს ჩვენს პოზიციას და დააკმაყოფილებს ჩვენს სამართლებრივ მოთხოვნას. 

რაც შეეხება არგუმენტაციას  - ბრალდებულის მიერ განხორციელებული ქმედებები ძალიან დიდ კონფლიქტში მოდის კანონის დანაწესებთან, მის მიმართ გამოყენებული აღკვეთის ღონისძიების, გირაოს არგადახდა, ასევე, გირაოს პირობების არშესრულება, იმის ტირაჟირება, რომ ის არ შეასრულებს სასამართლოს გადაწყვეტილებებს, არის ფაქტობრივი მოცემულობა და სამართლებრივად არ არსებობს სხვა ალტერნატივა სისხლისსმართლებრივ სივრცეში, გარდა იმისა, რომ გამოყენებული იყოს პატიმრობა". - ამბობს მიხეილ სადრაძე. 

სასამართლო სხდომა დღეს, 17 თებერვალს, 16:00 საათზე გაიმართება. 

გუშინ, 16 თებერვალს, საქართველოს პარლამენტმა ნიკა მელიას დეპუტატის იმუნიტეტი 88 ხმით 2-ის წინააღმდეგ მოუხსნა. პროკურატურამ კი სასამართლოს მელიასთვის პატიმრობის შეფარდების შუამდგომლობით გუშინვე მიმართა.  

ვინ დაუჭირა მხარი ნიკა მელიასთვის იმუნიტეტის მოხსნას და ვინ არა - ნახეთ აქ. 

ნიკა მელია ამბობს, რომ მას ვერ დააკავებენ და, მისივე თქმით, "მონურ მორჩილებაში მყოფმა 88 ადამიანმა გაასამართლა თავისუფლების იდეა." 

პარლამენტს მელიას დაპატიმრებაზე ნებართვის არგაცემისკენ მოუწოდებდნენ სახალხო დამცველი და საერთაშორისო გამჭვირვალობა საქართველო. TI-ის განცხადების მიხედვით, "ყველაზე დიდი ოპოზიციური პარტიის თავმჯდომარის მიმართ ამგვარი შერჩევითი დევნა დიდ ზიანს მიაყენებს ქვეყნის დემოკრატიის ხარისხს და იწვევს პოლიტიკური გარემოს კიდევ უფრო მეტ პოლარიზებას". ნინო ლომჯარიას შეფასებით კი ოპოზიციონერების მიმართ პატიმრობის გამოყენება "მხოლოდ და მხოლოდ აზარალებს ქვეყნის დემოკრატიულ იმიჯს და ნდობას სახელმწიფოს დემოკრატიული ინსტიტუტების მიმართ."


საქართველოს პროკურატურამ 5 თებერვალს ნიკა მელიას გირაოს, 40 000 ლარის გადასახდელად ერთკვირიანი ვადა მისცა. ვადა ამოიწურა - მელიამ გირაო არ გადაიხადა. როგორც ის ამბობს, მას ვერ დააკავებენ, " თუ მუხთარლივით ტომარას ჩამომაცვამთ, ეგ სხვა საქმეა." 

პროკურატურამ ნიკა მელიასთვის გირაოს გაზრდის შესახებ გადაწყვეტილება მას შემდეგ მიიღო, რაც მელიამ პარლამენტთან გამართული აქციის დროს ელექტრონული სამაჯური მოიხსნა და გადააგდო. აქციაზე 2020 წლის საპარლამენტო არჩევნების შედეგებს აპროტესტებდნენ. 

20 ივნისის საქმეზე ნიკა მელიას ბრალი რამდენიმე დღეში, 25 ივნისს წარუდგინეს. მას აღკვეთის ღონისძიებად 25 000-ლარიანი გირაო შეეფარდა და საზოგადოებრივი თავშეყრის ადგილას საჯარო განცხადებების გაკეთება აეკრძალა. ნიკა მელიას ელექტრონული სამაჯური გაუკეთეს და პროკურატურის ნებართვის გარეშე საცხოვრებელი ადგილის დატოვება შეუზღუდეს.

კომენტარები