საფრანგეთის სახელმწიფო აუდიტის სამსახური აცხადებს, რომ ლუვრმა ზედმეტად ბევრი დახარჯა ახალი ხელოვნების ნიმუშების შეძენაზე და ბოლო წლების განმავლობაში არასაკმარისი თანხა გამოყო უსაფრთხოებაზე.
ქვეყნის უმთავრესი აუდიტის სამსახურის, Cour des Comptes-ის პრეზიდენტმა, პიერ მოსკოვიჩიმ 6 ნოემბერს აღნიშნა, რომ 2018 წლიდან 2024 წლამდე "მნიშვნელოვანი დაგვიანება" იყო მუზეუმის ტექნიკური ინფრასტრუქტურის განახლება-აღდგენისა და უსაფრთხოების გასაუმჯობესებლად რეკომენდებული ზომების დანერგვის კუთხით.
"მუზეუმი პრივილეგიას ანიჭებდა ხილვად და მიმზიდველ ოპერაციებს - კერძოდ, ნიმუშების შეძენასა და მუზეუმის დიზაინის შეცვლას, შენობისა და ტექნიკური ინფრასტრუქტურის, განსაკუთრებით, დაცვისა და უსაფრთხოების, მოვლისა და რემონტის ხარჯზე," თქვა მოსკოვიჩიმ.
გამოცემა Financial Times-ის ცნობით, აუდიტის სამსახურმა აღნიშნული ანგარიში ლუვრის გაძარცვამდე მოამზადა, თუმცა მასში ხაზგასმული იყო მუზეუმის რემონტის მხრივ არსებული მუდმივი დაგვიანებები.
საფრანგეთის მთავარი მუზეუმი - ლუვრი - 19 ოქტომბერს გაძარცვეს. საფრანგეთის კულტურის სამინისტროს ცნობით, ქურდების სამიზნე ლუვრის აპოლოს გალერეა იყო, სადაც საფრანგეთის სამეფო ძვირფასეულობა ინახებოდა.
მას შემდეგ საფრანგეთში ლუვრის ძარცვის საქმესთან დაკავშირებით ჯამში 7 ადამიანი დააკავეს, მათგან სამი ბრალდების გარეშე გაათავისუფლეს, ოთხს კი ბრალი ფორმალურად წარუდგინეს.
