კრემლის სპიკერი, დმიტრი პესკოვი ტრამპის განცხადებას ეხმაურება და ირწმუნება, რომ რუსეთი "ძალიან ყურადღებით ეკიდება ბირთვული გაუვრცელებლობის თემას" და "ბირთვულ რიტორიკასთან ყველა საკმაოდ ფრთხილად უნდა იყოს". პესკოვის თანახმად, რუსეთს "ასეთ პოლემიკაში შესვლა" არ სურს.
ამის შესახებ პესკოვმა ჟურნალისტებთან საუბრისას ილაპარაკა.
"ერთიანობაში, რა თქმა უნდა, ასეთ პოლემიკაში არანაირად შესვლა არ გვენდომებოდა და არ გვენდომებოდა ამის რამენაირად კომენტირება. [...] რუსეთი ძალიან ყურადღებით ეკიდება ბირთვული გაუვრცელებლობის თემას, ჩვენ ვფიქრობთ, რომ ბირთვულ რიტორიკასთან ყველა საკმაოდ ფრთხილად უნდა იყოს". - თქვა პესკოვმა.
მანამდე, აშშ-ს პრეზიდენტმა, დონალდ ტრამპმა დაწერა, რომ დმიტრი მედვედევის "ძალზე პროვოკაციული განცხადებებიდან" გამომდინარე შესაბამის რეგიონში "ორ ბირთვულ წყალქვეშა ნავს გადაადგილების ბრძანება" მისცა. მოგვიანებით მან "რუსეთთან უფრო ახლოს" ორი ბირთვული წყალქვეშა ნავის გაგზავნაზე განაცხადა.
- ტრამპი: ბირთვული წყალქვეშა ნავები უფრო ახლოს არიან რუსეთთან
- "სრულიად მზად ვართ" – ტრამპი მედვედევის პასუხად წყალქვეშა ნავების განლაგებას განმარტავს
ტრამპის თქმით, რუსეთის ეროვნული უსაფრთხოების საბჭოს თავმჯდომარის მოადგილისა და ექსპრეზიდენტის, დმიტრი მედვედევის მუქარის შემდეგ "შესაბამის რეგიონში" ორი ბირთვული წყალქვეშა ნავის განლაგების გადაწყვეტილება ხალხის უსაფრთხოებიდან გამომდინარე მიიღო.
"მუქარა გაჟღერდა და ჩვენი შეფასებით, ეს სრულად შეუფერებელი იყო. ამიტომ, ძალიან ფრთხილად უნდა ვიყო. ასე რომ, [წყალქვეშა ნავების გაგზავნის] გადაწყვეტილება ჩვენი ხალხის უსაფრთხოების საფუძველზე მივიღე. რუსეთის ყოფილმა პრეზიდენტმა მუქარა გამოთქვა და ჩვენ ჩვენს ხალხს დავიცავთ." - განუცხადა აშშ-ს პრეზიდენტმა დონალდ ტრამპმა რეპორტიორებს.
