27 ოქტომბრის საღამოს რუსეთმა ხარკოვზე მართვადი საჰაერო ბომბებით და Tornado-S ტიპის მრავალჯერადი სარაკეტო სისტემით მორიგი საჰაერო იერიში მიიტანა. თავდასხმის შედეგად დაშავდა, სულ მცირე, 21 ადამიანი, მათ შორის, 5 ბავშვი.
ამასთან დაკავშირებით ინფორმაციას ხარკოვის ოლქის გუბერნატორი ოლეგ სინეგუბოვი, უკრაინის საგანგებო სიტუაციების სახელმწიფო სამსახური, ხარკოვის მერი იგორ ტერეხოვი და ხარკოვის საოლქო პროკურატურა აქვეყნებენ.
"საღამოს და ღამით, მტერმა იერიში ხარკოვის შევჩენკოვსის, სალტოვსკის და ხოლდნოგორსკის რაიონებზე მიიტანა. ამასთან ერთად მტერმა დაარტყა ხარკოვის ოლქის ქალაქ ჩუგუევს" - წერს უკრაინის საგანგებო სიტუაციების სახელმწიფო სამსახური.
9:29 საათისთვის ხარკოვის საოლქო პროკურატურამ განმარტა, რომ სალტოვსკის რაიონში მტერმა კერძო სახლის ეზო დაბომბა, შედეგად, დაშავდა ორი მამაკაცი, 63 და 77 წლის და 76 წლის ქალი. დაზიანდა სასტუმრო და საცხოვრებელი კორპუსები.
შევჩენკოს რაიონში მტერმა კერძო სახლებსაც დაარტყა. დაშავდა 51 წლის მამაკაცი და ორი 76 წლის და 62 წლის ქალი.
გარდა ამისა, გამომძიებლებმა დაადგინეს, რომ ქალაქ ჩუგუევს თავს დაესხნენ Tornado-S ტიპის მრავალჯერადი სარაკეტო სისტემის გამოყენებით. შედეგად რვა ადამიანი დაშავდა, მათ შორის, ოთხი ბიჭი 1, 6, 10 და 12 წლის. ბავშვებს მწვავე სტრესული რეაქციის დიაგნოზი დაუსვეს. ოკუპანტებმა ასევე დააზიანეს კერძო სახლები და სამეურნეო შენობები.
