ევროპის მედიკამენტების სააგენტომ (EMA) კორონავირუსის სამკურნალოდ Pfizer-ის პირველ ანტივირუსულ აბებს, Paxlovid-ს ევროკავშირის ტერიტორიაზე გაყიდვისთვის რეკომენდაცია გაუწია.
სააგენტომ Paxlovid-ს რეკომენდაცია გაუწია COVID-19-ით ინფიცირებული ზრდასრული ადამიანებისთვის, რომლებიც არ საჭიროებენ ჟანგბადის მიწოდებას, აქვთ დაავადების გართულების და სიკვდილის მაღალი რისკი.
Paxlovid-ს ავტორიზაცია მიანიჭა ამერიკის შეერთებული შტატების საკვებისა და მედიკამენტების სააგენტომაც. Paxlovid-ი კორონავირუსის სამკურნალო პირველი ავტორიზებული ორალურად მისაღები აბია, რომელსაც ინფიცირებული მანამდე მიიღებს, სანამ ისეთ მდგომარეობამდე მივა, რომ საავადმყოფოში გადაყვანა დასჭირდეს. 12 წელს ზემოთ რისკ ჯგუფებში შემავალი ინფიცირებულები, რომლებიც მინიმუმ 40 კგ-ს იწონიან, აბების მიღებას ექიმის დანიშნულების შესაბამისად შეძლებენ.
როგორც FDA-ს განცხადებაში წერია, აბების მიღება რეკომენდებულია კორონავირუსის დიაგნოზის დასმიდან მაქსიმალურად მალე და სიმპტომების გამოვლენიდან 5 დღის განმავლობაში.
Pfizer-მა გამოაქვეყნა კვლევის შედეგები, რომლის თანახმადაც, Paxlovid-ით მკურნალობა 89%-ით ამცირებს ჰოსპიტალიზაციის ან გარდაცვალების რისკებს. FDA-მ ხაზგასმით აღნიშნა, რომ ზემოხსენებული აბები კორონავირუსის პრევენციისთვის არ არის განკუთვნილი და არ ჩაანაცვლებს ვაქცინას.