37 წლის იტალიელმა შეფ მზარეულმა ნიკოლა ჯენტილემ ჰობიტივით ცხოვრება გადაწყვიტა. მას შესაბამისად აცვია და შაირისთვის(ლიტერატურილი ჰობიტების სამშობლო) დამახასიათებელ სახლში ცხოვრობს.
ჯონ რ.რ. ტოლკინის შემოქმედების თაყვანისმცემელი იტალიურ ქალაქ კიეტაში 2 ჰექტარი მიწის მფლობელია, ამ ტერიტორიაზე ის ჰობიტების სოფლის გაშენებას გეგმავს. ჯერჯერობით შეფ მზარეული დასახლებაში მცხოვრები ერთადერთი ჰობიტია.
ჯენტილეს წამოწყებას ბეჭდების მბრძანებელში ფროდო ბეგინსის როლის შემსრულებელი ელაიჯა ვუდიც გამოეხმაურა:
"Instagram-ზე თვალს გადევნებ. ძალიან მომეწონა კოსტიუმები და დეკორაციები, რომლებიც დაამზადე. ყოჩაღ! გგულშემატკივრობ და იმედი მაქვს კიდევ უფრო განვითარდები. როდესმე შენს შაირსაც აუცილებლად ვეწვევი. ყველას ვთხოვ ჰობიტანიის მშენებლობაში ნიკოლას დაეხმაროს". – ამბობს ვუდი.
წინა თვეს ჯენტილე მეგობრებთან ერთად ბეჭდების მბრძანებელი გადაითამაშა. ჰობიტებად, ელფებად და ჯუჯებად გადაცმული საძმო, ბეჭდის გასანადგურებლად მორდორის ნაცვლად ვეზუვის ვულკანისკენ გაემართა.
ერთ-ერთ ინტერვიუში ჯენტილემ ჰობიტივით ცხოვრების შესახებ ასე ილაპარაკა:
"ზოგი მაკრიტიკებს იმის გამო, რომ რეალობას გავურბივარ. ჩემი თავგადასავალი მაქვს და ჩემს ოცნებაში ვცხოვრობ. ამ მიწის ყიდვით მე ჩამოვშორდი იმ რეალობას, რომელიც არ მომწონს და საკუთარი ხელით ვძერწავ ახალ სამყაროს".