მსოფლიო ჯანდაცვის ორგანიზაციამ (WHO) ჩინური ვაქცინის, პეკინის სინოფარმის გამოყენების ნებართვა გასცა. ამის შესახებ WHO-ს გენერალურმა დირექტორმა, ტედროს ადჰანომ გებრეიესუსმა ისაუბრა.
გადაწყვეტილება იმუნიზაციის შესახებ ექსპერტების სტრატეგიულ მრჩეველთა ჯგუფმა SAGE-მა მიიღო, რომელმაც ხელმისაწვდომი მტკიცებულებების განხილვის საფუძველზე გასცა რეკომენდაცია, რომ სინოფარმის ვაქცინა შეიძლება გამოიყენონ სრულწლოვანთათვის 18 წელს ზემოთ, ორდოზიანი გრაფიკით.
"დღეს მსოფლიო ჯანდაცვის ორგანიზაციამ გასცა პეკინის სინოფარმის Covid-19-ის საწინააღმდეგო ვაქცინის გადაუდებელი გამოყენების ნებართვა. ეს გახდა მე-6 ვაქცინა, რომელმაც მიიღო WHO-ს მხრიდან დადასტურება, როგორც უსაფრთხომ, ეფექტიანმა და ხარისხიანმა". – თქვა ტედროს ადჰანომ გებრეიესუსმა.
გებრეიესუსის თქმით, ამ გადაწყვეტილებით ფართოვდება იმ ვაქცინების სია, რომელთა შეძენაც Covax-პლატფორმას შეუძლია და ის ქვეყნებს არწმუნებს, რომ უფრო სწრაფად დაასრულონ შიდასარეგულაციო წესების შემუშავება.
ჩინური წარმოების ვაქცინა სინოფარმის 100 000 დოზა საქართველოში აპრილის დასაწყისში შემოვიდა, თუმცა, იმ პირობით, რომ აპრილის ბოლომდე ის ავტორიზაციას გაივლიდა და მხოლოდ ამის შემდეგ დაიწყებოდა სინოფარმით აცრები.
ამის მიუხედავად, ვაქცინაციის საბჭომ მიიღო გადაწყვეტილება, აღდგომის დღესასწაულების შემდეგ, 4 მაისს სინოფარმის ვაქცინა ჩაერთო ვაქცინაციის პროცესში. ჯანდაცვის მინისტრის მოადგილის განმარტებით, ამის მიზეზი 55 წლამდე ასაკის მოსახლეობაში ასტრაზენეკას ვაქცინის შეზღუდვა და რთული ეპიდვითარებაა. საქართველოს მთავრობას სინოფარმთან მოლაპარაკებები კიდევ ნახევარი მილიონი დოზა ვაქცინის მოწოდებაზე აქვს.
3 მაისს WHO-ს მიერ გამოქვეყნებულ მასალებში სინოფარმის ეფექტიანობა 78.1%-ით განისაზღვრა, რაც მრავალ ქვეყანაში ჩატარებული მე-3 ფაზის კვლევის შედეგებით დადგინდა. კვლევაში სულ 16 125 ადამიანი მონაწილეობდა.
