ჯანდაცვის მსოფლიო ორგანიზაციის სტრატეგიულმა საკონსულტაციო ექსპერტთა ჯგუფმა(SAGE) ჩინური ვაქცინის, სინოფარმის შესახებ 29 აპრილის სხდომის მასალები გამოაქვეყნა.
WHO-ს მიერ გამოქვეყნებულ მასალებში სინოფარმის ეფექტიანობა 78.1%-ით განისაზღვრა, რაც სხვადასხვა ქვეყნებში ჩატარებული მე-3 ფაზის კვლევის შედეგებით დადგინდა. შეგახსენებთ, რომ 50%-ზე მეტი ეფექტიანობა საკმარისია იმისათვის, რათა ვაქცინამ რეკომენდაცია მიიღოს.
კვლევაში სულ 16,125 ადამიანი მონაწილეობდა, კონკრეტულად ეფექტიანობის კვლევაში კი 13 765-ი. კვლევა ძირითადად ჩატარებულია 18-დან 59 წლამდე ასაკობრივ კატეგორიაში - 13,556 მონაწილე.
ამავე დოკუმენტის მიხედვით, სინოფარმის გამოყენების შემდეგ არ ვლინდება სერიოზული კლინიკური გვერდითი მოვლენები. ძირითადი გვერდითი ეფექტია თავის ტკივილი, დაღლილობა, ნანემსარი ადგილის ტკივილი.
ჩინეთის მონაცემებზე დაყრდნობით, სულ 5.9 მილიონი ადამიანიდან გვერდითი მოვლენები დაუფიქსირდა მხოლოდ 1 453-ს, აქედან 202-ს სიცხე.
ამასთან ერთად, სინოფარმით აცრისას ანაფილაქსიის არცერთი შემთხვევა არ გამოვლენილა და მხოლოდ მსუბუქი ალერგიული რეაქციები დაფიქსირდა.
ჯანდაცვის მსოფლიო ორგანიზაციამ SINOPHARM-ის ავტორიზაციასთან დაკავშირებით სხდომა 29 აპრილს გამართა, თუმცა საბოლოო პასუხი ერთი კვირით გადადო.
მეორე ჩინური ვაქცინის, სინოვაკის შესახებ დასკვნები იხილეთ აქ:
ჩინური წარმოების ვაქცინის, სინოფარმის 100 000 დოზა საქართველოში აპრილის დასაწყისში შემოვიდა, თუმცა, იმ პირობით, რომ აპრილის ბოლომდე ავტორიზაციას გაივლიდა და მხოლოდ ამის შემდეგ დაიწყებოდა სინოფარმით აცრები. ამის მიუხედავად, ვაქცინაციის საბჭომ მიიღო გადაწყვეტილება, მაისის დასაწყისში, აღდგომის დღესასწაულების შემდეგ, 4 მაისს თუნდაც არაავტორიზებული ვაქცინა ჩართოს პროცესში. ჯანდაცვის მინისტრის მოადგილის განმარტებით, ამის მიზეზი 55 წლამდე ასაკის მოსახლეობაში ასტრაზენეკას ვაქცინის შეზღუდვა და რთული ეპიდვითარებაა. საქართველოს მთავრობას სინოფარმთან მოლაპარაკებები კიდევ ნახევარი მილიონი დოზა ვაქცინის მოწოდებაზე აქვს.
