ევროკავშირის მარეგულირებელი ორგანო კომპანია Apple-ს ანტიმონოპოლიური კანონის დარღვევაში ადანაშაულებს. რეკორდულმა ჯარიმამ, შესაძლოა, კომპანიის წლიური შემოსავლის 10%-ს მიაღწიოს, რაც თითქმის 27 მილიარდი დოლარია.
კომისიის განმარტებით, Apple-ი ბოროტად იყენებდა მარკეტის დომინანტ პოზიციას და App Store-ს, რისი საშუალებითაც კონკურენტ კომპანიებსა და აპლიკაციებს არასამართლიან წესებსა და ტარიფებს უწესებდა.
კომპანიის წინააღმდეგ გამოძიება 2019 წელს დაიწყო, როცა მუსიკალური სტრიმინგ სერვისების მიმწოდებელმა კომპანია Spotify-მ Apple-ის წინააღმდეგ სარჩელი შეიტანა.
ევროკავშირის ანტიმონოპოლიური ორგანოს ვიცეპრეზიდენტის, მარგარეტ ვესტეგერის თქმით, Apple-ი ზედმეტად მაღალ ტარიფებს უწესებდა კონკურენტებს და მათ გამოწერის ფუნქციის ალტერნატიული მეთოდების შესახებ ინფორმაციის გავრცელების შესაძლებლობას უზღუდავდა.
App Store-ზე მკაცრი წესებისა და ტარიფების დაწესებით Apple-ი ხელს უშლის კონკურენტული ბაზრის განვითარებას, რითაც მომხმარებლებსა და კონკურენტ კომპანიებს აზარალებს.
ექსპერტების თქმით, გარდა რეკორდული ჯარიმისა, შესაძლოა, Apple-ს ბიზნესმოდელის შეცვლაც მოუწიოს, რაც იმაზე გაცილებით საზიანო იქნება კომპანიისთვის, ვიდრე ეს $27-მილიარდიანი ჯარიმაა.
კომისიის განმარტებით, მიღებული გადაწყვეტილება უმნიშვნელოვანესი ნაბიჯია Apple-ის ანგარიშვალდებულების გასაზრდელად და ტექნოლოგიური გიგანტების ანტიმონოპოლიური ქმედებების შესაზღუდად.
გარდა ამისა, კომპანია Epic Games-ის სარჩელზე დაყრდნობით ევროკავშირში Apple-ის წინააღმდეგ მეორე გამოძიებაც მიმდინარეობს.
რუსეთის ფედერალურმა ანტიმონოპოლიურმა სამსახურმა Apple-ი ბაზარზე დომინანტი პოზიციის ბოროტად გამოყენების გამო 12 მილიონი დოლარით დააჯარიმა.
მსოფლიო მასშტაბით Apple-ის წინააღმდეგ ათეულობით ანტიმონოპოლიური გამოძიება მიმდინარეობს. მათგან ერთ-ერთი ყველაზე მნიშვნელოვანია Facebook-ის სარჩელი.