თბილისის მერისთვის გაუგებარია, "ვინ მოიფიქრა შეურაცხმყოფელი ტოლობის ნიშნის დასმა შვილმკვდარ მამასა და საახალწლო ნაძვის ხეს შორის". კახა კალაძე რუსთაველის გამზირზე ზაზა სარალიძის მხარდამჭერ აქციას "კარვებით ვიცავთ თავისუფლებას" საგანგებო ბრიფინგით გამოეხმაურა.
"პირველ რიგში, მინდა განვაცხადო, რომ ჩემთვის, როგორც ერთი ადამიანისთვის და მთლიანად ჩვენი პოლიტიკური გუნდისთვის, ადამიანის ღირსება, მისი უფლებები და გამოხატვის თავისუფლება არის უმთავრესი ფასეულობა, რომლის დაცვის გარანტიც, ქართულ საზოგადოებასთან ერთად, მთელი ჩვენი გუნდი და პირადად მეც ვარ და ვიქნები ყოველთვის.
სრულიად წარმოუდგენელი და გაუგებარია, ვინ მოიფიქრა შეურაცხმყოფელი ტოლობის ნიშნის დასმა შვილმკვდარ მამასა და საახალწლო ნაძვის ხეს შორის. მაშინ, როცა მერიის საპასუხო წერილში, რეალურად მსგავსი ინტერპრეტაციის არავითარი საფუძველი არ არსებობს.
აღვნიშნავ, რომ გუშინდელი მოვლენებისას, რიგი მედიასაშუალებები და პოლიტიკური ოპონენტები მიზანმიმართულად ავრცელებდნენ დეზინფორმაციას, თითქოს ნაძვის ხის და საახალწლოდ დაგეგმილი ღონისძიებების გამო, მომიტინგეებს კარვების გაშლის უფლებას არ აძლევენ ნოემბრის დასაწყისში. ცხადია, ეს არის მტკნარი სიცრუე და თავად გამოხატვის პროცესის შეურაცხყოფა" - აცხადებს კალაძე და აღნიშნავს, რომ აქციის მონაწილეებს უფლება აქვთ, მშვიდობიანი პროტესტი გამოხატონ იქ, სადაც სურთ და რა ფორმითაც სურთ.
"ამის აკრძალვა ან დაშვება მერიის პრეროგატივა არასდროს ყოფილა და ეს ოპონენტებმა კარგად იციან.
კიდევ ერთხელ ვიმეორებ, ზაზა სარალიძემ წერილით მიმართა დედაქალაქის მერიას, რომ აქვს სურვილი, 31 დეკემბრამდე გააგრძელოს აქციები. მე თან მაქვს ეს წერილი და გადავწყვიტე მისი გასაჯაროება. ჩვენ კანონი გვავალდებულებს, რომ განცხადებისთვის სამი დღის ვადაში გაგვეცა პასუხი. შესაბამისად, მერიამ კანონით დადგენილი წესით აცნობა ზაზა სარალიძეს, რომ დეკემბრის თვეში, რუსთაველის გამზირზე დაგეგმილია საახალწლო ღონისძიებები.
ხაზს ვუსვამთ, რომ საუბარი იყო დეკემბრის თვეზე. აქ, წერილში პირდაპირ არის მოცემული, რომ პარლამენტის შენობის წინ 15 დეკემბერს იმართება თბილისის მთავარი ნაძვის ხის ანთების ცერემონია. საუბარია 15 დეკემბერზე. სხვა ღონისძიებები დაგეგმილია დეკემბრის ბოლო დღეებში. რადგან საუბარი იყო 15 დეკემბერზე, ყველაფერს რომ თავი დავანებოთ, თუნდაც მხოლოდ ამის გამო ვერ ექნებოდა მერიის წერილს გუშინდელ მოვლენებთან კავშირი.
თანაც, როგორც ზემოთ აღვნიშნეთ, მერიის პრეროგატივა არ არის ვინმესთვის აქციის ჩატარების უფლების მინიჭება თუ აკრძალვა, მერიას მხოლოდ რეკომენდაციის გაცემა შეუძლია ამ საკითხზე, რომელსაც ორგანიზატორი გაითვალისწინებს თავისი სურვილიდან გამომდინარე.
სამწუხაროა, რომ წინასაარჩევნო ბატალიების ფონზე ხდება ყველა თემის არასწორად ინტერპრეტაცია,პოლიტიკური პროცესების ქაოსად ინტერპრეტაცია და მითუმეტეს მძიმე მდგომარეობაში მყოფი ადამიანების ამ მიზნებისთვის გამოყენება. ჩვენდა სამარცხვინოდ, ამ ქვეყნის პოლიტიკისთვის უკვე სამწუხარო ტრადიციად იქცა მსგავსი ამორალური ქმედებები.
კიდევ ერთხელ მწუხარებას გამოვხატავ ხორავას ქუჩაზე ტრაგიკული მოვლენების გამო, სრულად ვიზიარებ ოჯახის ტკივილს და ვიდრე მე თბილისის მერი ვარ, პოლიტიკურ პარტიებს არ მივცემ უფლებას, გამოიყენონ ეს ტრაგედია საკუთარი პოლიტიკური მიზნებისთვის“, - განაცხადა კალაძემ.
შეგახსენებთ, რომ მას შემდეგ, რაც ზაზა სარალიძემ და მალხაზ მაჩალიკაშვილმა 9 ნოემბრის პრესკონფერენციაზე თქვეს, რომ თბილისის მერიამ მათ საახალწლო ღონისძიებების გამო აქციის ადგილის შეცვლა მოსთხოვა, კახა კალაძემ დამატებითი კომენტარი გააკეთა და "მარტივ გამოსავლად" კანონი დაასახელა.
"მათ კანონის შესაბამისად მომართეს მერიას. ჰქონდათ სურვილი, რომ დეკემბრის ბოლომდე გაეგრძელებინათ თავიანთი აქცია, დავარქვათ ამას, თუ თავისუფლების გამოხატვის შესაძლებლობა, ჩვენც კანონის თანახმად, განვუმარტეთ მათ და მივწერეთ, რომ შეუძლებელი იქნება ამ კონკრეტული ადგილის გამოყენება, რადგან დედაქალაქის მერია საახალწლო ღონისძიებებისთვის ემზადება, მათ აქვთ შესაძლებლობა, ქალაქში ნახონ სხვა ადგილი, სადაც არ იქნება საახალწლო ღონისძიებები, რომ ერთმანეთისთვის ხელის შეშლა არ მოხდეს. კანონი არის მარტივი გამოსავალი ყველასთვის" - ამბობდა თბილისის მერი ორი დღის წინ.
