საქართველოს ფინანსთა მინისტრმა ნოდარ ხადურმა ისრაელის ელჩთან შეხვედრის შემდეგ, ჟურნალისტებთან ვანო მერაბიშვილთან დებატებზე ისაუბრა და აღნიშნა, რომ ის ამისთვის დღესვე მზადაა.
"თუ ნაციონალურ მოძრაობას ერთი კვირა სჭირდება მოსამზადებლად, მაშინ მზად ვართ ერთ კვირაშიც მივიღოთ მონაწილეობა დებატებში. საბიუჯეტო კრიზისი ამ ეტაპზე არ არსებობს, ფინანსთა სამინისტროს ბიუჯეტი 400 მილიონი ლარია. არცერთი წუთით არ დაგვიანებულა რომელიმე გასაცემის გაცემა. შარშან იანვრის 15 დღეში მობილიზებული იყო ორჯერ ნაკლები გადასახადი, ვიდრე წელს იანვრის პირველი 15 დღის განმავლობაში. ამავდროულად, 15 იანვარს შემოსულია გაცილებით მეტი გადასახადი, ვიდრე გასული წლის იანვრის პირველი 15 დღის განმავლობაში ერთად აღებული", - აღნიშნა ნოდარ ხადურმა.
მისივე განმარტებით, დღეს საღამოს ამ თემაზე დაწვრილებით ისაუბრებს საზოგადოებრივ მაუწყებელზე დავით პაიჭაძის გადაცემაში, რომელში მონაწილეობის მისაღებადაც ვანო მერაბიშვილსაც იწვევს.
შეგახსენებთ, რომ ვანო მერაბიშვილმა ნოდარ ხადურთან ქვეყნის ბიუჯეტთან დაკავშირებულ საკითხებზე ტელედებატების გამართვის მზადყოფნა გუშინ, 15 იანვარს, გამოთქვა. ნაციონალური მოძრაობის გენერალური მდივნის განცხადებით, ის სიამოვნებით მიიღებს ფინანსთა მინისტრთან ტელედებატებში მონაწილეობას საბიუჯეტო კრიზისის საკითხებთან დაკავშირებით, რომლის შესახებაც მან გუშინდელ ბრიფინგზე ისაუბრა. ამასთან, ყოფილი პრემიერის განცხადებით, მზად არის, სხვა ნებისმიერ თემასთან დაკავშირებითაც ისაუბროს.