საგამომცემლო სახლ ”კომერსანტში” საკადრო ცვლილებები განხორციელდა, რაც გავრცელებული ცნობებით, რუსეთის სახელმწიფო დუმის არჩევნებთან დაკავშირებით გამოქვეყნებულ ბოლო პუბლიკაციებს უკავშირდება. საგამომცემლო სახლის მფლობელმა განაცხადა, რომ თანამდებობიდან გაათავისუფლა ”კომერსანტ-ჰოლდინგის” გენერალური დირექტორი ანდრეი გალიევი და ჟურნალ ”კომერსანტ-ვლასტის” მთავარი რედაქტორი მაქსიმ კოვალსკი. მიღებული გადაწყვეტილების შემდეგ თანამდებობიდან გადადგომის გადაწყვეტილება მიიღო საგამომცემლო სახლ ”კომერსანტის” გენერალურმა დირექტორმა დემიან კუდრიავცევმა, მის განცხადებას აქციონერთა საბჭო უახლოეს მომავალში განიხილავს. ”კომერსანტ-ვლასტის” ბოლო ნომრის ყდაზე გამოსახული პუტინი საარჩევნო ყუთში იყურება.
