ოპოზიციურმა ალიანსმა გამართულ ბრიფინგზე ისაუბრა დიუშენის კუნთოვანი დისტროფიის ირგვლივ განვითარებულ მოვლენებზე, სისტემურ პრობლემებსა და გამოსავლის გზაზე.
კოალიცია ცვლილებისთვის წევრმა, ექიმმა ანა ქავთარაძემ განაცხადა, რომ დიუშენის ირგვლივ მიმდინარე პროცესებმა, "ცხადყო, თუ რაოდენ მოშლილი და დეჰუმანიზებულია სახელმწიფო ინსტიტუცია", მისივე თქმით, საჭიროა კონკრეტული ქმედებები მრავალი მიმართულებით, და რომ ალიანსს აქვს ხედვა იმ პრობლემების გადასაჭრელად, რომელთა მოგვარებაც "ქართული ოცნების პირობებში შეუძლებელია."
"უკანასკნელი დღეების მანძილზე დიუშენის კუნთოვანი დიაგნოზის ირგვლივ განვითარებულმა მოვლენებმა ცხადყო, თუ რაოდენ მოშლილი და დეჰუმანიზებულია სახელმწიფო ინსტიტუცია, რომლის უმთავრეს მოვალეობასაც ჯანმრთელობასა და უსაფრთხოებაზე ზრუნვა, მითუმეტეს, ბავშვთა სიცოცხლეზე ზრუნვა უნდა წამოადგენდეს.
ბავშვთა ჯანმრთელობა არის ფუნდამენტური უფლება, ეს არ არის პრივილეგია, რომელიც საქართველოში ყოველდღიურად ირღვევა, რისი ნათელი მაგალითიცაა ჯანდაცვის სერვისების ორგანიზებულობის, მედიკამენტებზე ხელმისაწვდომობისა და მძიმე დაავადებების მართვის საკითხი, რომლის განვითარების პირობაც ქართულმა ოცნებამ არაერთხელ დადო, მაგრამ დღეს ჩვენ ვხედავთ რომ არაერთი ბავშვი, ოჯახებთან ერთად სწორედ სიცოცხლის გადასარჩენად ემიგრირებს სხვა ქვეყნებში.
ამ მაგალითზე, ძალიან ნათლად ჩანს, რომ ქვეყნის დასავლეთისგან იზოლაცია, უდრის ჩვენი ბავშვებისთვის დასავლურ მედიცინაზე და მედიკამენტებზე წვდომის შეზღუდვას. რადგან არა იმისთვის, რომ არა მხოლოდ იშვიათი, არამედ ზოგადად სხვა დიაგნოზების მქონე ბავშვების ჯანმრთელობის პრობლემები სისტემურად გადაწყდეს, საჭიროა საერთაშორისო პარტნიორობა.
ამავდროულად, რთულია ვისაუბროთ მაღალტექნოლოგიურ მედიცინაზე, მაშინ როცა unicef-ის გასული წლის დასკვნის მიხედვით, საქართველოში ბავშვების, თითქმის, მეოთხედი ფეკალიებით დაბინძურებულ წყალს სვამს, მათ შორის, ბაღებსა და სკოლებში, რასაც ადასტურენს სურსათის ეროვნული სააგენტოს უკანასკნელი მონაცემებიც.
სწორედ იმ ბაღებსა და სკოლებში, რომლის რეაბილიტაციისა და მშენებლობის თანხასაც იპარავს მიტაცებული ხელისუფლება და მიმართავს საკუთარი ჯიბეებისკენ, მაგრამ რატომღაც მკურნალობისა და დაავადების მართვისთვის საჭირო თანხას ვერ პოულობს." - თქვა ანა ქავთარაძემ.
პრესკონფერენციაზე ასევე ისაუბრა პარტია ფედერალისტების ლიდერმა თამარ ჩერგოლეიშვილმა და განაცხადა, რომ ავტორიტარულ რეჟიმს, როგორიცაა ბიძინა ივანიშვილის რეჟიმი, "ახასიათებს ყველაზე მოწყვლადების, უმწეოების ჩაგვრა"
ჩერგოლეიშვილის თქმით, რეჟიმის ცვლილება აუცილებელია იმისთვის, რომ სოციალურად დაუცველმა ბავშვებმა, იშვიათი დაავადებების მქონე ბავშვებმა იპოვონ შველა და რომ ეს ოცნების პირობებში შეუძლებელია.
"დიუშენი უბრალოდ ნათელი მაგალითია იმის, თუ რამდენად ჩაგრავს რეჟიმი ბავშვებს, მაგრამ არსებობს კიდევ სხვა შემთხვევებიც.
გამოქვეყნდა სახალხო დამცველის ანგარიში, რომლის მიხედვითაც, 2025 წელს 170 ბავშვი გახდა პედოფილიის მსხვერპლი. საქართველოში მძვინვარებს სისტემური პედოფილია, 170 შემთხვევა არის აისბერგის წვერი იმიტომ, რომ პედოფილური დანაშაული ზოგადად იმალება.
საქმე იმაშია, რომ ხელისუფლება და რეჟიმი ნაცვლად იმისა, რომ რეალურ პრობლემებს დასდევდეს დაკავებულია მშვიდობიანი დემონსტრანტების დაჭერით ტროტუარზე, მაშინ როცა, 12 წლის ბავშვის გამაუპატიურებელმა, შესაძლოა, საპროცესო შეთანხმებით დატოვოს საპატიმრო ისე, რომ ძალიან ცოტა დრო გაატაროს შიგნით.
რეალურად, ეს არის ავტოკრატიის პრობლემა, სისტემური ცვლილების გარეშე ამას ვერ მოევლება. ამის დასტურია განათლების სისტემა, სადაც ჩვენ გვყავს მასწავლებლები, რომლებიც თვითონ არიან წნეხის ქვეშ და თავიანთ საგანში კვალიფიკაცია კიარ მოეთხოვებათ, არამედ რეჟიმის ტროლობა მოეთხოვებათ.
ამის შედეგად ვიღებთ იმას, რომ 500 000 ბავშვზე მეტი იღებს უხარისხო განათლებას საჯარო სკოლებში, ამის შედეგად, ვიღებთ გაზრდილ კრიმინალს, იმიტომ რომ ეს ბავშვები თვითდამკვიდრებას ტრადიციულ კრიმინალურ სტრუქტურებში, ან ნეონაცისტურ დაჯგუფებებში ეძებენ და ვერც იშვიათი დაავადებების, ვერც პედოფილიის და ვერც ბავშვთა დანაშაულის პრობლემა ვერ მოგვარდება ამ რეჟიმის პირობებში." - განაცხადა ჩერგოლეიშვილმა.
დასასრულს ისაუბრა ევროპული საქართველოს ლიდერმა, გიგი წერეთელმა. მისი თქმით, ქვეყანაში ერთ-ერთი მთავარი და ფუნდამენტური პრობლემა არის სიღარიბე და ახსნა თუ როგორ არის ეს საკითხი "ავადობის საფუძველი."
"სიღარიბის მაჩვენებლები კვლავ არის ძალიან მაღალი 390 000-ზე მეტი ბავშვი არის რეგისტრირებული სოციალურად დაცვის ბაზაში და აქედან 270 000 იღებს შემწეობას. ეს ციფრები ნიშნავს, რომ ეს ბავშვები პრაქტიკულად სიღარიბეში ცხოვრობენ. არის მრავალგანზომილებიანი სიღარიბე, არის აბსოლუტური სიღარიბეც და ჩვენ ვხედავთ ამას, რა რთულ მდგომარეობაში არიან ოჯახები.
მაშინ როცა ფასები იზრდება, მაშინ როცა ჩვენ ვხედავთ საბიუჯეტო თანხებიდან ასეული მილიონები იფლანგება და ილექება სწორედ ოლიგარქიული სისტემის მესვეურების ჯიბეებში და ეს ყველაფერი ქმნის ძალიან მძიმე ვითარებას, ემიგრაციის თვალსაზრისით, დემოგრაფიის თვალსაზრისით იმიტომ, რომ ეს ყველაფერი ერთმანეთთან არის დაკავშირებული. სიღარიბე არის ავადობის საფუძველი, განსაკუთრებით ბავშვებში და ჩვენ გვაქვს ამის ოფიციალური სტატისტიკა, 500 000-ზე მეტმა ადამიანმა დატოვა 3 წლის განმავლობაში საქართველო, აქედან დაახლოებით 20% ბავშვები არიან.
დემოგრაფიულად ყველაზე მძიმე ვითარებაა ბოლო ათწლეულის განმავლობაში, როცა დაიბადა დაახლოებით, 38 000 ბავშვი და 10-12 წლის წინ, ეს 60 000-მდე იყო. წარმოიდგინეთ როგორი ვარდნაა და ამის საფუძველი არის სწორედ ის ვითარება, რომელიც არის ქვეყანაში მაშინ, როდესაც ევროპულ დამხარებაზე უარი ითქმება, მაშინ როდესაც ევროპასთან და დასავლეთთან იზოლაცია ხდება, არის მაღალი დონის კორუფცია და ჩვენ ვხედავთ უამრავ ასეთ მაგალითს, რა თქმა უნდა, აქ ძალიან რთულია ილაპარაკო პრობლემის მოგვარებაზე და პრობლემის მოგვარება არის ცვლილებებში.
სწორედ ამ რეჟიმის, ამ სისტემის მშვიდობიან დემონტაჟში. ამ მხრივ ყველა ადამიანს უნდა ესმოდეს, რომ მათი ინტერესია სწორედ ეს ცვლილებები, დემოგრაფიული ხელისუფლება, ყველა ადამიანი უნდა იყოს ჩართული ამ პროცესში, მათ შორის, 26 მაისის შეკრებაც უნდა იყოს მრავალრიცხოვანი, რომ ამ სისტემის ხელმძღვანელებმა კარგად გაიგონ ხალხის ხმა, რა უნდა ხალხს და რომ მხოლოდ დემოკრატიული ხელისუფლება შეძლებს ამ პრობლემების მოგვარებას და ალიანსს აქვს ძალიან სწორი ხედვა ამასთან დაკავშირებით." - განაცხადა წერეთელმა.
დიუშენის კუნთოვანი დისტროფია (DMD) იშვიათი გენეტიკური დაავადებაა, რომელიც კუნთების ატროფიით (განლევით) და სისუსტით გამოიხატება. ორგანიზაციის "ერთად ვებრძოლოთ დიუშენის კუნთოვან დისტროფიას" ცნობით, საქართველოში საქართველოში დიუშენით დაავადებული 100-მდე ბავშვია რეგისტრირებული. სათანადო მედიკამენტების და მკურნალობის არარსებობის გამო საქართველოში ყოველწლიურად ამ დაავადებით 1, 2 ან 3 ბავშვი იღუპება.
რამდენიმე თვეა, მშობლები წამლის მოთხოვნით აქციებს მართავენ. მეოთხე დღეა, ისინი ღამეებს მთავრობის კანცელარიასთან ათევენ. მიუხედავად იმისა, რომ პოლიცია არ აძლევს საშუალებას, ადმინისტრაციის წინ, სკვერში დადგან კარვები ან შეიტანონ პუფები, ისინი აპირებენ, რომ ყოველ ღამე ერთი მშობელი მაინც დარჩეს ღამის გასათევად.
ივანიშვილის ჯანდაცვის მინისტრმა, მიხეილ სარჯველაძემ, 21 აპრილს, გამართულ ბრიფინგზე განაცხადა, რომ "დიუშენის განკურნებაზე პრეტენზიის მქონე" მედიკამენტი დღეს მსოფლიოში არ არსებობს, თუმცა, მისივე თქმით, ივანიშვილის მთავრობის სხდომაზე განსახილველად გაგზავნილია ცვლილების პროექტი, რომლის შედეგადაც, დიუშენის პაციენტებსაც გაუფართოვდებათ ამბულატორიული, სტაციონარული თუ კვლევითი მომსახურება.
მოგვიანებით, სარჯველაძეს გამოეხმაურნენ მშობლები და წამლების დადებით მხარეზე ისაუბრეს.
22 აპრილს, ჯანდაცვის სამინისტრომ გააკეთა განცხადება, რომლის მიხედვითაც სპინალურ კუნთოვანი ატროფიის, დიუშენისა და ბეკერის კუნთოვანი დისტროფიის მქონე პაციენტებისთვის სერვისების ფართო სპექტრი იქნება ხელმისაწვდომი - საუბარია ამბულატორიულ, სტაციონარულ და კვლევით მომსახურებებზე.
ამ განცხადებას მშობლებმა 23 აპრილს უპასუხეს. მათი თქმით, მხოლოდ გამოკვლევები გამოსავალი არაა და წამლის შემოტანის მოთხოვნა უცვლელი რჩება.
