საქართველოს 10 უმსხვილესი სავაჭრო პარტნიორი იანვარ-მარტში – საგარეო ვაჭრობის მონაცემები

საქართველოს სტატისტიკის ეროვნული სამსახურის წინასწარი მონაცემებით, 2025 წლის იანვარ-მარტში საქართველოში საქონლით საგარეო სავაჭრო ბრუნვამ (არადეკლარირებული ვაჭრობის გარეშე) 5 618.6 მილიონი აშშ დოლარი იყო, რაც 2024 წლის შესაბამის პერიოდთან შედარებით 16.1%-ით მეტია. 

აქედან ექსპორტი 1 401.2 მილიონი აშშ დოლარი [გაიზარდა 5.7%-ით], ხოლო იმპორტი 4 217.4 მილიონი [გაიზარდა 20.1%-ით].

საქართველოს უარყოფითმა სავაჭრო ბალანსმა, 2025 წლის იანვარ-მარტში, 2 816.2 მილიონი აშშ დოლარი შეადგინა, რაც საგარეო სავაჭრო ბრუნვის 50.1%-ია.

საქსტატის მონაცემებით, 2025 წლის იანვარ-მარტში 10 უმსხვილესი საექსპორტო პარტნიორი ქვეყნის წილმა საქართველოს მთლიან ექსპორტში 78.1% შეადგინა. უმსხვილესი საექსპორტო სამეული შემდეგნაირად ჩამოყალიბდა: ყირგიზეთი (298.6 მილიონი აშშ დოლარი), ყაზახეთი (176.2 მილიონი აშშ დოლარი) და აზერბაიჯანი (140.3 მილიონი აშშ დოლარი).

 

საქართველოდან აშშ-ში ექსპორტირებული უმსხვილესი სასაქონლო ჯგუფებია: 

• მილები, მილაკები და ღრუ პროფილები, უნაკერო, შავი
• ლითონისაგან;
• საფრენი აპარატების ნაწილები;
• ყურძნის ნატურალური ღვინოები; 
• ხილისა და ბოსტნეულის წვენები;
• ფანერა დაწებებული, პანელები ხის დაფანერებული და ანალოგიური მასალები შერეული მერქნისაგან.

საქართველოდან თურქეთში ექსპორტირებული უმსხვილესი სასაქონლო ჯგუფებია:

• ტრიკოტაჟის ნაწარმი;
• ფეროშენადნობები;
• ტრიკოტაჟის კოსტუმები და კომპლექტები მამაკაცისთვის;
• სპილენძის ნარჩენები და ჯართი;
• ალუმინის ნარჩენები და ჯართი;

საქართველოდან რუსეთში ექსპორტირებული უმსხვილესი სასაქონლო ჯგუფებია:

• სპირტიანი სასმელები;
• ყურძნის ნატურალური ღვინოები;
• მინერალური და მტკნარი წყლები, შაქრის დანამატების გარეშე;
• ნაყოფი და მცენარის სხვა ნაწილები, სხვა წესით დამზადებული ან დაკონსერვებული;
• კარტოფილი, ახალი ან შეყინული;

2025 წლის იანვარ-მარტში ექსპორტში დსთ-ს ქვეყნების წილი 67.2% იყო, ევროკავშირის წევრი ქვეყნების - 13.5%, დანარჩენი ქვეყნების კი - 19.3%.

რაც შეეხება იმპორტს, 2025 წლის იანვარ-მარტში ათი უმსხვილესი საიმპორტო პარტნიორი ქვეყნის წილმა საქართველოს მთლიან იმპორტში 73.2% შეადგინა. პირველ სამეულში შედის: აშშ (654.4 მილიონი აშშ დოლარი), თურქეთი (587.3 მილიონი აშშ დოლარი) და რუსეთი (512.9 მილიონი აშშ დოლარი).

 

აშშ-დან საქართველოში იმპორტირებული უმსხვილესი სასაქონლო ჯგუფებია:

• მსუბუქი ავტომობილები (ცალი);
• სურათები, ნახატები და პასტელები, ხელით შესრულებული;
• ქანდაკებების და სტატუეტების დედნები ნებისმიერი მასალისაგან;
• თხილი და სხვა კაკალი;
• სამკურნალო საშუალებები დაუფასოებელი;

თურქეთიდან საქართველოში იმპორტირებული უმსხვილესი სასაქონლო ჯგუფებია:

• სამკურნალო საშუალებები დაფასოებული;
• მსუბუქი ავტომობილები (ცალი);
• შავი ლითონების მეტალოკონსტრუქციები და მათი ნაწილები;
• ფილები მერქან-ბურბუშელის;
• სარეცხი და საწმენდი საშუალებები;

რუსეთიდან საქართველოში იმპორტირებული უმსხვილესი სასაქონლო ჯგუფებია:

• ნავთობი და ნავთობპროდუქტები;
• ნავთობის აირები და სხვა აირისებრი ნახშირწყალბადები;
• წნელები ნახშირბადიანი ფოლადისაგან, შემდგომი დამუშავების გარეშე;
• მანქანები მასალების ისეთი პროცესებით დასამუშავებლად, რომლებშიც გამოყენებულია ტემპერატურის ცვლილება;
• ხორბალი და მესლინი;

2025 წლის იანვარ-მარტში იმპორტში ევროკავშირის წევრი ქვეყნების წილი 22.8% იყო, დსთ-სი - 20.4%, დანარჩენი ქვეყნების კი - 56.8%.

სტატისტიკის ეროვნული სამსახურის მონაცემებითვე, 2025 წლის იანვარ-მარტში 10 უმსხვილესი სავაჭრო პარტნიორი ქვეყნის წილმა საქართველოს მთლიან საგარეო სავაჭრო ბრუნვაში 70% შეადგინა. ქვეყნის უმსხვილესი სავაჭრო პარტნიორები არიან: აშშ (669.2 მილიონი აშშ დოლარი), თურქეთი (663.3 მილიონი აშშ დოლარი) და რუსეთი (642.8 მილიონი აშშ დოლარი).

2025 წლის იანვარ-მარტში სასაქონლო ჯგუფებიდან საექსპორტო ათეულში პირველი ადგილი მსუბუქმა ავტომობილებმა დაიკავა 500.7 მილიონი აშშ დოლარით, რაც მთელი ექსპორტის 35.7%-ია. მეორე ადგილს იკავებს სპირტიანი სასმელები 54.7 მილიონი აშშ დოლარით (მთლიანი ექსპორტის 3.9%), ხოლო მესამე ადგილზეა ძვირფასი ლითონების მადნები და კონცენტრატები 53 მილიონი აშშ დოლარით (3.8%).

რაც შეეხება იმპორტს, საქსტატის მიერ გამოქვეყნებული მონაცემების თანახმად, 2025 წლის იანვარ-მარტში უმსხვილესი საიმპორტო სასაქონლო ჯგუფი მსუბუქი ავტომობილები იყო, რომლის იმპორტმა 622.2 მილიონი აშშ დოლარი და მთელი იმპორტის 14.8% შეადგინა. მეორე ადგილს იკავებს სურათები, ნახატები და პასტელების (ხელით შესრულებული) 481.1 მილიონი აშშ დოლარით (იმპორტის 11.4%), ხოლო მესამე ადგილზეა ნავთობი და ნავთობპროდუქტები 301.5 მილიონი აშშ დოლარით (იმპორტის 7.1%).