მალიარი რუსეთზე: რა სახელმწიფოც არ უნდა ააშენონ, ბოლოს მაინც გულაგი გამოდის, რომელიც იშლება

უკრაინის თავდაცვის მინისტრის მოადგილე, ანა მალიარი ეხმაურება ევგენი პრიგოჟინის მიერ რუსეთში ფაქტობრივი სამხედრო გადატრიალების წამოწყებას და აღნიშნავს, რომ რუსეთის იმპერიული კამპანია ვერ ფარავს სახელმწიფოში არსებულ შიდა პრობლემებს

"რა სახელმწიფოც არ უნდა ააშენონ, ბოლოს მაინც "გულაგი" გამოდის, რომელიც ადრე თუ გვიან აჯანყდება და იშლება. მათი ყველა გადაწყვეტილება სიცრუეს ეფუძნება. ისინი  ყოველთვის აშენებდნენ მეფისთვის "სასახლეებს ჰაერში" და შემდეგ ამის თავადაც სჯეროდათ. ეს იმპერიული თვისებაა - საკუთარი სიდიადის გაზვიადება და საკუთარ თავზე გადაჭარბებული წარმოდგენა. ამან აიძულა ისინი სრულიად არაადეკვატური გადაწყვეტილების მიეღოთ - წამოეწყოთ ომი უკრაინასთან საკუთარი შესაძლებლობების სისტემური ჭეშმარიტი გათვლების გარეშე". - თქვა ანა მალიარმა. 

ამასთანავე, ანა მალიარმა დასძინა, რომ ის, რაც ახლა ცენტრალურ რუსეთში ხდება, უკრაინისთვის "შესაძლებლობის ფანჯარაა", მაგრამ მისივე თქმით, სიტუაციას ფრთხილად შეფასება სჭირდება.

23 ივნისს პრიგოჟინმა თქვა, რომ ვაგნერის ბანაკებზე რუსეთის თავდაცვის სამინისტრომ სარაკეტო იერიში მიიტანა და საპასუხო მოქმედებებისთვის ემზადებოდნენ. ამის შემდეგ, მან განაცხადა, რომ საზღვარი გადაკვეთეს და როსტოვში შედიოდნენ. ის ასევე ირწმუნებოდა, რომ თავდაცვის სამინისტრომ თვითმფრინავებით ვაგნერის კოლონებზე დარტყმის ბრძანება გასცეს, რაზეც პილოტებმა უარი თქვეს.

"პუტინს ატყუებენ, ომი ოლიგარქებს სურდათ, უკან ვიხევთ" – რაზე საუბრობდა პრიგოჟინი არეულობის დაწყებამდე რამდენიმე საათით ადრე

"ხელს ვუშლით საკუთარი ტრა*ი გადაარჩინონ დამნაშავეებმა, რომლებმაც 100 000-მდე რუსი ჯარისკაცი გაანადგურეს, [ვალერი] გერასიმოვსა და [სერგეი] შოიგუს". – თქვა ევგენი პრიგოჟინმა.

პრიგოჟინის თქმით, თავდაცვის მინისტრი სერგეი შოიგუ სპეციალურად ჩავიდა როსტოვში, რათა კსკ ვაგნერის განადგურების ოპერაცია ჩაეტარებინა. მისივე მტკიცებით, მინისტრი ქალაქიდან გაიქცა. პრიგოჟინის თქმით, მისი მოქმედებები არა სამხედრო გადატრიალება, არამედ "სამართლიანობის მარშია".

პრიგოჟინი ყველაფრის განადგურებით იმუქრება. ამ დრომდე, მისი მტკიცებით, 3 ვერტმფრენი ჩამოაგდეს, მათ შორის ერთ-ერთი მოსკოვის ტრასაზე.

ამჟამად არსებული ინფორმაციით, ვაგნერის ძალები აკონტროლებენ დონის როსტოვისა და ვორონეჟის ადმინისტრაციულ შენობებს.

მაისში ბახმუტის აღების შემდეგ, ევგენი პრიგოჟინმა საკუთარი ძალები ზურგში, ბანაკებში გადაიყვანა და თქვა, რომ მაშინ დაბრუნდებოდნენ, როცა "სამშობლოს დასჭირდებოდნენ". უკვე რამდენიმე თვეა, რაც ვაგნერსა და რუსეთის თავდაცვის სამინისტროს შორის დაძაბული ვითარებაა. პრიგოჟინი ხშირად ლანძღავდა თავდაცვის მინისტრ სერგეი შოიგუსა და გენშტაბის მეთაურს, ვალერი გერასიმოვს. ის ირწმუნებოდა, რომ თავდაცვის უწყებას ვაგნერის განადგურება სურდა და ეს ჯერ კიდევ 2018 წელს, სირიაშიც კი სცადეს, როცა კერძო სამხედრო კომპანია ამერიკულ ძალებს დაუპირისპირდა და ბევრი მებრძოლი დაკარგა.