დაძაბულობა უკრაინის საზღვრებთან

შოლცი: რუსეთის შემდგომ სამხედრო აგრესიას შედეგები მოჰყვება, ამაზე მოსკოვშიც ვისაუბრებ

ოლაფ შოლცი და ვოლოდიმირ ზელენსკი

გერმანიის კანცლერმა ოლაფ შოლცმა კიევში პრეზიდენტ ზელენსკისთან შეხვედრის შემდეგ გამართულ პრესკონფერენციაზე აღნიშნა, რომ რუსეთის შემდგომ აგრესიას ეკონომიკური და პოლიტიკური შედეგები მოჰყვება.

"უკრაინის სუვერენიტეტი და ტერიტორიული მთლიანობა გერმანიისთვის ვერ იქნება მოლაპარაკებების თემა. გერმანიის მთავრობისთვის ნათელია, რომ შემდგომი სამხედრო აგრესია გამოიწვევს პოლიტიკურ და ეკონომიკურ შედეგებს რუსეთისთვის. ამას ხვალ მოსკოვშიც აღვნიშნავ." - თქვა შოლცმა.

კანცლერის თქმით, ის რუსეთისგან ელის სერიოზული ძალისხმევა ჩადოს უკრაინასთან დაძაბულობის დეესკალაციაში. მისივე თქმით, დასავლეთი მზად არის უსაფრთხოების საკითხებზე სერიოზული დიალოგისთვის.

"ჩვენ შეშფოთებულები ვართ უკრაინა-რუსეთის საზღვარზე მდგომარეობით. რუსეთის ფედერაციის სამხედრო აქტივობა გაუმართლებელია, არ არსებობს ლოგიკური მიზეზები სამხედრო პოტენციალის გაზრდისთვის. უსაფრთხოების გარანტიები ჩვენი მოლაპარაკებების ცენტრალური თემა იყო" - თქვა კანცლერმა.

ოლაფ შოლცმა ასევე აღნიშნა, გერმანია წლების განმავლობაში მხარს უჭერს, ბოლო 8 წლის განმავლობაში გერმანია ყველაზე მეტად დაეხმარა უკრაინას ფინანსურად. კანცლერის თქმით, გერმანია უკრაინას 150 მილიონი ევროს ოდენობის კრედიტს გამოუყოფს. კიევში ვიზიტის შემდეგ ოლაფ შოლცი რუსეთში გაემგზავრება.


11 თებერვალს აშშ-მ გამოაცხადა, რომ რუსეთი უკრაინაში შესაძლოა ნებისმიერ წამს შეიჭრას, აქამდე კი პრეზიდენტმა, ჯო ბაიდენმა აშშ-ს მოქალაქეებს უკრაინის დატოვებისკენ მოუწოდა და აღნიშნა, რომ მოქალაქეების ევაკუაციისთვის ამერიკა იქ სამხედროებს არცერთ შემთხვევაში გაგზავნის.

ზოგიერთ მედიაში ანონიმური წყაროები საუბრობენ, რომ რუსეთი უკრაინაში შესაძლოა ზამთრის ოლიმპიური თამაშების დასრულებამდე, კონკრეტულად 16 თებერვალს შეიჭრას.

აშშ, დიდი ბრიტანეთი და ევროპის ზოგიერთი ქვეყანა საკუთარ მოქალაქეებს უკრაინის დატოვებისკენ მოუწოდებენ. რუსული მედიის ინფორმაციით, უკრაინის დატოვება დაიწყეს რუსმა დიპლომატებმაც. ქვეყანას ტოვებენ ისრაელის დიპლომატიური კორპუსის წარმომადგენლების ოჯახის წევრებიც.

დაძაბულობის ფონზე, ბელარუსში რუსეთი-ბელარუსის ერთობლივი სამხედრო წვრთნები ტარდება. ამ მანევრების პასუხად, უკრაინა საკუთარი შეიარაღებული ძალების ვარჯიშებს ატარებს.

დაძაბული ვითარების ფონზე NATO-ს აღმოსავლეთ ფლანგის გამტკიცებისთვის ევროპაში აშშ-ს დამატებმა სამხედრო ძალებმა უკვე დაიწყეს ჩასვლა. აშშ-ს პრეზიდენტ ჯო ბაიდენის თქმით, პოლონეთსა და რუმინეთში 3 000-მდე ჯარისკაცი განთავსდება. დასავლურ მედიის მიხედვით, რუსეთი უკრაინაში შეჭრისთვის 70%-იც მზად არის. გავრცელებული ინფორმაციით, რუსეთი შეჭრის წინაპირობის შესაქმნელად აღმოსავლეთ უკრაინაში ოპერაციას ამზადებს.

2021 წლის 11 დეკემბერს რუსეთის საგარეო საქმეთა სამინისტრომ NATO-ს სთხოვა, რომ გააუქმოს 2008 წლის ბუქარესტის სამიტზე დადებული პირობა, საქართველოსა და უკრაინის ჩრდილოატლანტიკურ ალიანსში გაწევრიანებასთან დაკავშირებით.

რუსეთის მოთხოვნის საპასუხოდ NATO-ს გენერალური მდივანმა, იენს სტოლტენბერგმა თქვა, რომ ყველა ქვეყანას აქვს უფლება, აირჩიოს საკუთარი გზა, მათ შორის, თუ რა სახის უსაფრთხოების შეთანხმების მონაწილე სურს, რომ იყოს. მისივე შეფასებით, მიუღებელია, რომ რუსეთი ცდილობს, გავლენის სფეროების სისტემა აღადგინოს. 

მოგვიანებით 17 დეკემბერს რუსეთის საგარეო საქმეთა სამინისტრომ გამოაქვეყნა აშშ-სთან და NATO-სთან უსაფრთხოების გარანტიებზე მოლაპარაკების პროექტი. რუსეთი ჩრდილოატლანტიკურ ალიანსსა და აშშ-ს, ფაქტობრივად, ჯარებისა და შეიარაღების 1997 წლის მაისის განლაგებაზე დაბრუნებას სთხოვს, ანუ იმ დროინდელ პოზიციებზე დაბრუნებას სანამ აღმოსავლეთ ევროპის ქვეყნებს NATO-ში მიიღებდნენ. ასევე, მოსკოვი კიდევ ერთხელ ითხოვს ალიანსის გაფართოების შეჩერებასა და მასში უკრაინის გაწევრიანების დაუშვებლობას უსვამს ხაზს. პროექტის მიხედვით, NATO-მ უნდა შეაჩეროს სამხედრო საქმიანობა უკრაინაში, აღმოსავლეთ ევროპაში, კავკასიასა და ცენტრალურ აზიაში.

იანვრის პირველ ნახევარში დასავლეთსა და რუსეთს შორის გამართული დიპლომატიური შეხვედრები უშედეგოდ დასრულდა.

ვრცლად უკრაინის საზღვრებთან არსებული დაძაბულობისა და ომის შესაძლებლობის შესახებ წაიკითხეთ აქ – უკრაინა ახალი ომის მოლოდინში – დასავლეთს ძილის დრო არ აქვს.

კომენტარები