"ქართულ ოცნებას აქვს არჩევანი, დაპირისპირება ან შეთანხმება და თანამშრომლობა". – ამბობს სტრატეგია აღმაშენებლის ლიდერი, გიორგი ვაშაძე პარტიაში გამართულ ბრიფინგზე.
"მთელი ცივილიზებული სამყარო, აშშ, ევროკავშირი, ყველა ჩვენი მხარდამჭერი ქვეყანა მოუწოდებს ქართულ ოცნებას, ხელი აიღოს მართლმსაჯულების პოლიტიკური მიზნებით გამოყენებისთვის, დაუჯდეს მოლაპარაკებების მაგიდას და დავიწყოთ შეთანხმებისთვის მზადება".
გიორგი ვაშაძის თქმით, სრულიად ოპოზიციური სპექტრი მზადაა, ქართულ ოცნებასთან გამართოს მოლაპარაკებები და მიაღწიონ შეთანხმებას. მისივე განმარტებით, მოლაპარაკებები უნდა შეეხებოდეს ოპოზიციის მიერ მოთხოვნილ ოთხივე საკითხს: პირველ რიგში, სამართლებრივად უნდა გადაწყდეს ნიკა მელიას დაკავების საკითხი, ასევე გათავისუფლდეს უკანონო პატიმრობისგან გიორგი რურუა, დაიწყოს საარჩევნო რეფორმა, "როგორც ეს იყო მოლაპარაკებების მაგიდაზე" და მთავარი – "შევთანხმდეთ რიგგარეშე არჩევნების თარიღზე".
"ეს არის ერთადერთი გზა, რომელიც სრულ ნორმალიზებას მოახდენს ქვეყანაში არსებული უმძიმესი პოლიტიკურ-ეკონომიკურ-სოციალური კრიზისის". – ამბობს გიორგი ვაშაძე.
16 თებერვალს, პროკურატურის მიმართვის შემდეგ, საქართველოს პარლამენტმა ნიკა მელიას დეპუტატის იმუნიტეტი მოუხსნა.
მანამდე, საქართველოს პროკურატურამ 5 თებერვალს ნიკა მელიას გირაოს, 40 000 ლარის გადასახდელად ერთკვირიანი ვადა მისცა. ვადა ამოიწურა - მელიამ გირაო არ გადაიხადა. როგორც მელია ამბობს, მას ვერ დააკავებენ, " თუ მუხთარლივით ტომარას ჩამომაცვამთ, ეგ სხვა საქმეა."
პროკურატურამ ნიკა მელიასთვის გირაოს გაზრდის შესახებ გადაწყვეტილება მას შემდეგ მიიღო, რაც მელიამ პარლამენტთან გამართული აქციის დროს ელექტრონული სამაჯური მოიხსნა და გადააგდო. აქციაზე 2020 წლის საპარლამენტო არჩევნების შედეგებს აპროტესტებდნენ.
20 ივნისის საქმეზე ნიკა მელიას ბრალი რამდენიმე დღეში, 25 ივნისს წარუდგინეს. მას აღკვეთის ღონისძიებად 25 000-ლარიანი გირაო შეეფარდა და საზოგადოებრივი თავშეყრის ადგილას საჯარო განცხადებების გაკეთება აეკრძალა. ნიკა მელიას ელექტრონული სამაჯური გაუკეთეს და პროკურატურის ნებართვის გარეშე საცხოვრებელი ადგილის დატოვება შეუზღუდეს.
საქალაქო სასამართლოს 17 თებერვლის გადაწყვეტილებით, ნიკა მელიას აღკვეთის ღონისძიების სახით პატიმრობა შეეფარდა, რის შემდეგაც, ენმ-ს ოფისში ოპოზიციური პარტიების ლიდერები შეიკრიბნენ. ისინი ამბობდნენ, რომ არ გაატანდნენ ნიკა მელიას პოლიციას და მას ფიზიკურად დაიცავენ.
მას შემდეგ, რაც ენმ-ს ოფისში მთელი ღამის განმავლობაში ელოდნენ აღსრულების სამსახურის გამოჩენას, 18 თებერვალს დილით პრემიერმინისტრმა გიორგი გახარიამ თქვა, რომ თანამდებობას ტოვებს. გახარიას თქმით, ნიკა მელიას დაპატიმრებასთან დაკავშირებით გუნდთან ერთობლივ შეთანხმებას ვერ მიაღწია.
გახარიას გადადგომის შემდეგ განცხადება გამოაქვეყნა შინაგან საქმეთა სამინისტრომ. უწყების ცნობით, პრემიერმინისტრის მიერ მიღებული გადაწყვეტილების გამო მელიას დაკავება გადადეს.
18 თებერვალს შუადღით ქართულმა ოცნებამ პრემიერობის კანდიდატად პოლიტიკური მდივანი, ასევე თავდაცვის და შს ყოფილი მინისტრი ირაკლი ღარიბაშვილი წარადგინა. ის ერთხელ უკვე იყო ბიძინა ივანიშვილის მთავრობის მეთაური – 2013 წლიდან 2015 წლის დეკემბრამდე.
