არასამთავრობო ორგანიზაციები საერთო განცხადებას ავრცელებენ და შეშფოთებას გამოხატავენ ხელისუფლების მიერ გაცხადებულ ინიციატივასთან დაკავშირებით, რომელიც მიზნად ისახავს ოპოზიციური პარტიებისთვის სანქციების დაწესებას მათ მიერ გამოხატული პროტესტის გამო, რაც ოპოზიციონერი დეპუტატების მიერ საკუთარ მანდატებზე უარის თქმაში გამოიხატა.
"ქვეყანაში დგას მწვავე პოლიტიკური კრიზისი, რომელიც 2020 წლის საპარლამენტო არჩევნებს მოჰყვა, არჩევნებს, რომელსაც თითქმის პროპორციულ სისტემაზე გადასვლის შემდეგ საზოგადოების მნიშვნელოვანი ნაწილი იმედის თვალით უყურებდა და რომელიც მნიშვნელოვანი დარღვევების ფონზე გაიმართა, ხოლო არასამთავრობო ორგანიზაციების მიერ შეფასდა როგორც ქართული ოცნების ხელისუფლების პირობებში ჩატარებულ არჩევნებს შორის ყველაზე ნაკლებ დემოკრატიული და თავისუფალი. არჩევნების შედეგების გადათვლის მოთხოვნით სადამკვირვებლო მისიებმა ჯერ საოლქო საარჩევნო კომისიებს, შემდეგ კი სასამართლოებს მიმართეს, მაგრამ უშედეგოდ – მოთხოვნების უმრავლესობა უსაფუძვლოდ არ დაკმაყოფილდა. შედეგად, საზოგადოებაში გამყარდა არჩევნების გაყალბების ეჭვი, რაც უკიდურესად ამცირებს არჩეული პარლამენტის ლეგიტიმაციას". – ნათქვამია განცხადებაში.
ორგანიზაციები აღნიშნავენ, რომ ფასილიტატორი ელჩების შუამავლობით მთავრობასა და ოპოზიციურ პარტიებს შორის წარმოებულ მოლაპარაკებებს, სამწუხაროდ, ჯერ კიდევ არ მოჰყოლია მხარეთა შეთანხმება ყველა მნიშვნელოვან საკითხზე. აგრეთვე, ოპოზიციური პარტიების უმრავლესობა მათი მოთხოვნების დაკმაყოფილებამდე კატეგორიულ უარს აცხადებს პარლამენტში შესვლაზე, რასაც მათ მიერ მანდატების გაუქმების და პარტიული სიების გამოთხოვის შესახებ მემორანდუმზე ხელის მოწერაც ადასტურებს. ამის ფონზე, 11 დეკემბერს, მე-10 მოწვევის პარლამენტის პირველ სხდომა ერთპარტიულად გაიმართა.
"ცხადია, რომ საქართველო იმყოფება ფართომასშტაბიან და მრავალმხრივ კრიზისულ სიტუაციაში, რომელზეც პასუხისმგებლობა პირველ რიგში საქართველოს ხელისუფლებას ეკისრება. აღნიშნული ვითარების ფონზე, მაშინ, როდესაც ხელისუფლების ყველა შტო მაქსიმალურად უნდა ცდილობდეს ქვეყნის ჩიხიდან გამოყვანას და გამოსავლის ძიებას, განსაკუთრებით შემაშფოთებელია მმართველი პარტიის წარმომადგენლების განცხადებები ოპოზიციური პარტიებისთვის საქმიანობის შეზღუდვასთან დაკავშირებით და ამ მიზნით კანონპროექტების ინიცირება, რაც მათ შორის დაკავშირებულია მათთვის საბიუჯეტო დაფინანსებისა და მომდევნო არჩევნებისთვის უფასო საეთერო დროის გაუქმებასთან (შეზღუდვასთან).
მსგავსი განცხადებები კიდევ ერთხელ მიუთითებს იმაზე, რომ ხელისუფლება სათანადოდ ვერ აცნობიერებს საკუთარ პასუხისმგებლობას არსებული კრიზისების გადაჭრის პროცესში, ხოლო მისი რიტორიკა აღიქმება როგორც მუქარა ოპოზიციური პარტიების მისამართით – იმოქმედონ ხელისუფლების დირექტივების შესაბამისად, რათა არ გახდნენ მმართველი პარტიის მხრიდან სანქციების მსხვერპლნი". – ვკითხულობთ განცხადებაში.
განცხადებას ხელს აწერენ:
- საქართველოს დემოკრატიული ინიციატივა (GDI)
- საერთაშორისო გამჭირვალობა- საქართველო (TI Georgia)
- დემოკრატიისა და უსაფრთხო განვითარების ინსტიტუტი (IDSD)
- მედიის განვითარების ფონდი (MDF)
- ტოლერანტობისა და მრავალფეროვნების ინსტიტუტი (TDI)
- საქართველოს რეფორმების ასოციაცია (GRASS)
- ადამიანის უფლებათა ცენტრი (HRC)
- ღია საზოგადოების ფონდი (OSGF)
- სამართლიანი არჩევნებისა და დემოკრატიის საერთაშორისო საზოგადოება (ISFED)
- პარტნიორობა ადამიანის უფლებებისათვის (PHR)
- საფარი
- ინფორმაციის თავისუფლების განვითარების ინსტიტუტი (IDFI)
- ინიციატივა მოწყვლადი ჯგუფების რეაბილიტაციისათვის (RIVG)
ქართული ოცნების უმრავლესობის ლიდერის, ირაკლი კობახიძის ცნობით, გუშინ, 16 დეკემბერს პარლამენტში დარეგისტრირდა კანონპროექტი, რომელიც სახელმწიფო დაფინანსების შეწყვეტას ითვალისწინებს იმ პარტიებისთვის, რომელთა წევრებმაც მანდატებზე უარი თქვეს.
დღეს, 17 დეკემბერს გირჩის ლიდერმა, ზურაბ ჯაფარიძემ საპარლამენტო მანდატზე ოფიციალურად თქვა უარი. 16 დეკემბერს, ოპოზიციური პარტიების ნაწილმა მანდატებზე უარი ოფიციალურად თქვა. საკანონმდებლო ორგანოს განცხადებით მიმართა ენმ-ძალა ერთობაშიას, ევროპული საქართველოს, სტრატეგია აღმაშენებლისა და ლელოს ყველა წევრმა, რომელიც პარლამენტში შედიოდა. მანდატებზე ჯერჯერობით უარი არ უთქვამთ მოქალაქეებს, გირჩსა და პატრიოტთა ალიანსს. ოპოზიციური პარტიებიდან 60-დან უკვე 51-მა დეპუტატმა თქვა პარლამენტში შესვლაზე უარი.
11 დეკემბერს საქართველოს ისტორიაში პირველად ერთპარტიული პარლამენტი შეიკრიბა. ქართული ოცნების გარდა მე-10 მოწვევის პარლამენტის პირველ სხდომას არცერთი პარტია არ დაესწრო.
