"ძალიან მძიმე იყო ამ განცხადების გამოქვეყნება" - ISFED-ის აღმასრულებელი დირექტორი ელენე ნიჟარაძე საპარლამენტო არჩევნების პარალელური დათვლის შედეგების განახლებას აფასებს. მისი თქმით, სამართლიანი არჩევნებისთვის ახლა "ყველაზე მძიმე და სტრესული" პერიოდია. ელენე ნიჟარაძე აღნიშნავს, რომ რაც ის ორგანიზაციაშია, 2012 წლიდან, სამართლიან არჩევნებს "ასეთი მძიმე გამოწვევა" არ ჰქონია.
"ვიცი, რომ ბევრისთვის შოკისმომგვრელი იყო ეს განცხადება. ჩვენ ყველაზე კარგად გვესმის ეს მდგომარეობა. თუმცა, ეს არის რეალობა, რაც არ უნდა მძიმე იყოს. სამწუხაროდ, გვიწევს ხოლმე ასეთ მძიმე ფაქტებთან შეჯახება ცხოვრებაში და ამ დროს, ეტყობა, ყველაზე მნიშვნელოვანია, რომ ეს რეალობა მივიღოთ და როგორღაც გავუმკლავდეთ. ძალიან მაღალი სტანდარტია, მაგრამ შევეცადეთ, ეს მაღალი სტანდარტი დაგვეცვა და თვალი არ დაგვეხუჭა რაღაცაზე.
დარწმუნებული ვარ ბევრი კითხვები იქნება. შეგიძლიათ დამირეკოთ, მომწეროთ პირადში და შევეცდები ყველას გიპასუხოთ. ყველას ეხება ეს, როგორც მეგობრებს, ასევე ჟურნალისტებს. მოკლედ, არ მოგერიდოთ და შემაწუხეთ. ამ წუთას ბრიფინგი დაგეგმილი არ მაქვს, თუმცა შეიძლება დღის განმავლობაში ჩავნიშნოთ და ამასაც ყველას შეგატყობინებთ" - წერს ნიჟარაძე.
სამართლიანი არჩევნების (ISFED) ცნობით, შიდა აუდიტით გამოვლინდა ხარვეზი საარჩევნო სუბიექტების მიერ მიღებული ხმების გამოსათვლელ ფორმულაში, რომლის შედეგადაც ქართულ ოცნებას არჩევნებზე ხმების 45.8%-ის ნაცვლად 47.6% აქვს. სამართლიან არჩევნებში აცხადებენ, რომ აღნიშნული სხვაობა გავლენას არ ახდენს არცერთი საარჩევნო სუბიექტის მიერ მიღებული მანდატების რაოდენობაზე.
სამართლიანი არჩევნები საბოლოო შედეგების დაზუსტებულ ინფორმაციას წარმოადგენს, რომლის ცდომილების ხარისხი 0.7%-ია:
ქართული ოცნება – 47.6%
ერთიანი ნაციონალური მოძრაობა – ძალა ერთობაშია – 27.4%
ევროპული საქართველო – 3.8%
პატრიოტთა ალიანსი – 3.2%
ლელო – 3.2%
სტრატეგია აღმაშენებელი – 3.1%
გირჩი – 3.0%
მოქალაქეები – 1.3%
ლეიბორისტული პარტია – 1.0%
ნინო ბურჯანაძე – ერთიანი საქართველო – 0.9%
სამართლიანი არჩევნების 1-ელ ნოემბერს გამოქვეყნებული შედეგებით, საპარლამენტო არჩევნებში ქართულმა ოცნებამ ხმების 45.8% მიიღო, ენმ-ძალა ერთობაშიამ – 26.4%, ევროპულმა საქართველომ – 3.7%. ცდომილების ხარისხი ამ შემთხვევაშიც 0.7%-ია.
- პატრიოტთა ალიანსი – 3.1%
- ლელო – 3.1%
- სტრატეგია აღმაშენებელი – 3.0%
- გირჩი – 2.8%
- მოქალაქეები – 1.3%
- ლეიბორისტული პარტია – 1.0%
- ნინო ბურჯანაძე – ერთიანი საქართველო – 0.9%
მმართველი გუნდის შეფასებით, Isfed-ის განცხადების შემდეგ მოლაპარაკებების რეალობა შეიცვალა და ოპოზიციამ ბოდიში უნდა მოიხადოს.
ევროპული საქართველოს ლიდერის, გიგა ბოკერიას აზრით კი, მმართველმა პარტიამ ეს ხარვეზი, დიდი ალბათობით, უკანონო მიყურადებით იცოდა და მოლაპარაკებებისას გადათვლის შემოთავაზება "მახის დაგება" იყო.მისივე თქმით, PVT ვერანაირად ვერც აკონტროლებს და ვერც ზომავს ჩაყრას და კარუსელს.
