22 ივნისს აშშ-მ და ირანმა შვეიცარიაში გამართულ მოლაპარაკებებზე პროგრესს მიაღწიეს და 60 დღეში საბოლოო შეთანხმების დასადებად "საგზაო რუკაზე" შეთანხმდნენ, რაც ლიბანში ისრაელსა და ჰეზბოლას შორის შეტაკებების შესაჩერებლად კომიტეტისა და შესაბამისი მექანიზმის შექმნაზე შეთანხმებასაც მოიცავს.
"ლუცერნის სამიტი პოზიტიურ და კონსტრუქციულ გარემოში გაიმართა. იყო იმედის მომცემი პროგრესი, მათ შორის, დამატებითი ტექნიკური მოლაპარაკებებისთვის მექანიზმის შექმნის მხრივაც." – ვკითხულობთ მოლაპარაკებების შუამავალი მხარეების, კატარისა და პაკისტანის ერთობლივ განცხადებაში.
გავრცელებული ინფორმაციით, გასულ კვირას ხელმოწერილი ურთიერთგაგების მემორანდუმის საფუძველზე მხარეები "მაღალი დონის კომიტეტის" ჩამოყალიბებაზე შეთანხმდნენ, რომელიც შუამავლობის პროცესს პოლიტიკურ ზედამხედველობას გაუწევს.
ერთობლივი განცხადების მიხედვით, მოლაპარაკებების მხარეები რეგულარულ კომუნიკაციაში იქნებიან კომიტეტთან და ბირთვული პროგრამის, სანქციებისა და უთანხმოებების მოგვარების საკითხებზე სამუშაო ჯგუფებს უხელმძღვანელებენ.
მოგვიანებით ირანის საგარეო საქმეთა მინისტრმა, აბას არაღჩიმ აღნიშნა, რომ მოლაპარაკებებზე "სერიოზულ პროგრესს" მიაღწიეს და განმარტა, რომ თეირანმა მოიპოვა შეღავათები ნავთობისა და პეტროქიმიური ნივთიერებების ექსპორტზე, პორტებზე ბლოკადის მოხსნა, გაყინული აქტივების ნაწილის გათავისუფლება და რეკონსტრუქციისა და განვითარების გეგმის წამოწყება.
არაღჩის თქმით, ლიბანთან დაკავშირებით შექმნილი ახალი მექანიზმი შეთანხმების "პირველი რეალური გამოცდა" იქნება და დაამატა, რომ ლიბანში კონფლიქტის გაგრძელება საფრთხეს შეუქმნის აშშ-ირანის დიპლომატიურ ძალისხმევას.
ცნობისთვის, 21 ივნისს აშშ-სა და ირანის დელეგაციებს შორის სამშვიდობო მოლაპარაკებები გაიმართა, თუმცა, შეხვედრის პარალელურად პრეზიდენტმა ტრამპმა განაცხადა, რომ თუ თეირანი ლიბანში პროქსი ძალებს არ შეაჩერებს, აშშ ირანს "ძალიან მაგრად დაარტყამს".
