ისრაელის არმიის განცხადებით, ლიბანის სამხრეთ ნაწილში დრონით იერიშის შედეგად ჰეზბოლას ტერორისტული დაჯგუფების საჰაერო თავდაცვის სტრუქტურის წევრი, ჰასან ატვი მოკლეს.
ჰასან ატვი და მისი მეუღლე ლიბანის ქალაქ ზებდინში, ნაბატიეს გარეუბანში, მათ მანქანაზე მიტანილი იერიშის შედეგად დაიღუპნენ.
ისრაელის თავდაცვის ძალები (IDF) აცხადებენ, რომ ატვი ინფრასტრუქტურის აღდგენასა და საჰაერო თავდაცვითი სისტემისთვის აღჭურვილობის შესყიდვას ხელმძღვანელობდა. სამხედროების თქმით, მას ასევე კავშირები ჰქონდა ირანელ მაღალჩინოსნებთან, რომლებიც ჰეზბოლას საჰაერო თავდაცვის სისტემებით ამარაგებდნენ.
ამასთან, ლიბანური მედიის ცნობით, ატვიმ გასულ წელს ისრაელის ე.წ. "პეიჯერების ოპერაციის" შედეგად მხედველობა დაკარგა.
ისრაელის თავდაცვის ძალები აცხადებენ, რომ ატვის საქმიანობა ისრაელსა და ლიბანს შორის დადებულ შეთანხმებებს არღვევდა და მისი მკვლელობა ჰეზბოლას აღდგენის მცდელობის შეჩერებას წარმოადგენს.
