ხამენეი: ვფიქრობთ, რომ აშშ-სთან მოლაპარაკებებს შედეგი არ ექნება

ირანის უზენაესი ლიდერის, აიათოლა ხამენეის თქმით, მას არ სჯერა, რომ აშშ-სთან ბირთვულ პროგრამაზე მოლაპარაკებები შედეგს გამოიღებს. 

"არაპირდაპირი მოლაპარაკებები მის [პრეზიდენტ ებრაჰიმ რაისის] დროსაც იყო, ზუსტად ისე, როგორც ახლა, მაგრამ უშედეგოდ. ჩვენ ასევე ვფიქრობთ, რომ ახლაც შედეგი არ იქნება" – ამბობს ხამენეი. 

ირანის ლიდერმა ასევე "მიუღებელი" უწოდა აშშ-ს მიერ ირანის მიმართ მოწოდებებს, რომ სრულად შეაჩეროს ურანის გამდიდრების პროგრამა. 

"არავინ ელოდება ამა თუ იმ მხარის ნებართვას. ისლამურ რესპუბლიკას საკუთარი პოლიტიკა და მიდგომა აქვს და საკუთარ გზას მიუყვება" – თქვა ხამენეიმ. 

16 მაისს აშშ-ს პრეზიდენტმა დონალდ ტრამპმა განაცხადა, რომ ირანს ბირთვულ შეთანხმებასთან დაკავშირებით წინადადება შესტავაზა, თუმცა ირანის საგარეო საქმეთა მინისტრმა აბას არაღჩიმ პლატფორმა X-ზე დაწერა, რომ თეირანს ასეთი წინადადება არ მიუღია.

"არ არსებობს სცენარი, რომელშიც ირანი თავის ლეგიტიმურ უფლებაზე, მშვიდობიანი მიზნებისთვის ურანის გამდიდრებაზე, უარს იტყვის". - აღნიშნა არაღჩიმ.

მისი თქმით, აშშ-ს პოზიციის მუდმივი ცვლილება მოლაპარაკებებს აჭიანურებს.

მანამდე ტრამპმა 15 მაისს თქვა, რომ აშშ ირანთან ბირთვული შეთანხმების მიღწევასთან ძალიან ახლოსაა და დაამატა, რომ თეირანი "გარკვეულწილად" დათანხმდა ამერიკული მხარის პირობებს.

• ტრამპის თქმით, აშშ ირანთან ბირთვული შეთანხმების მიღწევასთან "ძალიან ახლოსაა"