სამხრეთ კორეის თავდაცვის ყოფილმა მინისტრმა, კიმ იონგ-ჰიონმა, რომელსაც ამბოხება ედება ბრალად, დაკავების იზოლატორში თვითმკვლელობა სცადა. ამის შესახებ სამხრეთ კორეის სასჯელაღსრულების სამსახურის გენერალურმა კომისარმა, შინ იონგ-ჰემ ქვეყნის ეროვნული ასამბლეის წინაშე ისაუბრა.
შინ იონგ-ჰეს თქმით, ყოფილმა მინისტრმა თავის მოკვლა ფორმალური დაკავების ორდერის გაცემამდე სცადა.
ცნობისთვის, კიმ იონგ-ჰიონი სამხედრო მდგომარეობის გამოცხადების მცდელობაში მონაწილეობის ბრალდებით სეულში 8 დეკემბერს დააკავეს. ბრალდების მიხედვით, ყოფილმა მინისტრმა პრეზიდენტს სამხედრო მდგომარეობის გამოცხადება ურჩია.
მანამდე, 4 დეკემბერს სამხრეთ კორეის თავდაცვის მინისტრმა, კიმ იონგ-ჰიონმა პრეზიდენტი იუნ სუკ იოლის მიერ საომარი მდგომარეობის დაწესების მცდელობისა და საზოგადოებაში მღელვარების გამოწვევის გამო ბოდიში მოიხადა და თავდაცვის მინისტრის თანამდებობიდან გადადგა.
3 დეკემბერს სამხრეთ კორეის პრეზიდენტმა ქვეყანაში სამხედრო მდგომარეობა გამოაცხადა. იუნ სოკ იოლმა გადაწყვეტილების მიზეზად ოპოზიციის მიერ "ანტისახელმწიფოებრივი ქმედება და გადატრიალების მცდელობის დაგეგმვა" დაასახელა.
იოლმა ქვეყანაში წინა დღით გამოცხადებული სამხედრო მდგომარეობა 4 დეკემბრის გამთენიისას გააუქმა.
4 დეკემბერს სამხრეთ კორეის ეროვნულ ასამბლეაში ექვსივე ოპოზიციურმა პარტიამ ქვეყნის პრეზიდენტის, იუნ სუკ იოლის იმპიჩმენტის დაწყებაზე განცხადება წარადგინა.
გამოცემის Yonhap-ის ცნობით, კანონპროექტი ეროვნული ასამბლეის სესიაზე 5 დეკემბერს განიხილება, კენჭისყრა კი მომდევნო დღეებში, 6 ან 7 დეკემბერს შედეგება.
