სლოვაკეთის პრემიერმინისტრმა, რობერტ ფიცომ თქვა, რომ მოსკოვში მეორე მსოფლიო ომის დასრულების 80 წლისთავთან დაკავშირებით გამართულ ღონისძიებაზე წასვლას განიხილავს და არ დაუშვებს იმის დავიწყებას, რომ "თავისუფლება აღმოსავლეთიდან მოვიდა".
ამის შესახებ მან გადაცემა შაბათის დიალოგების ეთერში ისაუბრა.
"ვკითხულობ, შემდეგ წელს ვინ შემაჩერებს, როცა მეორე მსოფლიო ომის დასრულების 80 წლისთავი იქნება, რომ მოსკოვში მშვიდობიან დემონსტრაციაზე არ წავიდე? ვინ შემაჩერებს? ვფიქრობ, წავალ, რატომ არ უნდა წავიდე? რა აქვს ამას ახლანდელ დროსთან საერთო?" - თქვა ფიცომ.
რობერტ ფიცოს 2023 წლის წინასაარჩევნო კამპანია პრორუსული და ამავდროულად NATO-ს, აშშ-სა და ევროკავშირის მიმართ სკეპტიკური დამოკიდებულებით გამოირჩეოდა. მან პირობა დადო, რომ გამარჯვების შემთხვევაში უკრაინას სამხედრო დახმარებას შეუწყვეტდა და კონფლიქტის მოსაგვარებლად მოლაპარაკებებს დაუჭერდა მხარს.
