ისრაელის ომი ტერორიზმთან

Reuters: კატარის შუამავლობით ისრაელსა და ჰამასს შორის მოლაპარაკებები გრძელდება

ისრაელის საჰაერო იერიშები ჰამასის წინააღმდეგ ღაზაში. 2023 წლის 13 ოქტომბერი
Mahmud Hams / AFP

Reuters-ის წყაროს ცნობით, კატარის შუამავლობით ისრაელსა და ჰამასს შორის მოლაპარაკებები 28 ოქტომბერს განახლდა. მოლაპარაკებები ღაზაში სიტუაციის დეესკალაციას ემსახურება.

მოლაპარაკებები არ ჩაშლილა, თუმცა 27 ოქტომბრის საღამოს ესკალაციამდე "ბევრად ნელი ტემპით" მიმდინარეობდა, უთხრა Reuters-ს ინფორმირებულმა წყარომ, რომლის სახელსაც მედია მოლაპარაკებისთვის დამახასიათებელი სენსიტიურობის გამო არ ამჟღავნებს. 

კატარი სამ კვირაზე მეტია მშვიდობის ხელშეწყობისა და ღაზაში მყოფი მძევლების გათავისუფლების მიზნით, ჰამასის ოფიციალურ პირებსა და ისრაელის სახელმწიფოსთან მოლაპარაკებებს აწარმოებს. 

7 ოქტომბრის თავდასხმიდან დღემდე, კატარის შუამავლობის შედეგად, ჰამასმა რამდენიმე მძევალი, მათ შორის ორი შუახნის ისრაელელი ქალი გაათავისუფლა.

ისრაელის პრემიერ-მინისტრის, ბენიამინ ნეთანიაჰუს თქმით, ისინი ღაზაზე სახმელეთო შეტევის დროსაც კი ეცდებიან მძევლების გათავისუფლებას.   

"ჩვენ გამოვიყენებთ ყველა არსებულ შესაძლებლობას, რომ ისინი სახლში დავაბრუნოთ". - თქვა ნეთანიაჰუმ.


ღაზის სექტორიდან ისრაელზე მოულოდნელი სახმელეთო და სარაკეტო თავდასხმა 7 ოქტომბერს დაიწყო. ტერორისტები ქვეყნის სამხრეთით მდებარე დასახლებებში შევიდნენ, სადაც სასტიკი დანაშაულები ჩაიდინეს და ხოცვა-ჟლეტა მოაწყვეს. აქ შეტაკებები რამდენიმე დღის განმავლობაში გრძელდებოდა.

რა, სად და როდის შეეშალა ისრაელის დაზვერვას

ტერორისტებმა აიყვანეს 200-მდე მძევალი და ღაზის სექტორში გადაიყვანეს. ისრაელის თავდაცვის ძალებმა იმ კიბუცებში, სადაც ჰამასელები იმყოფებოდნენ, მძიმე სურათები აღმოაჩინეს. ცნობების მიხედვით, იპოვეს დახოცილი, თავმოკვეთილი ბავშვებიც, რაც აშშ-ს პრეზიდენტმა, ჯო ბაიდენმაც დაადასტურა. თავდასხმის პირველ დღეს გავრცელდა ჩანაწერებიც, რომლებშიც ისრაელელი ჯარისკაცების ცხედრების შეურაცხყოფის ფაქტებიც ჩანდა. 7 ოქტომბრის მოვლენებს 1 400-მდე ისრაელელი ემსხვერპლა. დახოცილთა ნაწილის იდენტიფიცირება ჯერ კიდევ მიმდინარეობს.

ისრაელმა სამხრეთის ტერიტორიების ტერორისტებისგან გაწმენდასთან ერთად ღაზის სექტორში ჰამასის ობიექტებზე სარაკეტო იერიშების მიტანა დაიწყო, რაც უკვე რამდენიმე დღე გრძელდება. პარალელურად, დროგამოშვებით, შეტაკებები ისრაელის ჩრდილოეთ საზღვარზეც ხდება. ამ მიმართულებით, ლიბანის სამხრეთ ტერიტორიას აკონტროლებს ირანის მიერ მხარდაჭერილი დაჯგუფება ჰეზბოლა.

საფრთხე, რომელიც ღაზიდან მოდიოდა, განადგურდება – ინტერვიუ საქართველოში ისრაელის ელჩთან

აშშ-ს პრეზიდენტმა, ჯო ბაიდენმა ისრაელის მიმართულებით სამხედრო ავიამზიდი, საბრძოლო ხომალდები და ავიაგამანადგურებლები გააგზავნა. მსგავსი ნაბიჯი გადადგა დიდმა ბრიტანეთმაც.

ისრაელმა ღაზის სექტორი სრულ ბლოკადაში მოაქცია. 13 ოქტომბერს ღაზის ჩრდილოეთში მცხოვრებმა მშვიდობიანმა მოსახლეობამ მიიღო გაფრთხილება, რომ ტერიტორია 24 საათში დაეტოვებინათ. ამავე დღეს, ღაზის სექტორში მცირე მასშტაბის რეიდები მოეწყო. ისრაელი, სავარაუდოდ, მასშტაბური სახმელეთო ოპერაციისთვის ემზადება. მზადყოფნაშია 300 000 რეზერვისტი. აქამდე ისრაელის მაღალჩინოსნები დებდნენ პირობას, რომ ჰამასი განადგურდება და ღაზის სექტორში რეალობა შეიცვლება.

22 ოქტომბერს ღაზის სექტორში ეგვიპტიდან ჰუმანიტარული დახმარება შევიდა. პროცესს ისრაელი აკონტროლებს, რათა მხოლოდ საკვები და სამედიცინო პროდუქტები შეიტანონ. აკრძალულია საწვავის შეტანა.

28 ოქტომბერს ისრაელმა, მას შემდეგ, რაც საჰაერო იერიშების რიცხვი გაზარდა და სახმელეთო ოპერაციის არეალი გააფართოვა, ომის მეორე ფაზა დაიწყო.

კომენტარები