ისრაელის არმია აცხადებს, რომ "ღრმად წუხს" Reuters-ის ჟურნალისტის დაღუპვის გამო, რომელიც ლიბანის საზღვართან დაბომბვას ემსხვერპლა.
"ჩვენ ღრმად ვწუხვართ ჟურნალისტის დაღუპვის გამო". - თქვა ისრაელის სამხედრო სპიკერმა რიჩარდ ჰეხტმა ჟურნალისტებთან საუბრისას.
ისრაელის სამხედროებს ჟურნალისტის სიკვდილზე პასუხისმგებლობა არ აუღიათ. ჰეხტის თქმით, ისრაელი "საქმეს იძიებენ".
გუშინ, 13 ოქტომბერს გავრცელდა კადრები, რომლის მიხედვითაც, სამხრეთ ლიბანში ისრაელის თავდაცვის ძალების იერიშისას ტანკიდან ნასროლი ჭურვი ჟურნალისტებთან აფეთქდა.
მედიაში წერდნენ, რომ თავდასხმას Reuters-ის ოპერატორი, ისამ აბდულა ემსხვერპლა. Al Jazeera-ს ჟურნალისტები, კარმენ ჯოხდარი და ელი ბრახაია დაჭრილები არიან.
მოგვიანებით Reuters-მა სამხრეთ ლიბანში მისი ოპერატორის მოკვლის შესახებ განცხადებას გაავრცელა, რომელშიც სააგენტოს ოპერატორის სიკვდილი დაადასტურა.
ღაზის სექტორიდან ისრაელზე მოულოდნელი სახმელეთო და სარაკეტო თავდასხმა 7 ოქტომბერს დაიწყო. ტერორისტები ქვეყნის სამხრეთით მდებარე დასახლებებში შევიდნენ, სადაც სასტიკი დანაშაულები ჩაიდინეს და ხოცვა-ჟლეტა მოაწყვეს. აქ შეტაკებები რამდენიმე დღის განმავლობაში გრძელდებოდა.
ტერორისტებმა აიყვანეს ასზე მეტი მძევალი და ღაზის სექტორში გადაიყვანეს. ისრაელის თავდაცვის ძალებმა იმ კიბუცებში, სადაც ჰამასელები იმყოფებოდნენ, მძიმე სურათები აღმოაჩინეს. ცნობების მიხედვით, იპოვეს დახოცილი, თავმოკვეთილი ბავშვებიც, რაც აშშ-ს პრეზიდენტმა, ჯო ბაიდენმაც დაადასტურა. თავდასხმის პირველ დღეს გავრცელდა ჩანაწერებიც, რომლებშიც ისრაელელი ჯარისკაცების ცხედრების შეურაცხყოფის ფაქტებიც ჩანდა.
ისრაელმა სამხრეთის ტერიტორიების ტერორისტებისგან გაწმენდასთან ერთად ღაზის სექტორში ჰამასის ობიექტებზე სარაკეტო იერიშების მიტანა დაიწყო, რაც უკვე რამდენიმე დღე გრძელდება. პარალელურად, დროგამოშვებით, შეტაკებები ისრაელის ჩრდილოეთ საზღვარზეც ხდება. ამ მიმართულებით, ლიბანის სამხრეთ ტერიტორიას აკონტროლებს ირანის მიერ მხარდაჭერილი დაჯგუფება ჰეზბოლა.
საფრთხე, რომელიც ღაზიდან მოდიოდა, განადგურდება – ინტერვიუ საქართველოში ისრაელის ელჩთან
აშშ-ს პრეზიდენტმა, ჯო ბაიდენმა ისრაელის მიმართულებით სამხედრო ავიამზიდი, საბრძოლო ხომალდები და ავიაგამანადგურებლები გააგზავნა. მსგავსი ნაბიჯი გადადგა დიდმა ბრიტანეთმაც.
ისრაელმა ღაზის სექტორი სრულ ბლოკადაში მოაქცია. 13 ოქტომბერს ღაზის ჩრდილოეთში მცხოვრებმა მშვიდობიანმა მოსახლეობამ მიიღო გაფრთხილება, რომ ტერიტორია 24 საათში დაეტოვებინათ. ისრაელი, სავარაუდოდ, სახმელეთო ოპერაციისთვის ემზადება. მზადყოფნაშია 300 000 რეზერვისტი. აქამდე ისრაელის მაღალჩინოსნები დებდნენ პირობას, რომ ჰამასი განადგურდება და ღაზის სექტორში რეალობა შეიცვლება.
