ჰავაიზე ხანძრის შედეგად დაღუპულთა რიცხვმა 106-ს მიაღწია, დაახლოებით 1 300 ადამიანი კი დაკარგულად ითვლება.
ჰავაის გუბერნატორის, ჯოშ გრინის თქმით, სავარაუდოდ, ხელისუფლებას კიდევ რამდენიმე დღე დასჭირდება იმისათვის, რომ დაღუპულთა სრული რიცხვი დაასახელოს.
16 აგვისტოს მონაცემებით, იდენტიფიცირებულია რამდენიმე სხეული.
BBC-სთან ინტერვიუში სპეციალისტებმა თქვეს, რომ მაუიში დაღუპულთა იდენტიფიცირებას, შესაძლოა, თვეები ან წლები დასჭირდეს.
"იმის გათვალისწინებით, თუ როგორი განადგურებულია ტერიტორია, მსხვერპლთა აღმოჩენა და იდენტიფიცირება ძალიან რთული იქნება". - ნათქვამია განცხადებაში.
სასწრაფო დახმარების სამსახურის თქმით, ადგილზე სიტუაცია "უკიდურესად სახიფათოა".
"ჩვენ ვუსამძიმრებთ ოჯახებს, რომლებიც საყვარელი ადამიანების დაკარგვის შესახებ ინფორმაციას იღებენ. როგორც საზოგადოება, ამ ყველაზე რთულ დროს ჩვენ მათთვის ვლოცულობთ". - თქვა მაუის ოლქის მერმა, რიჩარდ ბისენმა.
აშშ-ს პრეზიდენტმა ჯო ბაიდენმა თქვა, რომ ის ჰავაიზე გაემგზავრება "როგორც კი შეძლებს".
ჰავაის გუბერნატორმა, ჯოშ გრინმა ხანძარს უწოდა "ყველაზე დიდი ბუნებრივი კატასტროფა, რომელიც ჰავაიში ოდესმე ყოფილა". ხანძრის შედეგად დაახლოებით 2 200 შენობა განადგურდა. ხელისუფლების ინფორმაციით, ზარალი დაახლოებით 6 მილიარდია.
ხანძარი ძლიერი სიცხით და გვალვითაა გამოწვეული, ხოლო ხანძრის სწრაფ გავრცელებას ხელს უწყობს ქარიშხალი დორას ძლიერი ქარი, რომელიც წყნარ ოკეანეში კუნძულებიდან სამხრეთით ასობით კილომეტრში მძვინვარებს.
"არ მინდა ვიყო დრამატული, მაგრამ არა მგონია, რომ მსგავსი რამ ოდესმე მომხდარა მაუიზე. დაუჯერებელია, რომ ხანძრებმა ამდენი ტერიტორია მოიცვა, ისინი მთელ კუნძულს მოედო". - თქვა ადგილობრივმა.
როგორც სილვია ლუკი CNN-თან საუბრისას აღნიშნავს, კუნძულის საავადმყოფოები გადატვირთულია დამწვრობითა და კვამლის ინჰალაციისგან დასუსტებული პაციენტებით. დაშავებულთა მოვლას დაწესებულებებში მათ გადანაწილებასთან დაკავშირებული სირთულეები აფერხებს. ამასთან, ხელისუფლებას უჭირს ტყის ხანძრის შედეგად მოწყვეტილ ტერიტორიებთან კომუნიკაცია და ევაკუაციის კოორდინირება.
"911 გათიშულია. მობილურის სერვისი გათიშულია. ტელეფონის სერვისი გათიშულია. ეს პრობლემების ნაწილია. მაუის ოლქმა ვერ შეძლო დასავლეთის, ლაჰაინას მხარის მცხოვრებლებთან კომუნიკაცია."- აღნიშნა ლუკმა.
ჰავაის განათლების დეპარტამენტის ცნობით, მაუის ათი საჯარო სკოლა ხანძრის და ძლიერი ქარის შედეგად გამოწვეული საშიში პირობების გამო დაიხურა. სკოლები ევაკუირებული ადამიანებისთვის თავშესაფრებად გამოიყენება.
ტყის ხანძრის გამო 5 წელზე ნაკლებ დროში დასავლეთ მაუის თემში, ლაჰაინაში, მარკ და მორინ სტეფლებმა მეორედ დაკარგეს სახლი. 8 აგვისტოს მათ პირველად შენიშნეს ცეცხლი საკუთარი სახლიდან ნახევარი მილის დაშორებით და ქარის ამოვარდნის შემდეგ, ცეცხლი მალევე მათ ეზოსაც მოედო.
"ჩვენ ისევ დავკარგეთ სახლი. ოთხ წელიწადში ორჯერ... ჩვენ ახლახან დავაბრუნეთ ჩვენი სახლი იქ, სადაც გვინდოდა და ეს მოხდა". - თქვა აშშ-ს მოქალაქე, მარკ სტეფლმა CNN-თან ინტერვიუში.
