ოკუპირებული ცხინვალის მარიონეტი ლიდერი, ალან გაგლოევი რუსეთში მიმდინარე სამხედრო არეულობას ეხმაურება და ვაგნერის დაჯგუფებაში მყოფ "თანამემამულეებს" მოუწოდებს, არ გაუწიონ არანაირი დახმარება კანონსაწინააღმდეგო ქმედებებს.
"სრულ მხარდაჭერას ვუცხადებ რუსეთის ფედერაციის პრეზიდენტის - შეიარაღებული ძალების უმაღლესი მთავრსარდლის, ვლადიმირ პუტინის ქმედებებს, აღკვეთოს კერძო სამხედრო კომპანია ვაგნერის ხელმძღვანელის, ევგენი პრიგოჟინის შეიარაღებული ამბოხი". - წერია განცხადებაში.
გაგლოევი ასევე აღნიშნავს, რომ რუსეთისა და მისი მოკავშირეებისთვის "ამ რთულ დროს" ყველა უნდ დარჩეს ერთიანი და იმოქმედოს საერთო მომავლისთვის სასიკეთოდ.
"მოვუწოდებ ჩემს თანამემამულეებს, რომლებიც არიან ვაგნერის შემადგენლობაში, არ აყვნენ პროვოკაციებს და არ დაუჭირონ მხარი ხელმძღვანელების უკანონო ქმედებებს". - ვკითხულობთ განცხადებაში.
23 ივნისს პრიგოჟინმა თქვა, რომ ვაგნერის ბანაკებზე რუსეთის თავდაცვის სამინისტრომ სარაკეტო იერიში მიიტანა და საპასუხო მოქმედებებისთვის ემზადებოდნენ. ამის შემდეგ, მან განაცხადა, რომ საზღვარი გადაკვეთეს და როსტოვში შედიოდნენ. ის ასევე ირწმუნებოდა, რომ თავდაცვის სამინისტრომ თვითმფრინავებით ვაგნერის კოლონებზე დარტყმის ბრძანება გასცეს, რაზეც პილოტებმა უარი თქვეს.
"ხელს ვუშლით საკუთარი ტრა*ი გადაარჩინონ დამნაშავეებმა, რომლებმაც 100 000-მდე რუსი ჯარისკაცი გაანადგურეს, [ვალერი] გერასიმოვსა და [სერგეი] შოიგუს". – თქვა ევგენი პრიგოჟინმა.
პრიგოჟინის თქმით, თავდაცვის მინისტრი სერგეი შოიგუ სპეციალურად ჩავიდა როსტოვში, რათა კსკ ვაგნერის განადგურების ოპერაცია ჩაეტარებინა. მისივე მტკიცებით, მინისტრი ქალაქიდან გაიქცა. პრიგოჟინის თქმით, მისი მოქმედებები არა სამხედრო გადატრიალება, არამედ "სამართლიანობის მარშია".
პრიგოჟინი ყველაფრის განადგურებით იმუქრება. ამ დრომდე, მისი მტკიცებით, 3 ვერტმფრენი ჩამოაგდეს, მათ შორის ერთ-ერთი მოსკოვის ტრასაზე.
ამჟამად არსებული ინფორმაციით, ვაგნერის ძალები აკონტროლებენ დონის როსტოვისა და ვორონეჟის ადმინისტრაციულ შენობებს.
მაისში ბახმუტის აღების შემდეგ, ევგენი პრიგოჟინმა საკუთარი ძალები ზურგში, ბანაკებში გადაიყვანა და თქვა, რომ მაშინ დაბრუნდებოდნენ, როცა "სამშობლოს დასჭირდებოდნენ". უკვე რამდენიმე თვეა, რაც ვაგნერსა და რუსეთის თავდაცვის სამინისტროს შორის დაძაბული ვითარებაა. პრიგოჟინი ხშირად ლანძღავდა თავდაცვის მინისტრ სერგეი შოიგუსა და გენშტაბის მეთაურს, ვალერი გერასიმოვს. ის ირწმუნებოდა, რომ თავდაცვის უწყებას ვაგნერის განადგურება სურდა და ეს ჯერ კიდევ 2018 წელს, სირიაშიც კი სცადეს, როცა კერძო სამხედრო კომპანია ამერიკულ ძალებს დაუპირისპირდა და ბევრი მებრძოლი დაკარგა.
